Hơmâo pơphun mơng 23/11 thun hlâo hăng sui truh lơ 21/2 thun anai, tal pơplông mă rup hiam “kơphê Việt Nam - Glông jơlan pơjing rai gơnam yôm amăng rŏng lŏn tơnah” hơmâo 4 črăn kơ gơnong bruă kơphê Việt Nam, anăp nao hơnong pơkă pơpŭ bơni asar kơphê Việt Nam. Anai ăt lĕ sa amăng 18 bruă mă phun amăng Jơnum ngui kơphê Buôn Ma Thuột tal 8, thun 2023. Tơdơi kơ 3 blan pơphun, khul pơphun tŭ mă 1.100 rup ba nao pơplông mơng 170 čô mơnuih mơng 30 boh tơring čar, ƀôn prong đơ đam dêh čar mơ-it nao.

Mơng pel ĕp hơmâo ruah mă 76 pok rup hiam hloh kiăng pơdă prưng hăng jao 15 pri brơi ƀing mơnuih hơmâo rup hiam hloh, hơmâo 4 pri yôm phăn dưm dưm hăng 4 črăn, 10 pri pơsur pran, 1 pri yua mơnuih ƀon sang ruah. Tui sem lăng mơng khul pơphun, hơmâo lu rup hiam kiăng lăi pơthâo rup rap kơphê Việt Nam, rup rap kơphê Buôn Ma Thuột tơl abih bang mơnuih khăp hăng hor mơñum kơphê amăng tar ƀar rŏng lŏn tơnah.