VOV4.Jarai - Amăng hrơi ngui adôh suang đơ đam dêh čar glăk pơphun ƀơi plơi prong Buôn Ma Thuột, Khul mơnuih pơčeh tơlơi adôh suang Việt Nam gum hrŏm hăng Khul čih boh pia, tơlơi adôh suang tơring čar Dak Lak hơmâo pơphun mông jơnum bơkơtuai Tơlơi adôh suang đưm kual Dap kơdư yua amăng hrơi ngui adôh suang ră anai. Mông jơnum pơhưč lu ƀing thâo adôh suang nao bơkơtuai hơdôm boh tơhnal phun.

Hăng 12 tơlơi pơgôp hiăp hơmâo pơđok amăng mông jơnum, ƀing nao jơnum hơmâo lăi tơpă kiăng kơ hơmâo hơdră pơčeh phrâo hơdôm tơlơi adôh suang lăp djơ̆ hăng tơlơi hơdip ră anai hăng pơpŭ hơdôm tơlơi yôm phara mơng tơlơi adôh suang đưm mơng djop djuai anai kual Dap kơdư. Pô rơgơi pơčeh tơlơi adôh suang Đỗ Hồng Quân, Khua khul mơnuih pơčeh tơlơi adôh suang Việt Nam brơi thâo: Anai lĕ hơdôm boh tơhnal glăk đing nao ră anai hăng hơdôm tơlơi pơgôp hiăp mơng ƀing mơnuih nao jơnum yôm phăn biă mă. Amăng mông jơnum hơmâo wŏt bruă kơsum min hơdôm tơlơi yôm amăng hrơi ngui adôh suang đơ đam dêh čar tal anai.

Siu Đoan: Pơblang