VOV4.Jarai - Blan hlăk ai thun anai, Grup hlăk ai Kông ti apui lơtrik Dak Lak hơmâo ngă lu bruă djru mơnuih ƀon sang, kah hăng pơkra apui tŭi rơđah jơlan nao rai, brơi prăk apah čơđai sang hră sang anŏ rin mơ̆ hrăm rơgơi. Hơdôm bruă ngă hiam tui anai jai hrơi hơmâo hmư̆ hing, bang hyu djŏp anih, hơmâo lu hlăk ai mơng djŏp anom bruă, plơi pla amăng tơring čar Dak Lak gum ngă tom.

Ƀrô hrơi ngă lơphet akŏ pơjing Khul hlăk ai mut phung Hồ Chí Minh lơ 26/3 phrâo rơgao, hơdôm rơtuh čô čơđai sang hră gưl sa Nguyễn Đức Cảnh, să Ea Ktur, tơring glông Čư̆ Kuin hur har pran jua gum bruă pôr pơhing rơnuk rơnua apui lơtrik hăng gum pơđĭ pran jua čơđai hrăm hră yua hlăk ai kông ti apui lơtrik Dak Lak pơphun. Ƀơi anai, grup hlăk ai hơmâo brơi 20 anung gơnam, hơmâo nua 10 klăk prăk kơ ƀing čơđai sang anŏ rin hrăm rơgơi. Biă ñu, grup hơmâo brơi 1 anung prăk hơmâo nua 25 klăk 200 rơbâo prăk kơ adơi H’Mrin Byă, djuai ania Êđê, hrăm anih 2, sang anŏ tơnap kơtang kơtit yua drit amĭ. Anung prăk anai amra djru ba ñu amăng tơlơi hrăm hră mơng anai truh abih gưl 2. Hơmâo mă prăk anai, adơi H’Mrin Byă ol kơdol:

“Ƀing neh ƀing met brơi prăk djru jing kâo mơ-ak biă mă. Kâo amra gir hrăm rơgơi, kiăng tơdơi anai dưi ngă ơi ia jrao”.

Hlăk ai PC Dak Lak brơi prăk kơ adơi H’Mrin Byă truh kơ hrăm giong gưl dua.

Lăi nao kơ jơlan hơdră anai, nai pơtô Nguyễn Thị Phương, Khua sang hră gưl sa Nguyễn Đức Cảnh, să Ea Ktur, tơring glông Čư̆ Kuin lăi:

“Kâo lăng bruă brơi prăk djru ƀing čơđai sang hră tơnap tap lĕ bruă ngă klă biă, ƀu kơnong djru ƀing čơđai plai ƀiă tơnap đôč ôh mơ̆ amra ngă tơlơi hrăm hră amăng sang hră mơ-ak hloh, gơñu thâo ƀu-eng nao rai; rơngiao kơ anun, tơlơi anai jing pơjing rai lu mơnuih rơgơi, ba kru hrưn đĭ amăng tơlơi hrăm hră hăng amăng tơlơi hơdip”.

Ayong Hoàng Xuân Tứ, Kơ-iăng Khua hlăk ai Kông ti apui lơtrik Dak Lak, brơi thâo, anai lĕ tal blung a anom bruă hơmâo brơi prăk “djru pơđĭ pran jua čơđai hrăm hră” kiăng djru ba ƀing čơđai sang anŏ rin dưi hrưn đĭ:

“Hlăk ai kông ti amăng hơdôm thun rơgao hơmâo lu hơdră djru lăng ba ƀing čơđai sang hră rin ƀun, kah hăng brơi gơnam, brơi prăk, brơi rơdêh tang wang...Truh thun anai lĕ hơmâo hơdră ngă bruă phrâo, jing gơmơi hơmâo ngă bruă djru mơnuih mơnam, anun lĕ plih mơng bruă brơi prăk dơ dăng lĕ gơmơi djru brơi prăk amăng lu thun mơtăm. Gơmơi čang rơmang amra ngă bang hyu hloh hăng abih bang mơnuih mă bruă amăng kông ti hăng hơdôm anom bruă, sang anŏ thâo gum djru ba, ngă jơlan hơdră hiam tui anai”.

Hơdôm bruă ngă hiam djru mơnuih ƀon sang mơng hlăk ai anom bruă apui lơtrik jing pơtrut pran jua hlăk ai amăng tơring čar Dak Lak.

Hrŏm hăng bruă brơi prăk kơ ƀing čơđai sang anŏ rin, ăt amăng blan hlăk ai phrâo rơgao, hlăk ai apui lơtrik Dak Lak hơmâo pơkra dua ring bruă “tŭi rơđah jơlan plơi pla” ƀơi kual hơkrŭ đưm ƀuôn Pa (să Čư̆ Prao, tơring glông M’Drăk” hăng thôn 1 ( să Yang Reh, tơring glông Krông Bông). 2 črăn jơlan anai glông 3,2 km, hơmâo nua rơbêh 60 klăk prăk, ngă tom hlăk ai anom bruă apui lơtrik lĕ hơmao lu hlăk ai amăng plơi pla djru prăk hăng hrơi ngă bruă.

Tui hăng ơi Trần Doãn Tới, Kơ-iăng khua Hlăk ai tơring čar Dak Lak, hơdôm bruă gum djru mơng hlăk ai amăng hơdôm thun rơgao jing ngă hmư̆ hing, bang hyu djŏp amăng hlăk ai mơng djŏp anom bruă, plơi pla. Jai hrơi hơmâo lu hlăk ai ngă bruă “Tŭi rơđah jơlan amăng plơi pla”, “Ngă rơđah tơlơi pơmin pran jua” ba glăi tơlơi pơplih phrâo kơ hơdôm boh plơi pla pơ kual ataih yaih:

“Hăng tơlơi gum djru mơng Kông ti apui lơtrik Dak Lak hăng gơnam tam ăt kah hăng mơnuih mă bruă, hrŏm hăng anun lĕ mơng hlăk ai tơdăm dra amăng tơring čar, jing ngă mơnuih ƀon sang đăo gơnang biă kơ rơnuk hlăk ai. Amăng thun blan rơgao, hơmâo ngă bruă kơtang biă, hmư̆ hing hyu djŏp anih, gum tơngan man pơdong plơi pla phrâo”.

Hlăk ai gum pơkra apui tŭi ƀơi jơlan ƀuôn Pa (să Čư̆ Prao, tơring glông M’Drăk).

Minh Huệ: Čih - Siu H’Mai: Pơblang