VOV4.Jarai - Tơdơi kơ 2 čô mơnuih mă bruă ia jrao hyu huĕt ĕp mơnuih bơdjơ̆ nao mơnuih ƀă kơman hmâo bôh tơhnal pơčrang djơ̆ Sars-CoV-2, tom brơi (10/11), gơnong bruă ia jrao tơring čar Kontum hmâo tañ pơphun pel ĕp, pơsit, hyu huĕt ĕp ngă tui bruă pơgang, pơgăn klin.

Dua čô mơnuih anai dưi thâo ƀă Sars-CoV-2 lĕ T.V.M, 58 thun mă bruă ƀơi Anom wai lăng klin ruă tơring čar Kontum – Anih anom 1 hăng H.T.M.L, 39 thun, mă bruă ƀơi Anom ia jrao phường Duy Tân, plơi prong Kontum. Hrom hăng 2 F0 lĕ mơnuih mă bruă ia jrao, ƀơi plơi prong Kontum ăt čih hmâo mơn sa čô mơnuih F0 amăng plơi pla N.X.L, 46 thun ƀơi phường Quyết Thắng. Tơdơi kơ thâo hmâo 3 F0 amăng plơi pla ƀơi plơi prong Kontum, Gơnong bruă ia jrao tơring čar Kontum hmâo tañ pơphun pel ĕp, pơsit, hyu huĕt ĕp ngă tui bruă pơgang klin. Yap truh 6 mông lơ 10/11, tơring čar Kontum čih hmâo 327 čô mơnuih ƀă Covid-19./.

Siu H’ Prăk: Pô pơblang