Mơnuih djuai ania Bahnar hơdip rơnôm, thâo gum pơgôp nao rai biă, djŏp bruă anet prong amăng plơi pla ƀudah bruă hơjăn amăng sang anŏ, abih bang lêng gum djru ngă hrŏm soh. Pơhmutu amăng tơlơi jik bruă ngă hmua, neh met wa juăt bơblĭu djru nao rai ngă tañ hloh, klă hloh. Amăng mông mă bruă tui anun, tơdah čoh djơ̆ glăi tơkai tơngan pô pơkŏn, ngă kơ pô anun ruă, ƀlĕ drah...tơlơi blung a arăng pơmin lĕ ngă tơlơi phiăn ngui Tơmăr. Ơi Rưm, 49 thun, dŏ ƀơi plơi Kơtu, să kual 3 Kông Chêng (Kon Chêng) tơring glông Mang Yang, tơring čar Gia Lai brơi thâo tơlơi phiăn Tơmăr hơmâo mơnuih djuai ania Bahnar lăng jing bruă rơkâo pap mơñai hiam, brơi thâo ñu ƀu kiăng hơmâo tơlơi ruă ôh, ñu ngă djơ̆ glăi đôč, kiăng pô ruă tan suaih, anăm hil ruă, kĕ phĭ hơget ôh:

“Tơlơi phiăn Tơmăr lĕ tơlơi phiăn rơkâo pap mơñai brơi, kiăng pô mơ̆ ta tek djơ̆ glăi tañ suaih, hiam drơi jăn, huăi duam ruă sui. Pơhmutu lơ̆m mă bruă jik čoh hrŏm, ƀu bưng čoh djơ̆ ƀơi tơkai, ƀơi tơngan, ngă kơ arăng ruă, kiăng pô ruă thâo pap brơi lĕ arăng ngă yang Tơmăr. Phun ñu lĕ kiăng pơƀuh pran jua pap kơ pô ruă yua ta tek djơ̆ glăi, kiăng pô anun huăi djơ̆ djuam duam ruă, huă hil ruă kĕ phĭ hăng ta”.

Tui hăng tha plơi Lick, 66 thun,dŏ ƀơi Plei Piơm, tơring kual Đak Đoa, tơring čar Gia Lai, đưm hlâo, djuai ania Bahnar lăng yôm biă mă hăng tơlơi phiăn Tơmăr, yua ñu djru abih bang thâo gum pơgôp, hơdip hrŏm mơ-ak. Tơlơi phiăn anai ƀu kiăng hơmâo gơnam yôm hơget lơi, samơ̆ khŏm ngă yơh či pơdah pran jua rơkâo arăng pap brơi. Gơnam ngă yang Tơmăr juăt kiăo tui anŏ rơka ruă mơn. Tơdah rơka, ƀlĕ drah lĕ ngă Tơmar hăng čeh tơpai drơi mơnŭ. Tơdah rơka mă ƀiă đôč lĕ rơkâo pap mơñai hăng tơlơi pơhiăp ƀudah djă nao hruh hot, boh mơnŭ...Tơlơi phiăn Tơmăr jing tơlơi phiăn pơgăn hĭ bruă arăng pơjăm nao rai, đŭ wă soh glăi kơ arăng. Hơmâo mơnuih đa ñu lăi ñu duam ruă ƀu thâo suaih lĕ yua pô anai pô adih yơh ngă. Yua hnun, tơdah ƀu ngă yang Tơmăr lĕ gơñu hil ruă, hơdor lui na nao, bơrơdjơ̆ sao, ngă ƀu mơ-ak amăng plơi pla. Tha plơi Lick brơi thâo dong:

“Tơdah ƀu ngă tơlơi phiăn Tơmăr lĕ bruă ta tek djơ̆ glăi ngă kơ arăng ruă ƀu dưi pơsir ôh, laih anun truh pơgi kơdih tơdah duam ruă lĕ arăng jăm yua kơ pô tek djơ̆ klĭ mơng hlâo yơh ngă, pô anun mơtăm yơh glăm ba. Bơ lơ̆m ta ngă laih tơlơi phiăn Tơmăr, tơdơi anai tơdah duam ruă lĕ ƀu bơdjơ̆ nao pô hlơi dong tah”.

Hăng mơnuih djuai ania Bahnar, tơlơi phiăn Tơmăr ƀu kơnong jing rơkâo pap mơñai abih pran jua ƀudah pơgăn bruă arăng jăm ƀuah đŭ wă đôč ôh, tơlơi phiăn anai pơtô brơi abih bang mơnuih thâo pơmin tơdah ngă arăng ruă. Biă ñu pơtă pơtăn kơ abih bang mơnuih ƀu dưi tek klĭ, ngă kơ pô pơkŏn ruă ôh. Ơi Suck, mơnuih thâo hluh kơ tơlơi phiăn hiam djuai ania Bahnar, ră anai glăk dŏ hơdip ƀơi tơring kual Đak Đoa, Gia Lai lăi: Tơdah hơmâo tơlơi truh ta ƀu kiăng mơn, tek djơ̆ ngă arăng ruă hĭ, ta khŏm thâo ñim glăi tơlơi soh, thâo rơkâo arăng pap mơñai brơi, kiăng abih bang mơ-ak, huăi hil ruă nao rai.

“Tơlơi hiam mơng tơlơi phiăn anai lĕ pơtă pơtăn abih bang mơnuih lơ̆m ngă soh, tek djơ̆ arăng, ngă kơ arăng ruă, ta khŏm thâo ñim glăi tơlơi soh, thâo rơkâo pap mơñai brơi kiăng dua bơnah lêng kơ mơ-ak. Wơ̆t tơdah ƀing čơđai lơ̆m ngui, ƀu hơmâo lăng ôh, mơañă djơ̆ pô pơkŏn, amĭ ama hŭi ană bă arăng duam ruă jing gơñu hơmâo tơlơi ngui Tơmăr mơn. Tơlơi phiăn anai ƀu kơnong mă yua lơ̆m tek djơ̆ klĭ, čoh djơ̆ tơkai tơngan arăng đôč ôh mơ̆, tơlơi phiăn anai pơtă brơi abih bang mơnuih thâo hơdip hiam, hơdip hơmâo tơlơi pơmin...”.

Rơnuk anai, tơlơi hơdip pơplih tui laih, jing tơlơi phiăn Tơmăr mơng djuai ania Bahnar ăt kiăng lăng nao mơn. Yua anun lĕ tơlơi phiăn hiam pơtô brơi ta thâo pơhiăp mơ-ak amăng plơi pla. Mơnuih djuai ania Bahnar ƀơi Gia Lai ăt dŏ djă pioh mơn tơlơi phiăn anai kiăng pơtă pơtăn kơ ană tơčô khŏm thâo khăp ƀu-eng nao rai, thâo rơkâo tơlơi pap mơñai, gơgrong ba bruă ta ngă soh, ngă sat kơ tơlơi suaih pral, ngă pô pơkŏn ruă nuă.