Ƀơi mông Jơnum, Kơ-iăng khua Jơnum min mơnuih ƀôn sang tơring čar Dak Lăk ơi Nguyễn Thiên Văn lăi pơthâo kơ tơlơi gêh gal, tơlơi kơjăp kơtang mơ̆ng bruă hyu ngui Dak Lăk. Hmư̆ hing hloh anun lĕ anih hyu ngui jê̆ giăm hăng rơman, bruă ngui ngor pioh kơ ƀing hơmâo hơtai, hyu čuă lăng amăng đang hmua plơi pla sem lăng gru grua djuai ania ƀiă.

Khua anih jưh pơ ala dêh čar India ƀơi ƀôn prong Hồ Chí Minh, ơi Madan Mohan Sethi brơi thâo: Grup bơwih ƀong India glăk hyu čuă jơmư, pơbưp, pơtrut pơsur bruă tuai hyu ngui ƀơi lu tơring čar, ƀôn prong či Vịêt Nam. Ơi Madan Mohan Sethi čang rơmang amra đĭ kyar kơjăp amăng tơlơi rô nao rai plah wah dua boh dêh čar lăi hrŏm, plah wah ala čar Kerala hăng hơdôm boh tơring čar ƀôn prong mơ̆ng dêh čar Việt Nam lăi hơjăn. Ƀrô tal anai, pơ ala kơ 2 bơnah hơmâo kĭ 11 pok hră ngă hrŏm ba tuai hyu ngui hăng đih pơdơi.