VOV4.Jarai - Dŏ ƀiă hrơi laih, Jơnum prong pơplông bơkơjăp drơi jăn Đông Nam Á tal 31 (SEA Games 31) sit nik pơphun. SEA Games tal anai hơmâo pơphun pơ Hà Nội, hăng 11 boh tơring čar, ƀon prong giăm anun hơmâo rơbêh 7.800 čô mơnuih nao pơplông, ƀing nai pơtô bơkơjăp drơi jăn, ƀing khua mơng 11 khul grup bơkơjăp drơi jăn mơng hơdôm boh dêh čar amăng kual. Plơi prong jưh jom Hà Nội jing anih phun, pơphun ngă lơphet pok pơphun tơlơi pơplông, pơđut 18 mơta tơlơi pơplông ƀơi 14 anih, yua hnun, bruă prăp rơmet hơmâo ngă ječ ameč, hơmâo ngă giong laih, dưi čơkă mông jơnum prong anai yơh. Ƀơi Bắc Giang, Sang pơplông bơkơjăp drơi jăn tơring čar hơmâo prăp rơmet giong mơn kơ hrơi pơplông pah blâu mơnŭ SAE Games 31 mơng lơ 16 truh 22/5. Ƀơi Hải Dương, pah peng pong hơmâo pơphun ƀơi Sang pơplông bơkơjăp drơi jăn Hải Dương mơng lơ 13 truh lơ 20/5. Tơring čar prăp lui prăk kăk năng ai 10 klai prăk pơhrua, pơkra ming anih anom, gơnam yua amăng sang pơplông. Ƀơi tơring čar Hòa Bình, bruă prăp rơmet tơlơi pơplông juă rơdêh tang wang SAE Games 31 hơmâo ngă giong mơn. Biă ñu, ƀơi Phú Thọ, Sang pơplông tơring čar hơmâo prăp lui laih bruă pơplông đă boh lông U23+3 SEA Games 31.

Siu H’Mai: Pơblang