VOV4.Jarai - Mơnuih ƀon sang plơi Duệ, să Đinh Lạc, tơring glông Di Linh, tơring čar Lâm Đồng lêng kơ pơpŭ hăng pơ-ư ang kơ tha plơi K’Tiếu, 71 thun. Yua tha plơi hor hăng abih pran jua hăng gru grua čing hơgor djuai ania K’ho ƀơi kual kơčong čư̆ Di Linh. Rơbêh 10 thun pok anih pơtô hrăm atông čing hơgor lĕ bruă mă sit nik, pơgôp prong prin amăng bruă djă pioh, lăi pơthâo gru grua čing hơgor ƀơi kual Dap kơdư; laih dong, mơng anun pơtô pơblang kiăng ană plơi pla thâo hluh rơđah, djă pioh gru grua yôm phara mơng djuai ania K’ho brơi rơnuk tơdơi.

Lăi nao kơ pran hor gru grua djuai ania K’ho, tha plơi K’Tiếu hơdor glăi lơ̆m ñu dŏ anet, lơ̆m anun ñu glăk 15, 16 thun, ñu thâo abih hơdôm tơlơi adôh atông pơkhă hăng rĭng čing 6 boh mơng djuai ania K’ho. Amăng hơdôm hrơi ngui ngor, hrơi ngă yang ƀong asơi hle đưm hlâo adih, ñu lêng kơ kiăo tui amĭ ama nao lăng hăng ñu hor biă mă lơ̆m ƀuh arăng atông čing. Rĭm wŏt pơphun ngui ngor, lơ̆m hmư̆ arăng atông čing glăi pơ sang ñu amra hrăm mă pô laih anun thâo atông mơtăm yơh. Đưm hlâo, lơ̆m aka ƀu truh thun hlăk ai, tơdăm djuai ania K’ho plơi Duệ hơmâo mơnuih amăng plơi ruah mut atông amăng grup čing hơgor plơi.

“Thun Ha hnưr hăng kâo, mơnuih thâo hăng juăt atông lu tơlơi adôh kar hăng kâo ăt aset đôč, kar hăng amăng plơi K’Brà, plơi Duệ anai hơmâo pluh čô mơnuih thun ha hnưr hăng kâo, anun lĕ ơi K’Khéo – Dam Brẹo, ring čing 6 boh ñu ăt dưi atông hơdôm tơlơi adôh đôč, mơ̆ ƀu thâo lu kar hăng kâo ôh. Kâo pô yua kơ hor čing hơgor yua anun thâo atông lu tơlơi adôh ƀiă, pơhmutu tơlơi adôh atông amăng hrơi ngă yang hơjan, tơlơi adôh anai atông hiưm ñu, ƀing mơnuih amăng grup kiăng hmư̆ hrŏm kiăng kơ atông djơ̆, jua čing dưi pơkhă nao rai kiăng kơ mơnuih hmư̆ hor, tơngan djă čing hiưm pă brơi djơ̆, anai ăt lĕ tơlơi hor mơng ta pô, hơmâo lu mơnuih thâo atông čing mơ̆ ƀu thâo ôh hơdôm tơlơi anai’’.

Hră pơpŭ mơng Jơnum min mơnuih ƀon sang tơring glông Di Linh tŭ yap tha plơi K’Tiếu lĕ mơnuih rơgơi kơhnâo

Sui thun yun blan djă čing hơgor, găn rơgao lu bơyan ngui ngor ngă yang rơbang, jua čing lêng kơ kiăo tui tha plơi K’Tiếu. Grup atông čing amăng plơi Duệ, să Đinh Lạc juăt pơkiăo nao lu wŏt mơnuih nao atông čing amăng hrơi ngui gru grua, bơrơguăt drơi jăn djop djuai ania ƀơi hơdôm să, tơring glông kual mơnuih djuai ania ƀiă amăng đơ đam tơring čar Lâm Đồng, kah hăng hơdôm tơring čar amăng kual Dap kơdư hăng lêng kơ mă pri prong hloh. Phrâo anai, grup atông čing plơi Duệ hơmâo nao atông ƀơi plơi gru grua djop djuai ania Việt Nam pơ Đồng Mô, Hà Nội. Tha plơi hok mơ-ak hrŏm hăng gong gai ƀon lan gum pơgôp pơtô glăi hăng djă pioh gru grua čing hơgor djuai ania K’ho. Yua anun, tha plơi čang rơmang bruă djă pioh gru grua čing hơgor amra tŏ tui hrŏm hăng gong gai brơi kơ tong ten ƀiă dong:

“Tơdah kiăng djă pioh gru grua čing hơgor tui kâo pơmĭn kiăng hơmâo bruă mă tong ten, blung hlâo lĕ kiăng hơmâo anih, anun lĕ anih djă pioh, anih pơtô hrăm, ƀu djơ̆ hor pơtô, ƀu hor lui. Ha wŏt hrơi tơjuh 3 wŏt kâo juăt pơtô truh 9, 10 mông mơmŏt kah mơng glăi kiăng kơ pơtô glăi gru grua čing hơgor brơi rơnuk tơdơi dong, anai lĕ yôm hloh. Kâo ăt hning rơngŏt mơn yua rơnuk ană tơčô ră anai ƀu hor gru grua čing hơgor dong tah, hơmâo gong gai ƀon lan đing nao ngă gêh gal kiăng pơtô glăi, kâo hok mơ-ak biă mă. Mah thun tha laih, samơ̆ kâo lĕ mơnuih abih pran jua hăng gru grua čing hơgor, kâo amra pơtô glăi truh hrơi kâo ƀu-ai buai, dŏ añrăng ăt dŏ dŏ pơtô mơn”.

Tha plơi K’Tiếu hăng hơdôm boh čing yôm amăng sang anŏ

Tơlơi mơ̆ tha plơi K’Tiếu dŏ pơmĭn na nao lĕ ngă hiưm pă kiăng kơ neh met wa pơ-ư ang kơ gru grua djuai ania pô; sit biă ñu ngă hiưm pă kiăng kơ djă pioh jua čing hơgor, hơdôm tơlơi ayun suang hiam mơ-ak. Mơng tơlơi pơmĭn anun, tha plơi K’Tiếu hơmâo pơƀut glăi sa, dua čô mơnuih hlâo anun lĕ juăt atông čing amăng plơi pla kiăng kơ akŏ pơjing grup čing hơgor. Hrŏm hăng anun, tha plơi ăt gum hrŏm amăng bruă pơtô čing hơgor.

“Blung hlâo kâo amra pok anih pơtô hrăm čing hơgor brơi kơ ƀing čơđai anet, dua dong lĕ amăng anih pơtô hrăm hơmâo wŏt đah rơkơi, đah kơmơi, tlâo lĕ pok anih pơtô čing hơgor brơi kơ ƀing đah kơmơi. Yua tơdah kơnong pơtô brơi đah rơkơi đôč rơbêh hơdôm rơtuh čô yơh samơ̆ ƀing gơñu truh prong nao dô̆ bơnai pơ plơi pla pơkŏn, mơng anun amra kơƀah mơnuih atông čing amăng plơi, yua anun kâo pơmĭn kiăng pơtô brơi wŏt đah kơmơi tơdah ƀing gơñu dô̆ rơkơi ƀing gơñu ăt dŏ amăng plơi mơn, huăi đuăi nao plơi pla pơkŏn mơng anun amra hơmâo djop mơnuih atông čing. Tơdơi anai ƀing gơñu amra pơtô glăi ană bă, rơkơi ƀing gơñu tơdah hor gru grua čing hơgor djuai ania pô”.

Hăng hơdôm tơlơi gum pơgôp lơ̆m rơbêh 10 thun pok anih pơtô hrăm atông čing hơgor kah hăng djă pioh gru grua čing hơgor kual Dap kơdư, Jơnum min mơnuih ƀon sang tơring čar Lâm Đồng hơmâo ngă hră pơ-ar rơkâo Ding jum gru grua, bơrơguăt drơi jăn hăng tuai čuă ngui tŭ yap lĕ nghệ nhân ưu tú hăng tha plơi K’Tiếu amăng thun 2022. Ơi Trương Quốc Phương – Kơ-iăng khua jơnum min mơnuih ƀon sang să Đinh Lạc, tơring glông Di Linh brơi thâo, tha plơi K’Tiếu arăng lăng kar hăng mơnuih ba gru amăng plơi pla, lu mơnuih pơpŭ lăng yôm.

“Hăng tha plơi K’Tiếu, ñu hơmâo gum pơgôp prong prin brơi kơ plơi pla amăng bruă djă pioh gru grua, sit biă ñu lĕ djă pioh gru grua čing hơgor. Ñu djru brơi lu biă mă kơ bruă djă pioh gru grua sô hơđăp. Hăng mơnuih pơtô hrăm brơi rơnuk tơdơi amăng hơdôm thun laih, hrŏm hăng bruă pơtô glăi čing hơgor, ñu ăt pơtô brơi gru grua kơ ană tơčô. Ră anai ƀing čơđai hlơi hlơi lêng kơ thâo atông amăng 10 tơlơi adôh. Tơlơi pơmĭn mơng gong gai ƀon lan čang rơmang amăng hơdôm tơlơi ñu thâo dŏ djă pioh ră anai, ñu amra pơtô brơi ƀing hlăk ai čơđai djuai ania K’ho”.

Siu Đoan: Pơblang