Hrơi ngui gru grua djop djuai ania tơring glông Ea Kar thun anai pơphun lu tơlơi ngui ngor anun lĕ ngui adôh suang mơng djuai ania ania; pơplông hơdôm tơlơi ngui sô hơđăp, pơdă prưng hăng nao ƀong huă hơdôm añăm ƀong mơng djop kual; nao pel ĕp gru grua kual Yŭ kơdư, Dap kơdư hăng gru grua mut hrŏm; nao čuă lăng drai ia Y Bar, pơplông čeo song nan hăng song Ka Yak; pơdă prưng hăng sĭ gơnam hiam hơdjă, gơnam OCOP mơng ƀon lan.

Hrŏm hăng jua čin hơgor mơng djuai ania Êđê, gông tính adôh then mơng djuai ania Tày-Nùng, tơlơi adôh quan họ Bắc Ninh, laih dong lĕ hơdôm tơlơi ngui yôm phara mơng djop djuai ania anun lĕ glom boh, bê bơnuh, hro rơk, đĭ wŏt nao rai, gôm mơta mă bip. Anai lĕ thun tal 3 tơring glông Ea Kar pơphun hrơi ngui gru grua djop djuai ania tơring glông, ƀu djơ̆ kơnong hrơi ngui ngor ngă mơ-ak pran jua brơi mơnuih ƀôn sang hăng tuai čuă ngui đôč ôh mơ̆ ăt pơgôp lăi pơthâo rup rap ană mơnuih, anŏ hiam mơng gru grua djop djuai ania.