VOV4.Jarai-Kơ-iăng Khua dêh čar ơi Vũ Đức Đam phrâo hơmâo mông mă bruă hăng tơring čar Bình Dương kơ bruă pơhlôm, pơgang klin Covid 19. Tui hăng khua mua tơring čar Bình Dương lăi pơthâo, lu anih hơmâo klin amăng plơi pla dưi pơgăn laih.

Mơnuih ƀôn sang Bình Dương hok mơak dưi tlâ̆o jrao pơgang Covid 19

Bình Dương hlăk hruă kjăp wai lăng djop anih, hyu tir na nao, pơsir khut khăt đŭ prăk bơtơhmal hlơi ngă soh. Lăng yôm bruă mă hăng tơlơi gir run mơ̆ng khua mua gong gai kơnuk kơna laih anun mơnuih ƀôn sang Bình Dương amăng bruă pơhlôm pơgang klin laih anun pơjrao mơnuih duăm djơ̆ klin Covid 19.

Kơ-iăng khua dêh čar ơi Vũ Đức Đam mơak mơ̆n lơ̆m hmư̆ khua mua djop gưl amăng Bình Dương ngă hrom khut khăt kiăng truh lơ 15/8 khom pơgăn klin ƀơi 5/9 boh tơring glông plơi prong. Truh lơ 30/8, khom pơgăn klin ƀơi 4 boh plơi prong dŏ glăi giăm hăng ƀôn prong Hồ Chí Minh, kơnong ƀơi anih tơnap tap ƀă klin lu khom guang dar hĭ, ăt ngă rơgoh tui, tơring čar Bình Dương amra pơwơ̆t glăi kah hăng tơđar yơh.

Nay Jek: Pơblang