VOV4.Jarai - Khua git gai Ping gah ƀon prong Hà Nội ơi Đinh Tiến Dũng brơi thâo, Anom bruă ia jrao plơi prong jưh jom hơmâo pơhlôm 1.600 anih pơtruh nao rai tlâ̆o vaccine, dưi tlâ̆o năng ai 500.000 arăt jrao/hrơi. Giăm 8.000 čô ơi ia jrao, mơnuih mă ia khak, mơnuih ngă bruă gah măi mok, čơđai sang hră gưl prong hơmâo iâu nao djru, rai mơng 12 boh tơring čar, ƀon prong djru kơ Plơi prong jưh jom. Yua hơmâo mơnuih mă bruă anai, hơdôm anih tlâ̆o pơgang hơmâo mă bruă kơtang hloh. Hơdôm anih tlâ̆o pơgang lêng hơmâo ơi ia jrao djru pơjrao lơ̆m ruă kraih, hơdôm grup djru mơnuih ruă kơtang đuăi nao rai pơhlôm rơnuk rơnua kơ mơnuih ƀon sang.

Khua git gai ping gah ƀon prong Hà Nội ơi Đinh Tiến Dũng đăo gơnang Hà Nội dưi pơgăn klin.

Hăng tơlơi ngă bruă hơdeč tui anai, truh lơ 15/9, Hà Nội hơmâo ngă giong 100% čô mơnuih mơng 18 thun truh kơ tha hloh hơmâo tlâ̆o ƀiă hloh lĕ sa arăt jrao vaccine pơgang Covid-19. Khua git gai Ping gah ƀon prong Hà Nội ơi Đinh Tiến Dũng kiăng djŏp gưl, anom bruă ngă hrŏm klă hloh hăng Anom bruă ia jrao, hơdôm khul grup mơng tơring čar, ƀon prong; ngă bruă hơdeč hmar amăng rim mơnit mông, đah mơng ngă giong bruă tlâ̆o pơgang klă, tŭ yua.

Siu H’Mai: Pơblang