Gong ting ning mơ̆ng djuai ania Bahnar hơmâo pơkra mơ̆ng phun pơ-o, ƀudah phun djrao, prong đơ hơpal tha. Ƀơi đing gong hơmâo pơtlep nao boh get krô kiăng mơñi. Hăng tơlơi rơgơi, ƀing kơhnâo hơmâo “bluh bơngăt” kơ djuai gong brô̆ anai, jing goong pơjing rai jua mơñi mơ-ak...Biă ñu lơ̆m mơmot mơñum tơpai čeh, ƀudah amăng hrơi plơi pla ngui ngor, jua goong ting ning ngă kơ abih bang mơnuih mơ-ak, abih pran hăng tơlơi ngui ngor, ƀơi anŏ ñu dik dak, ƀơi anŏ ñu rơnguă kar hăng jua gong pơkhăp tơdăm dra...hmư̆ pơhưč hơtai boh biă.

Ơi Hmôt, 63 thun, dŏ ƀơi plơi Tuơh Kơtu, să G’Lar, tơring glông Đăk Đoa, tơring čar Gia Lai, sa amăng hơdôm čô mơnuih rơgơi pĕ goong Ting ning hloh ră ruai: “Đưm hlâo, lơ̆m glăk tơdăm dra, glăk thâo pơamuaih, hrơi blan bơrơmi, goong ting ning yơh “djru tui tlôn” brơi ñu thâo ngui dra. Rim hơmâo tơlơi ƀu mơ-ak hơget thơ, ñu juăt pĕ goong kiăng mơ-ak, kiăng wơr tơlơi rơngôt. Lơ̆m mơ-ak, plơi pla mơñum tơpai thơ, goong ting ning hơmâo pĕ brơi arăng adoh.

“Lơ̆m dŏ tơdăm hyu ngui dra, juăt djă ba goong ting ning, ƀuh ta djă goong ƀing dra, wơ̆t hăng amĭ ama ñu hok mơ-ak, tơbiă pok amăng, čơkă mut amăng sang či pơhmư̆ goong ting ning, lu mơnuih hmư̆ giong pơhưč pran jua, glưh hơtai boh, hor hmư̆ mơ-ai mơtăm...Jua goong ting ning hmư̆ mơ-ak hloh lơ̆m 9, 10 mông mlăm, lơ̆m plơi pla rơ-et rơ-ot, kret kruai, goong mơñi ataih, hlơi hmư̆ lêng kơ hor soh yơh. Kâo khăp biă kơ goong ting ning, laih anun amra djă pioh răk lui truh kơ djai ba mơtăm”.

Hăng mơnuih kơhnâo Byơh, 64 thun, dŏ ƀơi plơi Pơ Chăk, să H’Ra, tơring glông Mang Yang, tơring čar Gia Lai, goong ting ning mơ̆ng ama, mơ̆ng ayong mut hram amăng drah kơtăk ñu mơ̆ng anet yơh. Lơ̆m kiăo tui amĭ ama nao pơhmua, lơ̆m amĭ ñu ƀă ƀơi rŏng, lơ̆m dŏ pơdơi pơdă...goong ting ning ama, ayong ñu pĕ hmư̆ mơñi wưt wưt, hrŏm hăng tơlơi adoh pơngui čơđai, tơlơi adoh pơkhăp tơdăm dra, mut amăng pran jua ñu. Sit hnun yơh, truh kơ prong, kơhnâo Byơh, jing mơnuih thâo hluh lu biă mă hăng goong ting ning; thâo pơkra, hăng pĕ goong anai. Mơnuih kơhnâo ơi Byơh brơi thâo, pô ñu mă yua goong anai amăng hơdôm pluh thun anai laih:

“Lơ̆m kâo 11 thun kâo thâo pĕ goong ting ning laih, kâo hrăm mơ̆ng ayong kâo. Tơdơi kơ anun, kâo pĕ goong hơmâo arăng bơni mơ-ak hloh kơ ayong kâo dong. rơngiao kơ anun kâo thâo pơkra goong ting ning dong”.

Găn rơgao djŏp rơnuk, hăng djuai ania Bahnar, jua goong ting ning mut amăng drah kơtăk, mut amăng pran jua gơñu laih. Goong anai ngă brơi kơ plơi pla mơ-ak mơ-ai, huăi gleh glar. Tơlơi phara hloh lĕ goong ting ning hơmâo pĕ tui hluai či pĕ yơh, pĕ pơpă tŭ mơn lêng kơ dưi soh yơh, pĕ pơ sang, pơ hmua ƀudah amăng hrơi plơi pla ngui ngor...Yua hnun goong ting ning jê̆ giăm hloh hăng tơlơi hơdip adoh suang mơ̆ng neh met wa djuai ania Bahnar.

Mơnuih kơhnâo rơgơi mơbruă, hor kơ goong brô̆ kah hăng ơi Byơh, ơi Hmôt ăt khăp na nao kơ jua goong, khăp kơ jua mơñu mơ-ak mơ̆ng goong ting ning ơi yă pioh lui. Sit mơnuih kơhnâo kơhnăk anun yơh ngă pô pơtrut pran jua djă pioh, răk lui goong yôm kơ djŏp rơnuk hlăk ai. Mơnuih kơhnâo lêng hơmâo ană plơi pơpŭ, khăp ƀu-eng yua kơ tui anun mơn. Kơhnâo Byơh đăo gơnang goong ting ning mơ̆ng neh met wa djuai ania Bahnar dŏ na nao truh pơdi kơdih anai:

“Goong ting ning ba glăi tơlơi hok mơ-ak kơ djŏp rơnuk laih. Tơdah ƀu hơmâo dong tah jing tơlơi hơdip ƀu mơ-ak dong tah. Tơlơi hơdip hlâo adih ƀu hơmâo goong ghitar, kơnong kơ hơmâo goong ting ning hăng đing t’rưng đôč. Anai lĕ gong brô̆ dŏ hrŏm amăng tơlơi hơdip rim hrơi, ngă mơ-ak pran jua mơnuih djuai ania Bahnar gơmơi. Yua hnun, kâo hơdor na nao tơlơi pơtă pơtăn anun lĕ khŏm djă pioh djuai goong mơ-ak anai”.

Amăng tơlơi hơdip mơ̆ng rơnuk phrâo, goong ting ning ăt ƀu pơčlah đuăi mơn hăng tơlơi hơdip mơnuih djuai ania Bahnar. Lơ̆m goong ting ning mơñi, ngă pran jua ta pơhưč pơhač, tơkai tơngan ayun tui jua goong. Biă ñu amăng hrơi ngui ngor, goong ting ning ba glăi tơlơi mơ-ak mơ-ai hăng ană plơi, ngă kơ abih bang khăp kơ tơlơi hơdip, khăp kơ plơi pla hloh dong./.