Hơmâo pơđĭ kyar hluai tui hrơi pơdă prưng bơyan yan kual Dap kơdư hlâo anun, hrơi pơdă prưng rup rap ƀơi tơring čar Dak Lak tal I thun anai hơmâo giăm 90 pok rup mơng rơbêh 40 čô mơnuih amăng tơring čar hăng gah rơngiao. Hơdôm rup rap ba nao tal anai lĕ trah hăng kyâo, pik hăng ia jŭ mriah, hăng bơnal, in mica, rup rap tui boh thâo phrâo.

Rĭm pok rup lêng pơdah anŏ hiam mơng djop mơta bruă amăng tơlơi hơdip mơda, tơlơi hiam mơng lŏn mơnai glai rưng hăn ană mơnuih, pran khăp kơ plơi pla lŏn ia, tơlơi phiăn, gru grua yôm phara mơng djop djuai ania glăk dŏ hơdip ƀơi kual Dap kơdư. Rup rap jê̆ giăm amăng plơi pla ala ƀon amăng hơdôm hrơi ngui ngor, ngă yang rơbang, bruă bơwih ƀong huă ƀudah hơdôm anih hiam pơlir hăng Dak Lak ăt hơmâo ƀing mă rup ruah mă. Trương Nguyễn Hoàng Mai, dŏ ƀơi phương Ea Tam, plơi prong Buôn Ma Thuột ba nao rup pơdă prưng brơi thâo.

‘’Hơdôm rup rap ba nao pơdă prưng ngă kơ kâo ƀuh rơđah tơlơi hơdip mơda ƀơi kual lŏn drơ̆t Dap kơdư, pơhmutu lĕ rup Tlam hăng kơčong čư̆ ƀudah Tơlơi  hiam ƀơi kual Dap kơdư mơng Dương Thị Thúy Hiền, ƀudah rup Pin ia mơng Y Buih, laih dong Tơlơi hiam ƀơi kual Dap kơdư mơng Hoàng Duyên. Rup kâo lăng hiam hloh lĕ Pran khăp kơplah wah ling tơhan hăng mơnuih ƀon sang mơng Phạm Văn Hải. Rup pơdah mơnuih ƀon sang hăt he amăng bơyan yuă hơpuă ƀơi kual Dap kơdư hăng pơdah pran mut hrŏm kơplah wah ling tơhan hăng mơnuih ƀon sang. Hrŏm hăng anun, ƀing mă rup yua ia jŭ mriah pơdah rơđah pran hur har mơ-ak, ngă hơdôm pok rup anai jai hiam tui’’.

Hrŏm hăng ƀing mă rup rơgơi kơhnâo, hrơi pơdă prưng ăt pơhưč ƀing mă rup dŏ hlăk ai samơ̆ rup rap mơng ƀing gơñu ăt pơdah rơđah tơlơi thâo thăi hăng hluh rơđah kơ gru grua, tơlơi hơdip mơda. Laih dong ƀing gơñu ăt hrưn đĭ, khin hơtai pơdah tơlơi pơplih phrâo lơm hyu mă rup. Pô mă rup Y Buih Niê Kđăm (1997) ƀơi plơi prong Buôn Ma Thuột ba nao rup pơdă prưng pik hăng ia jŭ mriah anăn ‘’Kpin Ea’’. Rup anai lĕ pơdah tơlơi jak iâu wai pơgang glai rưng hăng djă pioh gru grua, dưi mă pri A amăng tal pơplông thun anai. Y Buih Niê Kđăm brơi thâo.

‘’Anai lĕ anŏ mơ-ak djă pioh glăi mơng kâo dŏ anet, amĭ kâo hlâo kơ glăi mơng hmua juăt weh nao pơ pin ia kiăng kơ sŏ ia, kiăng kơ mơguah pơgi hơmâo ia mơñum, hơmâo ia ba nao pơ hmua. Ră anai, pin ia ƀơi kual Dap kơdư jai hrơi aset tui. Sa, dua boh plơi pla ƀu dŏ dong tah, kâo kiăng kơ ngă lar hyu tơlơi jak iâu wai lăng pin ia. Anai lĕ sa tơlơi tơnap tap biă mă samơ̆ kâo ăt čang rơmang tơlơi jak iâu kiăng kơ thâo wai lăng anih dŏ hơdip jum dar, kiăng kơ pơhlôm brơi pin ia agaih rơnăk.

Hơmâo pơphun mơng akŏ blan 10 thun anai hăng găn rơgao lu wŏt čom puang, khul pơphun pơdă prưng rup rap tơring čar Dak Lak tal I hơmâo jao pri brơi 14 rup rap hiam hloh, hăng 3 pri A, 3 pri B, 3 pri C hăng 5 pri pơsur pran. Hơdôm rup rap ba nao pơdă prưng lêng kơ dưm ƀơi Sang djă pioh gru grua tơring čar Dak Lak, hơmâo lu mơnuih đing nao hăng tui nao lăng. Thạc sĩ - Pô mă rup Y Nhi Ksor, Khua khul mă rup pơdă prưng brơi thâo.

‘’Hơdôm rup rap anai lêng pơdah gru grua yôm phara, sit biă ñu gru grua yôm phara ƀơi kual Dap kơdư hơmâo lu rup pơdă prưng tal anai. Bơ anŏ hiam, ƀing gơmơi hơmâo ruah 3 pok rup podah gru grua yôm phara mơng kual Dap kơdư rah hăng pơdah tơlơi hiam hloh mơng rup rap. Amăng hơdôm pri prong hloh hơmâo thạc sĩ, lĕ nai pơtô ƀơi sang hră gưl prong pơtô kač rup gơnong glông. Anai lĕ anŏ kâo ƀuh, tơlơi anai hok mơ-ak biă mă. Yua abih bang monuih mă ruptal anai lĕ ƀing mơnuih khăp kơ lŏn ia, plơi pla. Hăng čang rơmang hrơi pơdă prưng tal dua amra pơƀut glăi lu rup rap hiam, yôm ƀiă dong.