Hơdôm thun rơgao, hơmâo tơlơi đing nao phara mơ̆ng djop gưl anom bruă, mơnuih ƀôn sang djop anih, truh ră anai, prang yăng Đông Cuông hơmâo man pơdong hiam klă, kơdrưh ang biă mă, rơgoh hơdjă kiăng djă pioh anŏ pơpŭ hiam mơyang, pioh kơ lu tuai rơnguai, mơnuih ƀôn sang  nao čuă hăng bơni biă mă, pioh ngă anih ĕp lăng čuh ñang h'ŭ pơpŭ kơ bơngăt jua. Tơdơi kơ jơnum pôr pơthâo hră pơtrun tŭ yap anih anom gru grua hiam gưl dêh čar hơmâo hơdră adoh suang mơak biă mă hăng akŏ “ Pơpŭ mơyang pô  Mẫu Thượng Ngàn”.

Jơnum ngă yang anai pơphun amăng dua hrơi hăng lu bruă mă yôm kah hăng: Ngă yang čuh kơbao pơyơr kơ khul yang rơbang, ngă yang pơpŭ tơlơi kơhnâo boh pia; ngă yang tơkung grê Mẫu găn ia krông hăng lu bruă mă pơplông pơrơguăt drơi jăn pơkŏn.