VOV4.Jarai - Amăng hơdôm thun rơgao, hlăk ai tơring čar Daklak hmâo gum hrom hăng Jơlan hơdră pơdŏng plơi pla phrâo hăng lu bruă mă sit nik. Ră anai, hlăk ai tơring čar glăk pơtrut kơtang bruă pla kyâu pơgang dlai klô, ba tơbiă tơhnal pơkă pla phrâo 120 ƀĕ phun kyâu – anăp nao tơlơi iâu pơthưr pla 1 klai ƀĕ phun kyâu mơng Khua dêh čar. Hrom hăng anun lĕ lu bruă mă pơgang dlai klô, anih anom dô̆, djru pơdŏng plơi pla phrâo.

Amăng hơdôm bruă mă Hrơi tơjuh mơtah phrâo pơphun, Khul hlăk ai tơring glông Čư̆ Mgar hmâo gum hrom hăng Jơnum min mơnuih ƀôn sang tơring kual Quảng Phú hăng Chùa Hoa Nghiêm pok pơhai jơlan hơdră “Klăk phun kyâu mơtah – Yua kơ sa Việt Nam mơtah”. Hrom hăng hyu lăi pơhing iâu pơthưr mơnuih ƀôn sang gum tơngan hrom pơgang, bơwih brơi hăng pơlar phun pla, hơkrŭ glăi dlai kyâu gah hlâo, hlăk ai amăng đơ đam tơring glông ăt ha amăng plĕ pơphun rơmet agaih anih anom dô\, jah agaih mrok, kuăi huĕt đing hnoh pơđoh ia hơdôm glông jơlan hăng pla phrâo hơdôm rơtuh ƀĕ phun kyâu mơtah. Ayong Y Wal Mlô, Khua git gai Khul hlăk ai tơring glông Čư̆ Mgar brơi thâo, khă bơbeč nao mơng klin Covid-19 ngă hơdôm bruă mă khom pok pơhai hyu raih daih, samơ̆ đơ đam tơring glông hmâo pla phrâo laih giăm truh 14.600 ƀĕ phun kyâu mơtah djop mơta.

“Amăng hơdôm hrơi rơgao ăt iâu pơthưr mơn abih bang ƀing gơyut amăng khul hlăk ai, tơdăm dra amăng tơring glông pơdah bruă mă, bruă gơgrong mơng pô amăng pơgang anih anom dô̆ hăng bruă mă rơđah rơđông, sit nik. Amăng anun ƀing gơmơi pơphun rim mơnuih amăng khul hlăk ai, tơdăm dra, rim mơnuih amăng grŭp mă bruă khul gưl plơi pla hăng gưl tơring glông pla hăng bơwih brơi ƀiă biă mă ñu 1 ƀĕ phun kyâu mơtah kiăng, sa lĕ lar hyu jơlan hơdră pla 1 klai ƀĕ phun kyâu mơng Kơnuk kơna, dua lĕ lar hyu tơlơi pơmin kơ pơgang dlai klô amăng ƀing gơyut amăng khul hlăk ai tơdăm dra hăng mơnuih ƀôn sang”.

Hlăk ai Daklak pla laih 60.000 ƀĕ phun kyâu amăng thun anai

Đơ đam tơring čar Daklak, amăng thun anai, khul hlăk ai hmâo ba tơbiă amra pla phrâo 120 ƀĕ phun kyâu. Hơdôm gưl khul hlăk ai hmâo laih hơdôm bruă mă pha ra kiăng pơhlôm tơhnal bruă ba tơbiă hăng hơdôm phun kyâu dưi pla leng kơ hơdip hăng bluh đĭ hiam klă. Ayong Nguyễn Văn Hà, Khua git gai Khul hlăk ai tơring glông Krông Pač lăi kơ hơdră ngă mơng hlăk ai tơring glông.

“Jao kơ hơdôm khul grŭp hlăk ai gơgrong kiăng pơkĕ hăng bruă pla hăng pơkôl bơwih brơi, pơgang ba. Hrom hăng anun pok pơhai kơ sui thun lĕ ƀing gơmơi glăk hmâo rơwang bruă pơphun rim mơnuih apăn bruă, mơnuih amăng khul hlăk ai tơdăm ngek dra muai sa ƀĕ phun kyâu kiăng gum hrom pla hăng bơwih brơi, pơgang, pơjing rai hơdôm phun kyâu mơtah, agaih, hiam hăng biă ñu pơkĕ hăng anun lĕ pơgang anih anom dô̆”.

Hrom hăng bruă pla kyâu, hlăk ai Daklak hmâo hăng glăk ngă tui bruă mă, bruă gơgrong mơng pô amăng pơgang dlai klô anih dô̆ mơng plơi prong truh pơ̆ plơi pla. Hlăk ai hơdôm anih anom amăng tơring čar leng kơ hmâo lu bruă mă pơčeh phrâo, ba glăi bôh tŭ yua sit nik. Bơhmu tu ñu kah hăng Khul hlăk ai tơring glông Čư̆ Mgar hmâo pok pơhai laih Rơwang bruă “Kač rŭp lăi pơthâo glăi jơlan plơi prong – Gru grua Dăp Kơdư” kiăng pơplih pơkra anih anom dô̆ amăng tơring glông, sut lui hơdôm “anih jŭ” kơ djah tuh, hrom hăng anun pơđĭ tui tơlơi pơmin kơ pơgang anih anom dô̆ mơng mơnuih ƀôn sang. Rơwang bruă hmâo hơdôm bôh yôm: kač rŭp 3D hăng 30 pok rŭp hmâo anăn “Hơkrŭ glăi phun kyâu” ƀơi Sang hră wai lăng čơđai anet Hoa Hồng, tơring kual Quảng Phú; ngă bơngač 150 ƀĕ tơmeh gong apui, kơnŏp amăng luh ga ƀơi anih hmâo lu mơnuih jưh amăng tơring glông. Ƀơi plơi prong Buôn Ma Thuột, Khul hlăk ai phường Thống Nhất hmâo ngă tui laih ring bruă “Đang bơnga hlăk ai” kiăng sut lui tơlơi djah tuh ča čot, djru ngă klă anih anom dô̆. Tơdơi kơ ring bruă “Đang bơnga hlăk ai” dưi ngă tui, pơplih anih tuh djah hlâo adih jing sa kual bă kơ phun kyâu, hăng lu djuai bơnga pha ra bluh rai bơnga hiam. Hrom hăng anun Khul hlăk ai phường dô̆ pơdŏng hơdôm bôk bơnga pơkra mă mơng djah glom lui, kač rŭp lăi nao bruă pơgang anih anom dô̆... pơjing anih anom klă hiam, agaih hơdjă, ngă mơnuih ƀôn sang jum dar kual ƀuh mơ-ak pran jua biă.

Ayong Y Lê Pas Tơr, Kơ-iăng Khua git gai Khul hlăk ai tơring čar Daklak brơi thâo, bruă pơgang anih anom dô̆ lăi hrom, gum hrom pơdŏng plơi pla phrâo lăi ha jăn lĕ bruă mă mơng mơnuih amăng khul hlăk ai – tơdăm dra. Rim thun, khul hlăk ai tơring čar leng kơ hmâo tơhnal ba tơbiă rơđah hăng hmâo tơlơi pơsit glăi rơnuč thun kơ pla phrâo hăng bơwih brơi phun kyâu. Biă ñu thun anai tơhnal ba tơbiă dưi pơđĭ tui prong hloh hơdôm thun hlâo adih. Bruă pla hăng bơwih brơi phun kyâu dưi hmâo hơdôm bôh anom pok pơhai tơpă, mơng akô̆ thun truh ră anai hmâo pla phrâo laih rơbêh kơ 60 rơbâo phun kyâu djop mơta, biă ñu phun kyâu pla hyu raih daih.

“Kiăng pla hăng mrô lu lĕ khom hmâo lŏn pla hơđong hăng khom ngă lu hră pơ-ar bơdjơ̆ nao truh bruă pla kyâu, pla djop mơta phun pla kiăng hiam. Ră anai hơdôm gưl khul hlăk ai rơngiao kơ sa dua anih anom pla prong lĕ lu ñu ƀing gơyut pla amăng đang bơnga, pla kyâu kơtuai jơlan, pla amăng hơdôm anih anom mă bruă, ƀơi anăp anom mă bruă, amăng đang bơnga. Mơng ră anai truh thun 2022, truh abih rơwang bruă anai amra gir run lăi pơthâo, kơsem min hăng pel ĕp lăng kiăng pla ƀiă biă mă ñu 1 kual dlai kyâu kiăng hiam anih anom dô̆”.

Rơmet agaih klă hơdôm ară jơlan amăng plơi pla, să  

Ăt tui hăng ayong Y Lê PasTơr mơn, kiăng hơdôm rơwang bruă pla hăng bơwih brơi phun pla ba glăi bôh tơhnal, kiăng biă tơlơi tŭ ư hrom mơng gưl ping gah, gong gai hăng tơlơi gum tơngan hrom djru pran mơng mơnuih ƀôn sang ăt kah hăng tơlơi gum hrom mơng khul grŭp, rim mơnuih. Ƀu djơ̆ kơnong kơ gum pran ngă giong tơhnal ba tơbiă 1 klai phun kyâu mơng kơnuk kơna ôh mơ̆, bruă pla kyâu dô̆ djru pơgang anih anom dô̆, ngă klă hiam hloh anih anom jum dar hăng bŏng glăi hăng pơplih ayuh hyiăng, pơđĭ tui tơlơi pơmin mơng mơnuih ƀôn sang, biă ñu rơnuk hlăk ai amăng bruă pơgang anih anom dô̆ hăng hơdôm kông ngăn dlai klô./.

H’ Xíu: Pô čih – Siu H’ Prăk: Pô pơblang