Amăng hrơi blan adai bơyan puih rơ-ot hlet juăt hơmâo, kual Dap Kơdư čư̆ siăng Măng Đen hiam rô̆, kơthul gôm, kơnam pưh laih anun bơnga čuh ia iom hiam ƀhêm ƀham amăng djop lŏn tơdron. Adai rơ-ơ̆ rơ-iơ̆m, rơgoh hơdjă, ngă pơhưč hloh bơnga čuh blang, pơjing rai anih nao ngui lăng hyu hiam rô̆ tơpuh bơnga blang, anih ngui ngor jơngum, ngă pơđao pran jua, ngă pơhưč pran jua mơ̆ng hơdôm hrơi blung a amăng akŏ thun phrâo.

Măng Đen mơ̆ng sui laih hmư̆ hing arăng pơhmu kah hăng “Plơi hiam mơtah mơda”, anih arăng nao ngui bưp nao rai, kah hăng bơngăt jua mơ̆ng glai klô mut tơma hrŏm hăng tơlơi hơdip mơda rơnang blang mơak mơai. Thun 2025, Măng Đen ăt pơsit anăn păn hmư̆ hing, pơhưč ƀing tuai nao ngui lu hloh mơ̆ng Việt Nam, lơ̆m hơmâo čơkă truh 2 klăk wơ̆t tuai, amăng mrô 5 klăk wơ̆t tuai nao pơ tơring čar Quảng Ngãi, pơgôp hrŏm yom biă mă hăng rơnoh prăk pơhrui glăi mơ̆ng bruă tuai hyu ngui rơbêh 3.700 klai prăk amăng đơ đam tơring čar.

Ƀơi mông jơnum Rơwang hrơi tơjuh Gru grua-Tuai čuă ngui Măng Đen thun 2026, yă Y Ngok, Kơ-iăng khua Jơnum min mơnuih ƀôn sang tơring čar Quảng Ngãi, brơi thâo, tơring čar hlăk ƀuăn ngă giong tơlơi pơkă, pơblih mơak kơ anih tuh pơ alin bruă čơkă tuai hyu ngui; mă yua tŭ yua hloh anŏ hơmâo laih amăng glai klô, khut khăt kiăng man pơdong Măng Đen jing anih tuai nao ngui hiam hloh, lăng lŏn mơnai glai klô, anih pơdơi pơdă hiam rô̆ hmư̆ hing yom pơmă, pơđĭ kyar hơđong kơjăp, lăp hăng anih pơ anăn  boh pơtâo priă kơ kual hăng ƀơi jar kmar hmư̆ hing nao.

“Măng Đen ră anai ƀu kơnong sa anih hyu ngui hơjăn ôh jing anih dưi pơtruh nao rai, pơtum lu bruă, lu anih lir hơbit hyu ngui lăng lŏn glai, kyâo pơtâo hăng trun pơ kual ia rơsĭ tơring čar Quảng Ngãi phrâo. Pơtruh nao rai anŏ adai rơ-ot mơ̆ng čư̆ siăng glai klô Măng Đen hăng angin rơbŭ trun pơ anih ia mơsin ia rơsĭ bul pơtâo Lý Sơn, Mỹ Khê; pơtruh nao rai anih anom gru grua hiam čing hơgor hing ang laih anun kông ngăn gru grua Sa Huỳnh”.

Jơlan hơdră tơlơi adoh suang dưi dăp pơkra pioh pơdah lu črăn, ngă hiam hăng kah pơpha jing 3 črăn: “Anih lŏn adai pơhlai hrŏm” “Mơnâo hiam ia iom bơnga blang čư̆ siăng” laih anun “Pơkong tơkai ƀu her đuăi kual bơrơpơi hiam”. Lu črăn tơlơi adoh suang hiam mơak biă mă kah hăng Tơlơi akhan glăi Măng Đen, Bơnga Đào Măng Đen hiam tloh noh, Tơlơi adoh bơni kơ Măng Đen, Mlam mơak ik ăk jua čing hơgor, Jơlah apui kual Dap Kơdư…..hơmâo pơhrôp glăi tơlơi hiam rô̆ lŏn mơnai glai klô, čư̆ siăng, gru grua hiam hăng ană mơnuih ƀơi Măng Đen, ba nao kơ ƀing tuai sa hơdră ngă pơhưč pran jua ƀuh čư̆ siăng lŏn glai hiam rô̆.

Ơi Dương Tấn Nhựt, mơnuih ƀôn sang mơ̆ng anih gong gai wai lăng phara Lý Sơn, tơring čar Quảng Ngãi nao ngui pơ Măng Đen pơƀuh amăng pran jua:

“Ƀrô amăng mông ngui ngor mơak djơh hăng anai, akŏ thun phrâo, kâo sem jơlan hơdră tơlơi adoh mơak biă mă. Mơ̆ng anun, bang hyu tơlơi hiam, jua mơñi mơak pơtrut tui gru grua hiam, tuai čuă ngui kơ tơring čar Quảng Ngãi. Quảng Ngãi hăng Kon Tum phrâo mut hrŏm, anun mơnuih ƀôn sang ăt gêh găl hrăm nao rai, tơlơi adoh suang gru grua kual Ngŏ hăng kual Yŭ tơring čar Quảng Ngãi”.

Guang hrơi tơjuh pơphun ngui ngor gru grua tuai čuă ngui Măng Đen akŏ thun 2026 hăng lu bruă mă hiam mơak biă mă kah hăng: Ngui ngor pơpor kơdung blung prong khinh khí cầu ƀơi adai rơngit, jơlan hơdră adoh suang “Măng Đen hrơi phrâo”, pơdă gơnam sĭ mơdrô mơnong ƀong huă OCOP, pơdă sang čơ gơnam tam boh troh đang hmua hăng jrao akha kyâo, lu bruă ngă pơrơguăt drơi jăn, ngui ngor mơak pơsuh pran jua, dŏ glăi, găn rơgao hăng hyu tui tuôr tuai  ĕp lăng amăng lŏn glai, đang hmua, plơi pla, pơhưč pran jua ƀing tuai hor biă mă hyu lăng, ƀu her đuăi mơ̆ng kual lŏn Dap Kơdư Măng Đen.