Yă Lê Thị Trúc Linh, Kơ-iăng khua gơnong bruă gru grua-bơrơguăt drơi jăn hăng tuai čuă ngui tơring čar Dak Nông brơi thâo, ƀrô tal hơdor glăi 20 thun akŏ pơjing glăi, him lăng tuai nao čuă ngui pơ tơring čar anai amra lu biă mă. Gơnong bruă hrŏm hăng Jơnum min mơnuih ƀôn sang hơdôm boh tơring glông pơphun pel ĕp ƀơi hơdôm sang jưh tuai kơ bruă prap lui anih dŏ, laih dong rơkâo pơplih, pơkra ming djop mơta kiăng kơ pơhlôm brơi klă hloh.

Tui anun, amăng plơi prong Gia Nghĩa hăng hơdôm boh tơring glông jum dar anun lĕ Dak Glong, Dak R’lấp, Dak Song, Dak Mil, hơmâo giăm 200 sang jưh tuai amra pơhlôm brơi anih dŏ kơ rơbêh 7.100 čô tuai ha hrơi. Hrŏm hăng anun, hơdôm boh tơring glông phun amăng hơdôm tuor čuă ngui pơ kual lŏn dron rŏng lŏn tơnah UNESCO Dak Nông anun lĕ Krông Nô, Dak Glong, Čư̆ Jut, hơdôm sang jưh tuai ăt hơmâo pơkra ming prap čơkă tuai čuă ngui. Ƀrô tal anai, tuai čuă ngui dưi hyu pel ĕp tơlơi hơdip, gru grua, gơnam ƀong mơng mơnuih djuai ania ƀiă ƀơi tơring čar Dak Nông ƀơi hơdôm boh plơi pla tuai čuă ngui.