VOV4.Jarai - Hơdôm hrơi jê̆ hăng anai, hăng hơdôm yak anăp nao prong amăng bruă hơdră bôh thâo măi mok, pơplih mrô kiăng pơgang, wai lăng gru grua bôh thâo lĕ hơdră dưi ngă wot hơdôm ƀirô kơnuk kơna hăng khul grŭp mơnuih ƀôn sang hor kơ bôh yôm phiăn juăt mă yua. Pơdŏng pơjing anih dưm gru grua hrom amăng bôh thâo đưm ăt lĕ sa amăng hơdôm tơhnal pơkă anăp nao lom pok pơhai Rơwang bruă mrô 6 “Pơgang, ngă tui nua yôm bôh thâo phiăn juăt klă hiam mơng djop djuai ania ƀiă kĕ hrom hăng pơđĭ kyar tuai čuă ngui, gah jơlan hơdră pơkă mơng lŏn ia pơđĭ kyar bơwih ƀong mơnuih mơnam kual djuai ania ƀiă.

Tơring čar Thái Nguyên dưi thâo truh lĕ anih phun mut tơbiă bơwih ƀong mơnuih mơnam kual čư̆ siăng hăng kual lŏn dăo Bắc Bộ, hăng hmâo truh kơ 46 djuai ania adơi ayong dô̆ hơdip mơda hrom. Djơ̆ hăng bruă, Thái Nguyên ăt hmâo mơn lu gru grua bôh thâo đưm phiăn juăt prong prin hăng lu mơta.

Ƀơi Sang djă pioh gru grua tơring čar Thái Nguyên, hơdôm hrơi anai, hơdôm jơlan gah hơdră mă yua măi mok pha ra kah hăng rŭp kač 3D, mrô djă pioh gru grua đưm amăng ƀrư̆ pơ ala nao hơdră wai lăng phiăn juăt, hăng rơbêh kơ 32.000 mơta gơnam tam glăk dưi djă pioh pơgang ƀơi anai. Yă Lương Thị Duyên, Kơ-iăng Khua Sang djă pioh gru grua brơi thâo:

“Ƀing gơmơi thâo lĕ anai jing bruă mă kiăng biă, ñu djru kơ sang djă pioh gru grua hmâo tơhnal gal lăi pơthâo kơ tuai hyu čuă lăng hơdôm gru grua đưm mơ̆ ră anai sang djă pioh gru grua glăk djă pioh. Hăng ăt djru amuñ mơn amăng bruă hyu hơduah ĕp tơlơi pơhing, lăi pơthâo truh lu mơnuih ƀôn sang”.

Tui hăng mơnuih juăt buă, bruă mă yua hơdră phrâo măi mok phrâo djơ̆ biă hăng bruă pơgang, ngă tui nua yôm gru grua. Lom pơplih phrâo dưm amăng măi, hơdră phrâo măi mok brơi ta djă pioh jua mơñi, rŭp, biă ñu lĕ jua mơñi hmư̆ rơđah hăng rŭp dưi lăng tlâo bơnah, ngă pơhư̆č pran jua. Hrom hăng anun lĕ hơdôm gru gua gơnam tam hăng jua mơñi dưm amăng măi dưi lăi pơthâo tañ hluai tui glông internet, ƀu hmâo rơnoh pơkă kơ hrơi blan, anih anom bôh pia. Hăng Thái Nguyên, mrô gru grua djă pioh ăt phrâo dưi pơtrut kơtang amăng hơdôm hrơi jê̆ hăng anai. Biă ñu mơng hrơi tơdơi kơ Grŭp mă bruă Ping gah tơring čar mă yua Tơlơi pơtrun pơsit mrô 01 kơ pơplih mrô. Tui hăng amai Nguyễn Thị Trang, Khua Anom bruă bôh thâo – Tơlơi pơhing tơring glông Phú Bình, tơring čar Thái Nguyên, hăng sa glông hơdră hmâo lu mơta mơng gru grua glăk hmâo, pơtrut kơtang mă yua hơdră phrâo măi mok glăk dưi hmâo hơdôm gưl, gơnong bruă, plơi pla, anom bruă čơkă mă hăng anăp nao ngă tui.

“Amăng glông bruă pơplih mrô bơdjơ̆ nao bruă bôh thâo lĕ Jơnum min mơnuih ƀôn sang tơring glông ăt pơsit mơn, anun lĕ đing nao pơplih mrô bruă gru grua hăng amra đing nao pơplih mrô pioh kơ gru grua gưl lŏn ia kiăng mơnuih ƀôn sang plơi pla hăng tuai hyu čuă ngui hrom hăng gơyut gơyâu amăng lŏn ia, jar kơmar lĕ ăt thâo nao mơn”.

Ră anai ƀơi tơring čar Thái Nguyên hmâo rơbêh kơ 800 gru grua, anih anom hiam rơbêh kơ 500 gru grua bôh thâo đưm, amăng anun hmâo 17 gru grua mơng djuai ania ƀiă dưi pơpŭ bơni tŭ yap lĕ gru grua bôh thâo đưm lŏn ia, hrom hăng hơdôm rơbâo gơnam tam glăk dưi djă pioh ƀơi Sang djă pioh gru grua đưm tơring čar. Kiăng pơđĭ tui anô̆ klă bruă wai lăng hăng lăi pơthâo gơnong bruă bôh thâo, bơkơjăp drơi jăn hăng tuai čuă ngui ăt ba tơbiă mơn glông bruă rơđah rơđông pioh dưi tañ ngă giong bruă mă yua hơdră phrâo măi mok mrô, djru pơgang, ngă tui nua yôm gru grua bôh thâo ƀơi tơring čar.

Ră anai, khul mơnuih 53 djuai ania ƀiă glăk hmâo rơbêh kơ 14 klăk čô mơnuih, hơdip raih daih ƀơi rơbêh kơ 52 bôh tơring čar ƀôn prong, lu biă ñu ƀơi hơdôm kual dô̆ tơnap tap, kual guai lŏn ia. Bôh nik brơi ƀuh, mrô pơplih djă pioh bôh thâo djuai ania ƀiă ƀu djơ̆ kơnong kơ djru pơđĭ tui anô̆ pơhlôm wai lăng gru grua bôh thâo ôh mơ̆, ñu dô̆ jing kông ngăn pioh lar hyu nua yôm phiăn juăt amăng rơnuk gluh đĭ mơng măi mok dong.

Ơi Hà Việt Quân, Khua Anom bruă git gai jơlan hơdră pơkă mơng lŏn ia pơđĭ kyar bơwih ƀong mơnuih mơnam kual djuai ania ƀiă hăng kual čư̆ siăng brơi thâo, Rơwang bruă mrô 6 hmâo 19 bôh yôm hăng abih bang prăk mă yua năng ai ñu 5900 klai prăk. Djơ̆ mơng lăi hă anai lĕ tal blung a hmâo sa rơwang bruă prong tui anun pioh kơ bruă bôh thâo djuai ania. Hơdôm bruă mă rơđah rơđông anăp nao pơđĭ tui tơlơi kiăng tŭ mă tơlơi hơdip pran jua, pơgang ngă tui hơdôm gru grua djuai ania, kah hăng pơdŏng phrâo hơdră pơkă, pơtô glăi amăng sang hră, pơphun hơdôm mông jơnum ngui ngă yang, hăng biă ñu lĕ pơplih mrô gru grua.

 “Tơlơi ruai kơ pơplih bruă djă pioh gru grua bôh thâo đưm lĕ Khua ding jum mơng ƀing gơmơi hmâo črâo ba bruă kơsem min kơ pơplih mrô hăng yua mrô hơdôm bruă pok pơhai ngă tui jơlan hơdră pơkă mơng dêh čar. Hrom hăng anun, Khua ding jum ăt hmâo laih mơn tơlơi črâo ba khom kơsem min, gum hrom hăng Ding jum bôh thâo, hơdôm Ding jum, gơnong bruă bơdjơ̆ nao hăng biă ñu lĕ hơdôm anih anom, plơi pla djop djuai ania ƀiă dưi pơdŏng sa hơdră pơgang amăng măi, pioh ngă tui ăt kah hăng lăi pơthâo nua yôm bôh thâo đưm phiăn juăt djuai ania ƀiă. Hăng hmâo anih djă pioh gru grua lăi hrom gah bôh thâo bơwih ƀong mơnuih mơnam, djru kơ bruă pơđĭ kyar hơdôm nua yôm pran jua ăt kah hăng djru kơ tơhnal pơkă pơđĭ kyar bơwih ƀong mơnuih mơnam hluai tui hơdôm bruă tuai čuă ngui”./.

Siu H’ Prăk: Pơblang