VOV4.Jarai -  Ƀơi tơring čar Kontum truh mông anai hmâo čih pioh giăm truh 30 čô mơnuih ƀă Covid-19. Khă hnun hai abih bang hơdôm mơnuih anai leng kơ dưi čơlah đuăi tơdơi kơ glăi pơ̆ tơring čar hăng Kontum ră anai lĕ anih anom ƀơi Dăp Kơdư akă hmâo mơnuih ƀă kơman klin amăng plơi pla. Bôh nik bruă pơgang, pơgăn klin Covid-19 ƀơi Kontum brơi ƀuh, hrom hăng anih dô̆ gak pơgăn ba glăi bôh tơhnal ƀơi bah amăng mut tơbiă lĕ bruă pơgang klin ƀơi hơdôm bôh plơi pla ăt glăk djru yôm phăn mơn amăng bruă pơgăn lar hyu klin amăng plơi pla.

Rơnuč blan 8 phrâo rơgao, să Hơ Moong, tơring glông Sa Thầy hmâo 16 čô mơnuih mă bruă glăi mơng anih klin ngă tơring čar Bình Dương. Tơdơi kơ rơgao 14 hrơi dô̆ čơlah hơbit ƀơi tơring čar tui tơlơi pơkă, khă hning kơ ană bă, samơ̆ lu sang anô̆ mơnuih ƀôn sang leng kơ hmâo hrom tơlơi rơkâo hăng gong gai brơi mơnuih mơng sang anô̆ pô dưi dô̆ čơlah hmâo 14 hrơi dong ƀơi să, huĭ hmâo tơlơi thơ huăi bơdjơ̆ nao truh plơi pla.

Ơi A Đứu, Khua git gai Ping gah plơi Kà Bầy brơi thâo, kiăng mơnuih ƀôn sang hmâo tơlơi pơmin pơgang klin klă tui anun, rim hrơi 4 čô mơnuih ping gah mơng Grŭp Ping gah pơplih nao rai dô̆ gak ƀơi Anih gak wai lăng pơgang klin Covid-19 yua kơ să pơdŏng ƀơi jơlan găn nao rai plơi. Ƀơi anai rim mơnuih ƀôn sang nao hmua ƀudah mơng hmua glăi ƀing adơi ayong ping gah hơneč mă kiăng thâo tơlơi nao mă bruă hăng tơlơi suaih pral rim čô mơnuih ƀôn sang. Hrom hăng anun thâo pơhrua hrom tơlơi pơhing pơgang klin Covid-19 kiăng mơnuih ƀôn sang thâo hluh kơ tơlơi huĭ rơhyư̆t mơng klin ruă hăng tơlơi suaih pral mơng drơi pô hăng plơi pla. Rơngiao kơ anun hơneč mă mơguah čơtlăm, ƀing ping gah nao rim sang amăng plơi pơtô brơi, lăi pơhing, pơsur mơnuih ƀôn sang hơdôm bruă pơgang klin ruă:

“Ping gah amăng Grŭp ping gah plơi leng kơ ngă tui klă tơlơi črâo ba mơng gưl dlông. Bruă pơgang klin tui anai gơñu dô̆ gak, pơsur neh wa gôm adung mơbah lom tơbiă gah rơngiao. Ping gah amăng Grŭp ba jơlan hlâo na nao amăng djop bruă mă hăng pơsur neh wa gum hrom”.

Wai lăng mơnuih amăng plơi ƀơi anih dô̆ gak wai lăng klin ruă Covid-19 ƀơi plơi Kà Bầy, să Hơ Moong

Kiăng pơgang klin Covid-19, să Hơ Moong, tơring glông Sa Thầy pơdŏng 2 grŭp gak wai lăng mơnuih mut tơbiă plơi mơng tơring glông Đăk Tô hăng Đăk Hà. Khul ƀơi anăp mă bruă pơ̆ Anih dô̆ gak hrom hăng mơnuih apăn bruă mơng să dô̆ hmâo tơlơi gum hrom mơng mơnuih amăng Grŭp hyu mă bruă pơgang, pơgăn klin Covid-19 dua bôh plơi anih pơdŏng anom dô̆ gak. Mrô lăng tui ƀơi 2 anih gak wai lăng klin ruă mơng să brơi ƀuh, mơng krah blan 5 truh akô̆ blan 9 hmâo rơbêh kơ 4.600 wot čô mơnuih mut tơbiă, biă ñu mơng să Đăk Mar, tơring glông Đăk Hà hăng să Pô Kô, tơring glông Đăk Tô. Tơlơi pơhing rim čô mơnuih dưi čih glăi djop tum hloh lĕ kơ anih dô̆, mrô telephone lăi pơthâo hăng pơ-iă drơi jăn lom găn nao anih gak. Ơi Lê Khắc Tuấn, Khua git gai Ping gah să Hơ Moong brơi thâo, kiăng đĭ tui bôh tơhnal bruă pơgang klin Covid-19, hrom hăng djă pioh bruă tơpă bruă gak ƀơi anih pơdŏng wai lăng hrơi mlăm, gong gai să pơsit khom pơđĭ tui tơlơi pơmin pơgang pơgăn klin mơng mơnuih ƀôn sang:

“Să Hơ Moong neh wa djuai ania ƀiă hmâo rơbêh kơ 90% anun bruă lăi pơhing prong biă. Lom sa mông truh 2 mông ƀơi Gong phun pơtui jua pơhiăp lăi pơhing na nao. Bơ̆ ƀơi hơdôm bôh plơi hmâo lua djă hyu să ƀơk brơi, Grŭp mơnuih ƀôn sang plơi lĕ djă loa lăi pơthâo na nao. Truh ră anai neh wa thâo kơđiăng biă”.

Mơnuih ƀôn sang nao hmua hmâo kơ glăi pơ̆ plơi dưi pel ĕp pơkă lăng pơ-iă drơi jăn ƀơi anih gak pơgang klin Covid-19

Gum hrom khul ơi nai ia jrao, khul ling tơhan, kông ang ƀơi anih pơgang, pơgăn klin, truh ră anai ƀơi hơdôm bôh plơi, grŭp mơnuih ƀôn sang mơng tơring čar Kontum hmâo pơdŏng rơbêh kơ 2.800 grŭp hyu mă bruă pơgang, pơgăn klin Covid-19. Rim grŭp hyu mă bruă hmâo mơng 2 truh 3 čô mơnuih lĕ mơnuih apăn bruă plơi pla, grŭp mơnuih ƀôn sang, hơdôm khul grŭp, mơnuih hyu gum djru hăng hmâo bruă gơgrong mơng 30 truh kơ 50 bôh sang anô̆. Yă Y Dim, Kơ-iăng Khua git gai Ping gah, Khua Khul pơ ala mơnuih ƀôn sang să Đăk Pxi, tơring glông Đăk Hà brơi thâo, bruă ngă tui mơng grŭp amăng pơgang, pơgăn klin Covid-19 ƀơi hơdôm bôh plơi lĕ yôm phăn biă:

“Hơdôm grŭp pơgang pơgăn klin anai rim hrơi hmâo bruă hyu lăng tui abih bang hơdôm bôh plơi amăng să. Hơdôm grŭp gum hrom hăng Kông ang gak wai pel ĕp bruă nao rai ƀu gôm adung mơbah. Lăng tui kơjăp hơdôm mơnuih mơng gah rơngiao tơring čar glăi pơ̆ sang. Wai lăng kơjăp tui tơlơi pơkă kơ dô̆ čơlah. Ƀơi plơi ăt pel ĕp lăng mơn tơlơi tum pơƀŭt lu mơnuih. Rơngiao kơ anun pơtô brơi neh wa agaih rơnăk anih dô̆ hơdjă. Pơ̆ sang khom hmâo jrao pơdjai kơman. Neh wa ƀu hmâo prăk blơi pioh yua lĕ ƀing gơmơi ăt pơtô brơi mơn kơ neh wa blơi ia čơƀu rao tơngan hăng ia čơƀu laih anun gôm adung mơbah pơtô brơi tŏng ten mơtăm”.

Sa bôh sang anô̆ mơnuih ƀôn sang Plei Rơhai II, phường Lê Lợi, plơi prong Kontum ngă tui dô̆ čơlah ƀơi sang pơgang klin Covid-19

Truh mông anai ƀơi tơring čar Kontum, abih bang hơdôm mơnuih ƀă kơman Covid-19 leng kơ dưi dô̆ čơlah mơtăm lom glăi pơ̆ tơring čar hăng Kontum ră anai lĕ anih anom ƀơi kual Dăp Kơdư akă hmâo mơnuih ƀă kơman amăng plơi pla. Kiăng djă kơjăp bôh tơhnal anai, hrom hăng kơtưn khul mơnuih kơ hơdôm anih dô̆ gak wai lăng klin pơ̆ jơlan mut tơbiă tơring čar kiăng pơgăn jơlan lar tưp, Kontum ăt djă pioh dong hăng pơdŏng dong lu plơi pla pơhlôm kiăng tơlơi hơdip mơda tañ pơwot glăi kah hăng hlâo adih./.

Khoa Điềm: Pô čih – Siu H’ Prăk: Pô pơblang