VOV4.Jarai-Mơguah lơ 20/7, Khul git gai bruă pơhlôm, pơgang klin Covid 19 tơring čar Kon Tum pơphun jơnum mơ̆ng ataih lăng nao rai amăng tivi hăng 10 boh tơring glông, plơi prong lăi nao kơ 2 čô mơnuih ƀă kman sars-cov-2 blung a ƀuh ƀơi tơring čar anai.

Sang ia jrao pơjrao hăng jrao akha kyâo hăng rŭ glăi drơi jăn tơring čar Kon Tum anih pơjrao mơnuih ƀă kman sars-cov-2

Abih dua čô anai F0 lêng kơ ba nao dŏ pơčlah hlao hăng hlăk pơjrao ƀơi sang ia jrao prong tơring glông Kon Plong laih anun sang ia jrao pơjrao hăng ia jrao akha kyâo tơring čar Kon Tum. Ƀơi mông jơnum ječ ameč lăng nao rai amăng tivi hăng 10 boh tơring glông, plơi prong amăng tơring čar, Khul git gai pơhlôm pơgang klin Covid 19 tơring čar Kon Tum git gai brơi kơtưn ngă djơ̆ bruă pơhlôm, pơgang klin amăng tơlơi pơhing phrâo ƀơi tơring čar.

Tơring čar pơtrun hiăp kơ khua mua gong gai 10 boh tơring glông, plơi prong khom jŭ yap glăi mrô mơnuih glăi mơ̆ng anih hơmâo klin kiăng huăi ba truh tơlơi ƀă klin bơrơkua nao rai, pơjrao amăng sang ia jrao hơdôm ƀing F0.

Nay Jek: Pơblang