VOV4.Jarai - Ping gah tơring čar Kontum ba tơbiă amăng 5 thun pơ̆ anăp hrưn đĭ hmâo 4 bôh tơring glông hăng plơi prong Kontum djơ̆ hăng plơi pla phrâo ƀudah ngă giong bruă pơdŏng plơi pla phrâo. Kiăng hmâo tơhnal pơkă anai, tơring čar Kontum pơsit khom pok pơhai, ngă tui klă 8 mơta bruă mă, jơlan gah pơsir, amăng anun đing nao bruă lăi pơhing kiăng mơnuih ƀôn sang gum hrom klă pơdŏng plơi pla phrâo.

Truh ră anai tơring čar Kontum hmâo 28 bôh să dưi tŭ yap să djơ̆ hăng plơi pla phrâo. Rơngiao kơ anun hmâo 10 bôh să djơ̆ hăng 15 truh 18 tơhnal pơkă; 45 bôh să djơ̆ hăng mơng 10 truh kơ 14 tơhnal pơkă hăng 2 bôh să mơng 8 truh 9 tơhnal pơkă. Ping gah tơring čar Kontum djơ̆ hăng tơhnal pơkă amăng 5 thun pơ̆ anăp hrưn đĭ hmâo 4 bôh tơring glông hăng plơi prong Kontum djơ̆ hăng tơhnal pơkă plơi pla phrâo hăng lu hloh kơ anun, laih anun abih bang mrô să djơ̆ hăng hơdôm tơhnal pơkă yôm phăn amăng pơdŏng plơi pla phrâo, kah hăng: pơkă kual, jơlan nao rai, hnoh ia, apui lơtrik, gơnam mă yua kơ bôh thâo, sang dô̆ ƀơi plơi pla, mrô mơnuih mă bruă hmâo bruă mă na nao... Phrâo anai, ƀơi mông Jơnum tal 3 Grŭp mă bruă Ping gah tơring čar tal 16, Ping gah tơring čar Kontum đing nao bơkơtuai bruă pơdŏng plơi pla phrâo. Pơhiăp amăng mông Jơnum, ơi Dương Văn Trang, Ding kơna Ping gah dêh čar, Khua git gai Ping gah tơring čar Kontum brơi thâo:

“Grŭp apăn bruă Ping gah tơring čar hmâo črâo ba pel ĕp glăi, pơsit tŏng ten bôh tơhnal dưi ngă, akă dưi, tơnap dô̆ gun lom pơdŏng plơi pla phrâo ƀơi tơring čar. Pơsit rơđah bôh than ba truh akă dưi pơsir. Hluai tui tơlơi hmâo sit mơng tơring čar, hơdôm tơlơi črâo ba mơng Dêh čar kơ pơdŏng plơi pla phrâo kiăng pơsit tơhnal bruă, bruă mă, jơlan gah pơsir phun kiăng pơdŏng plơi pla phrâo amăng tơring čar mơng thun 2021-2025”.

Ngă lơphet pơphun pơdŏng plơi pla phrâo ƀơi Kontum

Kiăng ngă giong tơhnal pơkă truh thun 2025 hmâo 4 bôh tơring glông hăng plơi prong Kontum djơ̆ hăng plơi pla phrâo ƀudah ngă giong bruă pơdŏng plơi pla phrâo, Ping gah tơring čar Kontum pơsit khom pok pơhai, ngă tui klă 8 ƀut bruă, jơlan gah pơsir, amăng anun hmâo: kơtưn bruă lăi pơhing kơ pơdŏng plơi pla phrâo; pơđĭ tui anô̆ kơjăp pơkă kual, wai lăng hăng ngă tui tơlơi pơkă, biă ñu pơđĭ kyar plơi prong; dăp glăi hơdră ngă đang hmua pơđĭ tui prăk pơhrui glăi kơ mơnuih ƀôn sang; pơđĭ kyar bruă pơtô pơhrăm, bruă ia jrao, bôh thâo, pơgang anih anom dô̆; pơđĭ tui anô̆ kơjăp pơphun bruă Ping gah hăng glông bruă kơđi čar; pơplih phrâo pran ngă tui tuh pơplai pơdŏng plơi pla phrâo; kơtưn tơlơi git gai mơng hơdôm gưl Ping gah, wai lăng git gai mơng Jơnum min mơnuih ƀôn sang hơdôm gưl hăng ngă tui pran kơtang hơdôm khul grŭp apăn bruă kơđi čar – mơnuih mơnam ƀơi plơi pla amăng pơdŏng plơi pla phrâo.

Tơdơi kơ Tết tui phiăn juăt Tân Sửu 2021, abih bang 10 bôh tơring glông, plơi prong mơng tơring čar Kontum ha amăng plĕ pơphun ngă Lơphet pok phun akô̆ thun abih bang mơnuih ƀôn sang gum hrom run pran pơdong plơi pla phrâo hăng plơi prong thâo rơgơi. Ƀơi plơi prong Kontum, gong gai hăng mơnuih ƀôn sang 21 bôh să, phường ha amăng plĕ ngă tui bruă pla kyâu akô̆ thun hrưn đĭ amăng sa thun pla ƀiă biă ñu 2.000 ƀĕ phun kyâu; pơkra ƀê tông ƀơi sa dua ară jơlan amăng plơi pla; pơphun rơmet agaih pơkra pơjing plơi prong.

Ơi Nguyễn Thanh Mân, Khua Jơnum min mơnuih ƀôn sang plơi prong Kontum brơi thâo, thun anai plơi prong hrưn đĭ amra hmâo dong 2 bôh să Čư̆ Hreng hăng Kroong truh akô̆ plơi pla phrâo. Truh thun 2023 plơi prong amra djơ̆ hăng plơi pla phrâo hăng djơ̆ hăng plơi prong tal tal II hlâo kơ thun 2025. Gong gai hmâo jao bruă mă rơđah rơđông kơ rim să, phường, ƀirô anom bruă pơhlôm ngă tui ba glăi bôh tơhnal, sit nik:

“Hăng hơdôm bôh să pơphun pơkra jơlan nao rai amăng plơi pla, pơdŏng hơdôm ring bruă amăng tơring čar anăp nao truh pơdŏng hơdôm tơhnal pơkă djơ̆ hăng plơi pla phrâo. Hăng hơdôm bôh phường pơdŏng glăi hơđong rơnuk rơnua, pơphun kĭ pơkôl pioh kơ hơdôm bôh sang anô̆ wai lăng anom mă yua hơdră phrâo plơi prong, bơwih brơi phun kyâu pla. Hrom hăng anun Jơnum min mơnuih ƀôn sang plơi prong amra pơplih pơkra glăi plơi prong, biă ñu lĕ tuh pơplai glăi ƀơi dring jơlan, đing hnoh pơđoh ia , phun kyâu pơtâo, apui lơtrik pơhrô̆p ƀơi hơdôm jơlan nao rai amăng kual krah ƀơi plơi prong. Năp nao pơdŏng plơi prong Kontum djơ̆ hăng plơi prong dăp tal II, plơi prong amra pok pơhai sa dua ring bruă phun kiăng pơhư prong plơi prong”.

Khua plơi prong Kontum pla kyâu ƀơi kơtuai jơlan amăng plơi prong 

Hrom hăng hơdôm jơlan gah pơsir hrom, gong gai rim să, tơring glông mơng tơring čar Kontum hluai tui bôh nik hmâo ƀơi anai kiăng hmâo jơlan gah nao pha ra, kiăng djă kơjăp hăng pơđĭ tui hăng rim tơhnal pơkă plơi pla phrâo rơđah rơđông. Ơi Nguyễn Văn Thủy, Kơ-iăng Khua Jơnum min mơnuih ƀôn sang tơring glông Kon Braih brơi thâo:

“Amăng lu jơlan gah pơsir, phun ñu lĕ pơsur mơnuih ƀôn sang ngă juăt hăng anô̆ mă yua phrâo amăng bruă ngă đang hmua kiăng pơjing rai nua gơnam, prăk pơhrui glăi klă hloh amăng sa anih anom ngă đang hmua kiăng pơsir brơi prăk pơhrui glăi hăng tơtlaih mơng ƀun run kơjăp. Rơđah biă ñu anun lĕ ba hơdôm hlô rông phun pla phrâo klă hiam, hmâo lu bôh hơbơi amăng bruă ngă đang hmua pioh kơ rim djuai phun pla kiăng pơjing rai jơlan pơhrui glăi prăk kak lu hloh, pơsir jơlan gah pơhrui glăi prăk mơng mơnuih ƀôn sang”.

Kiăng djă pioh kơjăp, pơđĭ tui hơdôm tơhnal pơkă, gong gai 28 bôh să djơ̆ hăng plơi pla phrâo mơng tơring čar Kontum pơtrut kơtang dong bruă lăi pơhing kơ pơdŏng plơi pla phrâo; djă pioh bôh tơhnal bruă bơkơtưn “Kontum gum tơngan hrom pơdŏng plơi pla phrâo”; iâu pơhrui, mă yua đut hlah hơdôm ngăn rơnoh kiăng hơkrŭ đĭ, djă kơjăp hăng pơđĭ tui hơdôm tơhnal pơkă ngă tui./.

Siu H’ Prăk: Pô pơblang