Plah wah amăng tơlơi hơdip phrâo mơak ƀơi ƀôn prong Hồ Chí Minh, rim tlam mơmŏt rơnuč rơwang hrơi tơjuh giăm anai, lu tuai rơnguai jar kmar hăng mơnuih ƀôn sang ƀôn prong nao ĕp hăng đing hmư̆ anŏ phara amăng mlam ngui ngor adoh suang. Ƀu djơ̆ anih anom phun sang sĭ mơdrô prong ƀudah ƀơi jơlan rơbat hyu đôč ôh, gơñu ruah mă ƀơi anih dŏ ber amăng sa anih pơdah tơlơi adoh suang hmư̆ jua mơñi phara djă jă gru grua djuai ania Việt Nam, dưi dăp hơdră hăng boh pơhiăp tơlơi bơngač rơnuk phrâo ră anai.

Pơ anai, jua gông đàn tranh, đàn bầu, gông kơni, tơrưng, čing pơtâo ƀudah čing hơgor kual Dap Kơdư hơmâo tơ-ua đĭ ik oăk hăng jua mơñi tơlơi bơngač 3 D rơnuk anai, pơdah brơi mơnuih nao ĕp lăng hăng hmư̆ sa gru grua hiam mơak Việt Nam, mơ̆ng kual gah kơdư trun nao pơ dơnung. Rơbêh 30 mơta djuai gông brô̆ djuai ania hrŏm 12 mơta tơlơi adoh suang rơnuk anai lir hơbit pơdah thâo, pơčrâo brơi gru grua 3 kual amăng dêh čar, pơjing rai anih dŏ ĕp lăng hmư̆ jua mơñi gông brô̆ tơlơi adoh mơak biă mă wơ̆t gủ grua đưm hăng tơlơi adoh suang rơnuk anai.

Anun lĕ, jơlan hơdră tơlơi adoh suang anăn “Kơkuh Show” pơdah ƀơi sang mrô 6 jơlan Nguyễn Siêu, phường Sài Gòn, ƀôn prong Hồ Chí Minh. Nao pơ anun, ƀing tuai, mơnuih ƀôn sang ƀu kơnong hmư̆ jua gông brô̆, čing hơgor adoh suang đôč ôh, dŏ găn rơgao ĕp lăng blơi ƀong djop mơta mơnong ƀong huă gru grua đưm mơ̆ng klâo kual amăng dêh čar mơ̆ng gah Kơdư-kual Tong krah hăng Dơnung. Tơlơi lir hơbit nă hrŏm pơmut lu mơta jua gông brô̆ tơlơi adoh suang anun, kiăng lăi pơthâo râo pơhmư̆ jua mơñi, rup rap hăng mơnong ƀong huă rim tơring, djru kơ rim mlam pơdah tơlơi adoh suang anun jing tal hyu ĕp lăng ngui ngor mơak gru ghrua Việt Nam hăng lu tơlơi mưn amăng pran jua.

Na nao ayuh suang hrŏm tui er tơlơi adoh, jua čing hơgor, ơi Edgar, tuai rai mơ̆ng dêh čar Canada kah pơpha, ñu hyu lu dêh čar, hyu lu anih tuai čuă ngui laih amăng Việt Nam samơ̆ anai lĕ tal blung a ñu hmư̆ hăng lu tơlơi adoh suang gông brô̆ arăng lir hơbit, pơmut hrŏm gru đưm hăng rơnuk anai mut tơma hrŏm mơak biă mă. Ñu lăi, anun lĕ sa tal hyu ngui mơak, tŭ yua biă mă hăng ñu:

“Lăi biă, kâo ƀuh mơak đơi. Kâo ƀu pơmin ôh, jơlan hơdră anai hơmâo pơlir lu mơta djuai gông brô̆ tơlơi adoh suang hrup anun. Tơlơi ngă kơ kâo hor biă mă ñu lĕ hơmâo lu mơta djuai gông brô̆ kâo ƀuh hăng hmư̆ lông ĕp lăng. Hmư̆ lu mơta tơlơi adoh suang sa wơ̆t pơdah, pơmut hrŏm lu mơta jơlan hơdră, kiăng thâo krăn hăng đing hmư̆, mưn amăng pran jua sit mơ̆n tloh noh yơh. Gơnam ƀong huă ăt jơman mơ̆n, hơmâo asơi, añăm, ƀañ tơpung hăng lu mơta mơnong ƀong jơman pơkŏn mơ̆ng Việt Nam”.

Lơ̆m anun, amai Zamanie, tuai mơ̆ng dêh čar Mi, brơi thâo jơlan hơdră anai, rơngiao hăng tơlơi ñu dŏ tơguan lơ̆m ñu ƀuh hăng mưn amăng pran tơlơi lăi pơthâo anŏ hiăm gru grua hăng ană mơnuih Việt Nam, kơnang mơ̆ng tơlơi adoh suang. Tơlơi ngă kơ ñu kơđŏm glăi amăng pran jua kơtang hloh lĕ tơlơi mơak lăng ƀing thâo adoh suang pơdah ƀơi tơrưng adoh suang.

“Kâo thâo rai pơ anai lĕ yua ĕp amăng tơlơi pơhing internet, kâo ƀuh jơlan hơdră lu mơnuih bơni biă mă hăng mơak, anun kâo gir run sem lăng. Ƀuh sit biă mơ̆n, ƀuh jơlan hơdră adoh suang anai hiam mơak biă mă rơngiao hăng tơlơi kâo čang rơmang. Giong ĕp jơlan hơdră anai, kâo ƀuh mơak biă mă, kâo hor biă. Biă mă ñu tơlơi adoh suang, kah hăng pran kơtang mơ̆ng ƀing pơdah adoh suang hăng pĕ gông, raih brô̆ hmư̆ jua gông brô̆ mut tơma hrŏm er jua tơlơi adoh ngă mơak pran jua. Kâo mưn amăng pran jua mơ̆ng jơlan hơdră anai, hrup tơlơi ră ruai glăi hiam klă kơ djop tơring, kual lŏn hăng gru grua phara amăng Việt Nam, pơƀuh tui tơlơi adoh suang pơdah ƀơi tơrưng anih adoh suang”.

Tui hăng ơi Trần Minh Hoàng, Khua wai lăng sĭ mơdrô anăn Čơkă Show ƀudah kơkuh Show, ñu pơmin pơčeh rai hăng akŏ pơjing jơlan hơdră pơdah tơlơi adoh suang tơbiă rai mơ̆ng tơlơi kiăng pơjing rai gơnam sĭ mơdrô kơ tuai hyu ngui phrâo kơ ƀôn prong Hồ Chí Minh. Pơhrua kơ pơdah sa hnơ̆ng tơlơi adoh suang djuai ania kah hăng grup juăt ngă mơ̆ng anai pơ klôn, grup êkip anai dăp hơdră, ruah mă pơjing hơdră pioh ba gru grua hiam Việt Nam truh pơ mơnuih ƀôn sang ĕp lăng hăng hmư̆ ñu mơak biă mă, pơhưč ƀing tuai jar kmar.

“Tơlơi kiăng prong hloh mơ̆ng ƀing gơmơi lĕ bang bơngač jua gông brô̆ adoh suan hăng gru grua Việt Nam truh pơ gơyut gơyâo jar kmar ăt kah hăng ƀing ĕp lăng amăng dêh čar ta pô. Dưi pơphun na nao rim mlam, ƀing gơmơi čang rơmang čơkă Show anai amra jing anih rai ĕp lăng hăng čơkă tŭ anŏ hiam gru grua djuai ania hăng gru grua hiam phara ƀơi ƀôn prong Hồ Chí Minh pioh bơwih brơi kơ tuai rơnguai. Yua kơ anun, ƀing gơmơi ăt pơtong rơđah show anai kah hăng ling jing ba gru grua hiam, djru pơtruh brơi jua mơñi tơlơi adoh suang gông brô̆ mơak biă mă mơ̆ng Việt Nam ta kơ gơyut gơyâo jar kmar”.

Dơ̆ng mơ̆ng ba yua, pơphun jơlan hơdră  adoh suang hăng lu bruă mă gru grua anai lơ̆m blan 3/2025, jơlan hơdră anai hơmâo tŭ mă lu tơlơi bơni hiam mơ̆ng ƀing tuai nao lăng, pơđing hmư̆. Tơ tă anai, Čơkă Show hơmâo čơkă truh 30.000 wơ̆t tuai nao ĕp; amăng anun hơmâo giăm ha mơkrah lĕ tuai mơ̆ng jar kmar.