VOV4.Jarai-Mơguah lơ 6/12, Sang ia jrao prong tơring car Kon Tum lăi pơthâo hăng ƀing čih tơlơi pơhing phrâo kơ 8 čô mơnuih ƀă klin covid 19, arăng ƀuh ƀơi sang ia jrao prong tơring čar mơ̆ng lơ 2-4/12. Tui hăng anun, 8 čô mơnuih F0 hơmâo dua čô mơnuih mă bruă amăng sang ia jrao, sa čô ơi ia jrao hăng sa čô nai ia jrao.

Sang ia jrao prong tơring čar Kon Tum anih ƀuh 8 čô mơnuih F0

Năm čô F0 dŏ glăi lĕ, 3 čô mơnuih ruă lĕ dŏ ƀơi plơi prong Kon Tum, tơring glông Sa Thầy hăng Kon Braih; 1 čô đah kơmơi ƀă ană hăng mơnuih sang anŏ pô anun ƀơi tơring glông Đak Hà hăng sa čô lĕ mơnuih sang anŏ pô ƀă kman ƀơi tơring glông Sa Thầy. Abih bang ƀing F0 dưi ƀuh ƀơi sang ia jrao prong tơring čar Kon Tum arăng ba nao dŏ pơ anih pơčlah laih, anih pơjrao ling tơhan wai lăng mrô 1 tơring čar Kon Tum.

Tơdơi kơ ƀuh 8 čô mơnuih F0, Sang ia jrao prong tơring čar Kon Tum pơphun tui kru ĕp mơnuih jĕ giăm ƀing ƀă kman jing F1, F2; kơtưn pruih ia jrao pơdjai kman ƀơi anih ƀing ƀă kman dŏ pơjrao pơ sang ia jrao prong; ngă tui tong ten bruă wai lăng mơnuih mut tơbiă pơ sang ia jrao; ĕp lăng na nao mơnuih ƀă kman hăng mơnuih duăm ruă, mơnuih sang anŏ ƀing duăm ruă hăng abih bang ƀing ngă bruă nai ia jrao.

Nay Jek: Pơblang