Hơdip mơ̆ng anet pơ plơi Pơnang, să Tú An, plơi prong An Khê (Gia Lai), mơ̆ng anet amai Đinh Thị Hà hor kơ ia iŏm, bơnga ƀơi mrai djuai ania Bahnar. Rup sa čô đah kơmơi dŏ ƀơi không mơñam, čaih hrĕ mrai jing tơlơi ƀu thâo kơƀah ôh amăng tơlơi hơdip rim hrơi. Yua hnun yơh ƀing dra djuai ania Bahnar đưm mơ̆ng 15, 16 thun thâo mơñam laih. Amai Đinh Thị Hà brơi thâo, ñu hơdip hăng abăn amĭ ñu ƀă ƀơi rŏng lơ̆m nao pơ hmua, dŏ ƀơi không mrai amĭ ñu mơñam, hăng pran jua hor kơ bruă anai jing ñu thâo mơñam mơ̆ng ñu 15 thun:“Blung a amĭ kâo pơtô brơi kâo mơñam amuñ, tơdơi kơ anun pơtô pơhrua mrai, mơñam mrai truh kơ jruk bơnga, yong bơnga, bơ ră anai kâo thâo mơñam đu đeo yơh anun lĕ mơñam abăn, mơñam eng ao, mơñam ao đah rơkơi, ao đah kơmơi, mơñam tuai...Hlâo adih kâo thâo mơñam tuai, abăn eng, ao, abăn mơsum đôč. Bơ ră anai kâo thâo mơñam lu hloh, hơmâo hlơi blơi lĕ kâo sĭ, samơ̆ pioh yua amăng sang anŏ yơh lu. Mơnuih amăng sang khŏm hơmâo eng ao, abăn mơsum djă lui, tơdah hơmâo ană anet lĕ pioh ƀă ană dong”.

Thun anai ñu rơbêh 40 laih, hăng tơngan rơgơi mơbruă, amai Đinh Thị Hà hơmâo mơñam eng ao hiam biă mă. Kiăng dưi mơñam sa blah abăn eng, sa blah abăn sum rơngiă lu hrơi mông; tui luai kơ eng ao mơn, ƀơi ñu 3 truh 5 hrơi ƀudah ha wơ̆t hrơi tơjuh ƀudah sui hloh hơmâo mơn...Yua dah lơ̆m mơñam rơngiă mông rơngaih, pơhrua mrai, jruk mrai, kơtư̆ yŏng bơnga. Ñu brơi thâo, djuai ania Bahnar juăt mă yua mrai jŭ, mriah, kô̆, mơtah, kơñĭ...hăng bơnga ñu lăi nao glai klô, lŏn adai, kyâo pơtâo, bơnga, hla kyâo. Tơdah mrai jŭ pơ ala kơ lŏn tơnha hiam, ia mriah pơ ala kơ tơlơi pơkhăp, tơlơi kiăng khăp, tơlơi yâo mơ-ak:“Anŏ anai kâo mơñam bơnga prăk kăk, hăng lu bơnga pơkŏn dong, ta hor ngă bơnga hơget lĕ ta ngă yơh. Mơñam eng ao, mơñam abăn mơsum hai hnun mơn, ta kiăng hơmâo bơnga ƀơi hiam lĕ ta ngă yơh”.

Tơdơi kơ glăi mơ̆ng hmua, amai Đinh Thị Hà hơmâo wan dŏ mơñam mrai, mrai ñu mơñam hiam phara mơn. Ñu mơñam eng ao, abăn bơwih brơi tơlơi kiăng mơ̆ng sang anŏ amăng hrơi ngui ngor pơdô̆ rơkơi bơnai. Hơdôm blah eng ao ñu mơñam hơmâo pơdă amăng hrơi jơnum ngui ngor mơ̆ng plơi pla, ngă gru kiăng arăng hrăm tui.

Amai Đinh Thị Hà lăi, hăng lu tơlơi phara, ră anai lu ƀing hlăk ai ƀu hor đơi hăng ƀu thâo hluh đơi ôh gru grua hiam mơ̆ng bruă mơñam mrai Bahnar. Kiăng djă pioh gru ama grua amĭ, ñu lêng pioh mông hrăm tui mơưng ƀing tha hơdôm gru bơnga juăt hơmâo, ñu ăt pơtô glăi kơ ƀing phrâo hrăm mơñam dong. Amai Đinh Thị Hà brơi thâo:“Kâo mơ-ak biă, kâo amuaih hrăm tui pô pơkŏn, kiăng tơdơi anai dưi pơtô glăi kơ ană tơčô, khŏm djă pioh, pơtrut tui gru grua mơ̆ng đưm đă ră hlâo, ƀu dưi wơr lui ôh”.

Sui mơ̆ng anai 6 thun, grup mơñam mrai mơ̆ng să Tú An hơmâo akŏ pơdong. Lơ̆m anun grup mơñam mrai hơmâo 10 čô ding kơna đôč, ră anai hơmâo rơbêh 50 čô dong hăng lu hnưr thun, mơnuih tha hloh rơbêh 80 thun, čơđai hloh lĕ ƀing čơđai hrăm gưl dua. Gơñu gum djru djă pioh gru grua djuai ania.

Phrâo anai, grup mơñam mrai mơ̆ng să Tú An nao jơnum hrŏm Rơwang hrơi tơjuh gru grua - tuai čuă ngui Gia Lai thun 2023 ƀơi plơi prong Pleiku. Ƀing kơhnâo hơmâo mơñam brơi arăng lăng ƀơi Tơdron lăk Đại đoàn kết, pơhưč lu ƀing tuai nao lăng. Ƀing kơhnâo brơi thâo mơ̆ng hrơi bruă mơñam rai hơmâo pơphun glăi, adơi amai mơñam rơguăt hloh laih; hiam hloh mơn, mơñam lu gơnam yua hloh mơn. Ƀing thâo mơñam amăng grup hơmâo jơnum djŏp tơlơi jơnum gưl tơring čar hăng amăng kual Dap Kơdư. Eng ao mơñam mơ̆ng djuai ania Bahnar ƀơi să Tú An jing gơnam hmư̆ hing mơ̆ng plơi, ƀu kơnong djru djă pioh gru grua djuai ania đôč ôh mơ̆ ăt pơƀuh hyu gơnam pioh kơ tuai čuă ngui mơ̆ng plơi prong An Khê, tơring čar Gia Lai,.