Hơdôm thun laih rơgao, mơnuih ƀôn sang amăng ƀut plơi 6, să Dak Buk So, tơring glông Tuy Đức, tơring čar Dak Nông pơ-ưng ang biă mă yua hơmâo pra yang ơi pơtao Hùng prong rơhaih, jing anih pioh ngă yang. Pra yang ơi pơtao Hùng hơmâo man pơdong mơng thun 2003, hăng đơ đam 250 met karê, yua neh met wa mơng Phú Thọ dŏ hơdip ƀơi să Dak Buk So pơyơr lŏn, pơgôp prăk kak. Ơi Chử Văn Chúc, Khua khul pơphun ngă yang hơdor kơ ơi pơtao Hùng ƀơi anai brơi thâo, hơdôm thun phrâo man pơdong, kơnong mơnuih ƀôn sang amăng să Dak Buk So đôč nao tŭi ñang, ngă yang amăng bơyan ngui ƀong tết, sit biă ñu amăng hrơi huă pơsat ơi pơtao. Tơdơi anun, mơnuih ƀôn sang amăng djop plơi pla amăng tơring čar ăt nao ngă yang hrŏm mơn.

“Abih bang mơnuih ƀôn sang mơng Phú Thọ rai dŏ hơdip, bơwih ƀong ataih mơng plơi pla. Jai ataih ăt jai hning rơngŏt kơ plơi pla mơn. Yua anun neh met wa pơyơr lŏn, pơgôp prăk kak kiăng kơ man pơdong pra yang ngă anih pơpŭ bơni. Ƀing gơmơi tum pơƀut ƀơi anai, ha bơnah lĕ kiăng plai ƀiă hning rơngŏt kơ plơi pla, hăng kiăng ană tơčô tơdơi anai amra tŏ tui bruă ngă yang na nao”.

Hăng kơčong čư̆ Phượng Hoàng gah anih bơwih brơi tuai čuă ngui drai ia Prenn, phường 3, plơi prong Đà Lạt, tơring čar Lâm Đồng ăt hơmâo pra yang ơi pơtao Hùng mơn, hơmâo man pơdong mơng thun 2002, tui rup rap mơng pra yang ơi pơtao Hùng hăng kơčong čư̆ Nghĩa Lĩnh, tơring čar Phú Thọ. Ƀơi anai ăt hơmâo pra yang Lạc Long Quân hăng Âu Cơ, pra yang Trung pioh hơdor kơ ơi pơtao tal tơjuh hăng pra yang Hạ pioh hơdor kơ ơi pơtao rơnuč amăng djop rơnuk ơi pơtao Hùng. Lu wŏt nao huă pơsat ơi pơtao Hùng ƀơi anai, amai Nguyễn Thị Minh Hiếu, dŏ amăng phường 3, plơi prong Đà Lạt brơi thâo:

“Jing sa čô mơnuih dŏ hơdip ƀơi Đà Lạt, rĭm thun kâo lêng kơ hrŏm hăng sang anŏ rai pơ anai kiăng kơ ngă yang hrŏm. Kâo kiăng ană bă dưi pel ĕp gru grua mơng djuai ania Việt Nam, laih dong, ăt hrơi mông kiăng ƀing ta mut hrŏm gru grua mơnuih mơnam kiăng pơgôp lu tui dong gru grua yôm phara djuai ania Việt Nam”.

Hrơi huă pơsat ơi pơtao Hùng ăt pơphun yôm phăn amăng rĭm thun ƀơi anih djă pioh gru grua dêh čar Đình Lạc Giao, plơi prong Buôn Ma Thuột, tơring čar Dak Lak hơmâo tơlơi mut hrŏm mơng khua mua tơring čar, djop gơnong bruă hăng abih bang mơnuih ƀôn sang. Abih bang lêng kơ nao tŭi ñang hơ-ư̆ hơdor, iâu lăi ƀơi pra yang ơi pơtao Hùng. Thun anai, hrơi huă pơsat pơphun yôm phăn amăng 2 hrơi (mơng lơ 9-10 blan 3 tui blan di) hăng lu bruă mă anun lĕ klon ƀañ tek, ngă yang pơpŭ hăng dưm guang bơnga, pơyơr đĭ gơnam kơ ơi pơtao Hùng. Ơi Lại Đức Đại, Kơ-iăng khua gơnong bruă gru grua, bơrơguăt drơi jăn hăng tuai čuă ngui tơring čar Dak Lak brơi thâo:

“Lơm nao huă pơsat ơi pơtao Hùng ƀơi Đình Lạc Giao ƀơi plơi prong Buôn Ma Thuột ƀu djơ̆ kơnong bơdjơ̆ nao huă pơsat đôč ôh ăt lĕ anih pơlir hơbit, gum pơgôp mut hrŏm kơplah wah djip djuai ania. Rĭm thun truh hrơi huă pơsat lơ 10/3, mơnuih ƀôn sang đing nao biă mă hăng nao tŭi ñang, iâu lăi brơi lŏn ia rơnuk rơnua hăng hiam klă, laih dong pơtrut pran gum pơgôp ƀơi pra yang yôm phăn anai”.

 Ăt tui ơi Lại Đức Đại, akŏ bruă man pơdong pra yang ơi pơtao Hùng amăng kual Dap kơdư ƀơi tơring čar Dak Lak yua Jơnum min mơnuih ƀôn sang tơring čar Dak Lak pok pơhai mơ-it nao Ding jum gru grua, bơrơguăt drơi jăn hăng tuai čuă ngui kiăng mơ-it nao Khua dêh čar. Pra yang hơmâo man pơdong tui hơdră gum pơgôp mơnuih mơnam prong rơhaih giăm 20 ektar, hơmâo man pơdong ƀơi kơčong Čư̆ Mblim, să Ea Kao, plơi prong Buôn Ma Thuột hăng să Ea Tiêu, tơring glông Čư̆ Kuin. Bruă man pơdong pra yang ơi pơtao Hùng kiăng pơdah pran hơdor tơngia mơng mơnuih ƀôn sang kual Dap kơdư hăng ƀing mơnuih tuh rơyuh pran jua pơjing hăng wai pơgang lŏn ia. Laih dong, pơhlôm brơi anih ngă yang brơi abih bang mơnuih amăng tơring čar Dak Lak kah hăng hơdôm boh tơring čar kual Dap kơdư.

Pơpă hơmâo mơnuih ƀôn sang Việt Nam dŏ hơdip, ƀơi anun hơmâo pra yang ơi pơtao Hùng. Hơdôm pra yang ơi pơtao Hùng ƀơi kual Dap kơdư jing anih brơi abih bang mơnuih pioh hơdor djop rơnuk ơi pơtao Hùng./.