VOV4.Jarai -  Čơtlăm lơ 24/8, Kơ-iăng Khua dêh čar ta ơi Lê Văn Thành hrom hăng grŭp hyu mă bruă hmâo nao mă bruă laih hăng tơring čar Long An kơ bruă pơgang, pơgăn klin Covid-19 hăng bruă pơđĭ kyar bơwih ƀong – mơnuih mơnam mơng tơring čar. Amăng mông mă bruă, Kơ-iăng Khua dêh čar ơi Lê Văn Thành lăi lĕ, tơlơi klin ruă ƀơi tơring čar Long An ngă glêh tơnap, khă hnun hai mrô mơnuih ƀă ăt amra dưi pơgăn mơn. Amăng hơdôm hrơi pơ̆ anăp, kiăng ngă tui tơpă bruă dô̆ čơlah mơnuih mơnam... biă ñu khom pok pơhai tañ pơčrang lăng kiăng thâo F0 amăng đơ đam tơring čar kiăng plai ƀiă lar hyu klin ruă. Kơnong kơ hơdôm kual dô̆ čơlah, guang dar khom pơhlôm gơnam ƀong huă kơ mơnuih ƀôn sang. Ƀu djơ̆ kơnong kơ lăng anai lĕ bruă hơđong tơlơi hơdip mơda ôh mơ̆ ñu dô̆ jing jơlan gah pơgang, pơgăn klin dong. Gah ngăn rơnoh pơgang, pơgăn klin ruă, tui hăng Kơ-iăng Khua dêh čar Lê Văn Thành, Kơnuk kơna amra hmâo hơdôm tơlơi gir run djru gum sit nik, hmao tlôn kơ hơdôm tơring čar, ƀôn prong. Khă hnun hai, Long An khom gơgrong hlâo ngăn rơnoh, mă yua hơdôm hơdră pơkă kiăng đing nao ngăn rơnoh prăk kak kơ pơgang, pơgăn klin. Pơgăn klin ruă, tañ hơkrŭ glăi bruă bơwih ƀong huă, sĭ mơdrô./.

Siu H’ Prăk: Pô pơblang