30 thun rơgao, hơdôm mơnuih pôr pơhing VOV ƀơi Dap Kơdư sit nik jing hơdôm mơnuih ba jơlan hlâo amăng tơlơi pơmin bôh thâo; ngă klă bruă jao čih tơlơi pơhing hơkrŭ: jing pô pôr pơhing tơlơi pơtrun, jơlan gah mơ̆ng Ping gah, hơdră bruă hăng tơlơi phiăn mơ̆ng Kơnuk kơna. Lăi pơhing tañ – djơ̆, hmao tlôn. Hrŏm hăng anun lăi đĭ, hơngah hmâo pran ngă đăo pran jua, hơdôm tơlơi pơmin ƀu djơ̆, lăi pơdah djop tơlơi jŭ sat ngă pơplih tơlơi rơnuk rơnua, djru yôm phăn amăng tơlơi pơđĭ kyar mơng Dap Kơdư. Ơi Điểu Dũng ƀơi să Dak Ndrung, tơring glông Dak Song, tơring čar Dak Nông lăi:

 “Jơlan hơdră pơtui jua pơhiăp hăng tơlơi Bơnông klă biă, neh wa hor hmư̆ biă. Jơlan hơdră jai hrơi lu mơta, jơlan hơdră ngă đang hmua pơtô neh wa hơdră bơwih brơi kơ phun pla. Lăi pơhing kơ hơdră bruă mơ̆ng Ping gah hăng kơnuk kơna truh hăng neh wa. Kâo čang rơmang jơlan hơdră tơlơi Bơnông djă pioh glông pôr pơhing hơdôm jơlan hơdră kơ pơtă ană tơčô hrăm hră, hơdră pla tiu kơphê... neh wa hor hmư̆ biă”.

Yă Ka Lót (djuai ania K’ho Mạ) ƀơi să Lộc Bắc, tơring glông Bảo Lâm, tơring čar Lâm Đồng lĕ sa mơnuih hor hmư̆ Gong phun jua pơhiăp dêh čar Việt Nam pơtui hăng tơlơi K’ho. Hmư̆ hơdôm jơlan hơdră tơlơi adôh đưm, hăng tơlơi djuai ania pô, yă Ka Lót lăng ƀuh ol kơdol pran jua biă. Hăng mơnuih mă bruă ƀơi anai, ñu ƀuh rơđah bruă mă yôm phăn mơ̆ng bôh pơhiăp djuai ania pô ƀu djơ̆ kơnong kơ amăng tơlơi pơhiăp nao rai rim hrơi ôh mơ̆, amăng bruă mă rim hrơi tui anun mơn. Gơnang kơ na nao hmư̆ jơlan hơdră pơtui jua pơhiăp tơlơi K’ho mơ̆ng Gong phun jua pơhiăp dêh čar Việt Nam mơ̆ yă Ka Lót hơkrŭ đĭ dong bôh thâo phiăn juăt mơng djuai ania pô.

 “Drơi pô kâo hor hmư̆ biă hơdôm tơlơi adôh long, adôh tơlơi adôh đưm djuai ania pô, samơ̆ drơi pô kâo pơhiăp ƀu hreč hăng ƀu thâo adôh tơlơi adôh đưm ôh... drơi pô lĕ sa mơnuih hor hmư̆ radio. Ping gah, Kơnuk kơna hmâo đing nao laih ba jua pơhiăp tơlơi djuai ania H'ko Mạ amăng glông pơtui jua pơhiăp kâo mơ-ak biă".

Ơi Ha Hiếu (djuai ania K’ho) mă bruă ƀơi Anom bôh thâo pơhing hăng bơkơjăp drơi jăn tơring glông Đam Rông, tơring čar Lâm Đồng brơi thâo, ñu ngă rah mơnuih hyu mă tơlơi pơhing phrâo, dăp hơdră, pơblang hăng pơtui jua pơhiăp tơlơi K’ho rah. Rơngiao kơ bruă čih dăp hơdră jơlan hơdră ƀơi anom bruă, Gong phun pơtui jua pơhiăp hăng pơdah rup tơring glông dô̆ tŭ mă jơlan hơdră mơ̆ng Gong phun pơtui jua pơhiăp hăng pơdah rup tơring čar Lâm Đồng hăng Jơlan hơdră K’ho mơ̆ng Gong phun jua pơhiăp dêh čar Việt Nam yua kơ Ƀirô mă bruă ƀơi Dap Kơ̆dư čih dăp hơdră. Gơnang kơ anun, neh wa djuai ania K’ho ƀơi tơring glông kual asuek Đam Rông tŭ mă tơlơi pơhing lu mơta hăng sit nik biă.

 “Hlâo adih kâo mă bruă ƀơi Anom bruă tơring glông, tơdơi kơ anun nao mă bruă ƀơi anom bruă djuai ania. Truh rơnuč thun 2018 kâo nao mă bruă ƀơi Gong phun pơtui jua pơhiăp hăng pơdah rup Đam Rông. Bruă mă rim hrơi mơ̆ng kâo lĕ pơblang mơ̆ng tơlơi Yuan jing tơlơi K’ho. Tơdơi kơ anun ngă tui pơtui jua pơhiăp tơlơi djuai ania K’ho. Hơdôm črăn hơdră pơtui ƀơi anai bơdjơ̆ nao bruă čih pơkra, pơđĭ kyar bơwih ƀong huă sang anô̆, tơlơi pơgang anih anom dô̆ ƀơi plơi pla, tơlơi hrăm hră mơ̆ng čơđai sang hră ƀơi anai”.

30 thun rơgao, Ƀirô mă bruă ƀơi Dap Kơdư hmâo yak rơgao drơi pô kiăng ngă giong prong bruă jao. Hluai tui bruă lăi đĭ, pôr pơhing tum djop, hmao tlôn dơlăm prong, djơ̆ jơlan gah hơdôm bruă kơđi čar, bơwih ƀong mơnuih mơnam, rơnuk rơnua lŏn ia hmâo amăng abih bang kual truh hăng mơnuih hmư̆, lăng hăng pơđok amăng dêh čar hăng dêh čar tač rơngiao. Ƀirô mă bruă ƀơi Dap Kơdư hmâo djru klă laih kơ bruă kơtưn ba glăi bôh tơhnal kơ bruă pơdŏng pran gum hrŏm hơbit abih bang mơnuih ƀôn sang, bruă pơđĭ kyar đĭ dlông mơ̆ng kual Dap Kơdư./.