VOV4.Jarai - Mơguah lơ 29/7, AstraZeneca hơmâo ba nao pơ ƀon prong Hồ Chí Minh thim 659.900 liêu vaccine pơgang Covid-19. Anai lĕ tal jao vaccine tal 6 kiăo tui tơlơi rơkâo blơi hlâo kơ anun kơplah wah AstraZeneca hăng Kông ti pơčruh ngăn vaccine Việt Nam (VNVC), hơmâo tơlơi djru mơng Ding jum ia jrao. Ră anai, tơlơi pơkôl anai hơmâo ba glăi kơ Việt Nam giăm 3 klăk 800 rơbâo liêu vaccine, dưm dưm hăng 41% mrô vaccine pơgang Covid-19 mơng AstraZeneca hơmâo amăng dêh čar. Abih tih hơmâo laih giăm 9 klăk 300 rơbâo liêu vaccine pơgang covid-19 mơng AstraZeneca hơmâo ba rai pơ Việt Nam. Ơi Nitin Kapoor, Khua git gai anom bruă AstraZeneca Việt Nam hăng hơdôm anih sĭ mơdrô kual ASIA phrâo đĭ kyar brơi thâo: amra ngă hrŏm dong mơn hăng Ding jum ia jrao, WHO, UNICEF hăng VNVC kiăng ba vaccine kơ Việt Nam tañ hloh, rơnuk rơnua hloh, kiăng mơnuih ƀon sang tañ hơđong glăi tơlơi hơdip tui hơđăp, dưi glăi pơ sang anŏ.

Siu H’Mai: Pơblang