Mơng mơguah sing bring, dua rơkơi bơnai ơi K’Tồch dŏ ƀơi plơi Kon Tách Đăng, tơring kual Đinh Văn, tơring glông Lâm Hà, tơring čar Lâm Đồng tơgŭ kiăng kơ prap lui gơnam tam ba ană rơkơi anun lĕ K’Thái glăi pơ sang bơnai ñu lơ̆m phrâo pơdô̆ giong. Djop gơnam hơmâo prap lui hlâo yơh, samơ̆ aka ƀu hơđong amăng pran jua, dua rơkơi bơnai ñu ăt sem lăng glăi sa wŏt dong. Ơi K’Tồch brơi thâo:

‘’Hrơi pơphun ba đah rơkơi glăi pơ sang bơnai ñu kiăng ngă tơdơi kơ hrơi nao bơyai. Ƀing gơñu amra lăi pơthâo hlâo brơi sang anŏ đah kơmơi. Tơdah 2 boh sang anŏ ataih, amra lăi pơthâo brơi sang anŏ đah kơmơi 1 wŏt hrơi tơjuh. Tơdah giăm amra lăi pơthâo hlâo mơng 1, 2 hrơi’’.

Amăng bruă pơdô̆ rơkơi bơnai mơng djuai ania K’ho, lơ̆m sa čô đah kơmơi amoaih sa čô đah rơkơi, ñu amra rơkâo amĭ ama pơkiăo nao gong jơlan nao bơyai brơi rơkơi mơtăm. Lơ̆m anun sang anŏ đah rơkơi amra rơkâo pơnŭ. Lơ̆m dua tơdăm dra anai hor hăng hơmâo dua bơnah sang anŏ tŏ ư kơ bruă pŭ pơnŭ, bruă ngă tui hơdôm tơlơi rơkâo amăng hrơi pơdô̆ rơkơi bơnai lêng gah sang anŏ đah kơmơi glăm ba.

Tơlơi phiăn ba rơkơi glăi pơ sang bơnai juăt pơphun tơdơi kơ hrơi buh kong ha wŏt hrơi tơjuh. Phara hăng hrơi buh kong hơmâo pơphun amăng amăng mơmŏt mlăm, hrơi ba rơkơi glăi pơ sang bơnai pơphun amăng mơguah sing bring. Ơi K’Tồch brơi thâo: Djuai ania K’ho ƀu kiăng ruah hrơi hiam, blan mơ-ak ôh mơ̆ pơsit mă hơdôm hrơi gêh gal hloh kiăng huă bơdjơ̆ nao bruă ngă đang hmua. Hrơi pơdô̆ rơkơi bơnai mơng djuai ania K’ho gơnong nao ƀing gong jơlan yua anun hrơi ba rơkơi glăi pơ sang bơnai ăt yua ƀing gong jơlan pơphun.

‘’Hrơi ba rơkơi glăi pơ sang bơnai, gah sang anŏ đah rơkơi nao hrŏm hơmâo gong jơlan. Ƀing gong jơlan lĕ mơnuih pơphun mông ngă yang ba rơkơi glăi sang bơnai. Nao hrŏm hơmâo wŏt amĭ ama, adơi ayong gah đah rơkơi’’.

Amăng hrơi ba rơkơi glăi, gah sang anŏ đah kơmơi amra prap lui un, mơnŭ, tơpai čeh kiăng kơ ngui mơñum ƀong hrŏm sang anŏ đah rơkơi. Amăng hrơi anun, sang anŏ đah kơmơi čuh 2 drơi un. Tui phiăn juăt, sa drơi amra ƀong huă hrŏm sang anŏ đah rơkơi, 1 drơi amra pơčlah pha, ha ƀong hrŏm hăng sang anŏ đah rơkơi, ha bơnah brơi ƀing gơñu ba glăi, laih dong čuh dring brơi kơ ƀing mơnuih kiăo tui hrơi anai. Tơlơi kiăng hloh lĕ khŏm hơmâo tơpai čeh. Bơ gah sang anŏ đah rơkơi amra hơmâo gơnam kông ngăn brơi đah rơkơi djă ba lơ̆m glăi pơ sang anŏ đah kơmơi.

‘’Amăng hrơi ba rơkơi glăi gah sang anŏ đah rơkơi amra djă ba rêu rô, kiao, abăn, sum ao hăng hơ-i kơčua. Anai lĕ hơdôm gơnam ba nao pơ sang đah kơmơi’’.

Hlâo kơ sang anŏ đah rơkơi mut nao, sang đah kơmơi amra pơphun čơkă sang anŏ đah rơkơi. Sang anŏ đah kơmơi amra dưm hla pơtơi ƀơi bah amăng, laih anun săi ia nao ƀing pơ ala brơi sang anŏ đah rơkơi hăng tơlơi čang rơmang dua rơkơi bơnai phrâo lêng kơ rơnôm, yâo mơ-ak. Lơ̆m mut nao amăng sang, ƀing gơñu hơmâo sang anŏ đah kơmơi čơkă tui phiăn juăt ƀơk brơi añŭ kiăng pơlir 2 kơnong djuai. Ơi K’Tồch brơi thâo:

‘’Sang anŏ đah kơmơi amra čơkă hăng bruă săi ia. Ƀing gơñu dong ƀơi anăp sang, săi ia nao rĭm čô mơnuih mơng sang anŏ đah rơkơi. Ƀing gơñu săi ia nao ƀơi thơi ƀudah đeng tơkai. Laih dong buh brơi añŭ brơi sang anŏ đah rơkơi, juăt lĕ añŭ sô hơđăp. Samơ̆ ƀu djơ̆ hlơi hlơi lêng kơ buh brơi añŭ, tơdah ƀu hơmâo amra jao prăk kak brơi kơ sang anŏ đah rơkơi, samơ̆ ăt ƀu lăng yôm hơdôm ƀơ̆i ôh, anai lĕ kiăng ngă mơ-ak đôč’’.

Lơ̆m mut amăng sang, pô đah rơkơi anai jing mơnuih amăng sang anŏ gah đah kơmơi laih. Lơm anun gong jơlan djă tơngan rơkơi dưm ƀơi tơngan bơnai ñu, pơkôl brơi dua gơñu hăng čang rơmang sang anŏ đah kơmơi lăng ñu kar hăng mơnuih amăng sang anŏ. Hăng pơtă pơtăn kiăng abih pran jua khăp bơnai, bơwih amĭ ama gah đah kơmơi kar hăng sang anŏ pô mơn.Tơdơi anun, 2 boh sang anŏ amra pơsit hrơi pơphun pơdô̆ rơkơi bơnai.

‘’Tui hluai hơmâo mơng sang anŏ đah kơmơi mơ̆ ƀing gơñu amra pơphun hrơi pơdô̆ rơkơi bơnai tơdơi kơ hrơi ba glăi rơkơi pơ sang bơnai mơtăm. Bơ tơdah sang anŏ tơnap tap, amăng hrơi ba glăi rơkơi pơ sang bơnai, ƀing gơñu amra čuh un kiăng kơ ƀong hrŏm hăng sang anŏ đah rơkơi rah, pioh ba glăi rah’’.

Tơdơi kơ pơphun abih hơdôm mông ngă yang čơkă sang anŏ đah rơkơi, sang anŏ đah kơmơi amra brơi sang anŏ đah rơkơi pơnŭ tui tơlơi rơkâo tơdah hơmâo. Bơ tơdah aka ƀu hơmâo pơnŭ, ƀing gơñu amra brơi tơdơi dong. Hrơi ba rơkơi glăi pơ sang bơnai pơđut hĭ hăng mông mơñum ƀong hrŏm. Abih bang mơnuih ngui mơ-ak kiăng dua rơkơi bơnai ñu dưi hơdip yâo mơ-ak na nao.