VOV4.Jarai -  Tơlơi pơhing mơng Gơnong bruă ia jrao Hà Nội brơi thâo, yang hrơi dŏng lơ 6/10, ƀơi ƀôn prong čih hmâo 6 čô mơnuih ƀă kơman klin Sars-CoV-2 leng kơ kual guang dar hăng gah ƀut mơnuih bơdjơ̆ nao Sang ia jrao Giăng mah Việt Đức. Tui anun, tơdơi kơ 6 hrơi pơphum truh ră anai hmâo giăm truh 50 čô mơnuih bơdjơ̆ nao Sang ia jrao Việt Đức ƀă kơman Sars-CoV-2. Bôh tơhnal mă ia adung pơčrang lăng, gơnong bruă ia jrao hmâo mă laih 18.168 čơđeh ia adung, amăng anun hmâo 17.988 čơđeh ia adung hmâo bôh tơhnal pơčrang lăng, thâo krăn 40 čô mơnuih ƀă kơman klin, anun lĕ 13 čô mơnuih nao wai lăng mơnuih ruă; 19 čô mơnuih ruă glăk dô̆ pơjrao ƀơi sang ia jrao; 6 čô mơnuih mă bruă ƀơi sang ia jrao hăng 2 čô mơnuih bơdjơ̆ nao pơkon./.

Siu H’ Prăk: Pô pơblang