VOV4.Jarai - Ding jum ia jrao dêh čar ta phrâo hmâo hră pơ-ar ječ mơ-ĭt kơ Jơnum min mơnuih ƀôn sang hơdôm bôh tơring čar ƀôn prong kơ bruă kơtưn pơgang pơgăn klin ngă kơčung tơkai tơngan hăng mơbah. Mơng akô̆ thun truh ră anai, đơ đam dêh čar ta čih djă pioh giăm truh 17.500 čô mơnuih hmâo tơlơi ruă anai, amăng anun hmâo 4 čô mơnuih djai. Bơhmu hăng thun hlâo, mrô mơnuih djơ̆ klin ruă kơčung tơkai tơngan hăng mơbah lu truh 4 wot hăng đĭ lu biă ñu ƀơi kual dơnung dêh čar. Kiăng kơtưn pơgang pơgăn klin ruă kơčung tơkai tơngan hăng mơbah, kiăng plai ƀiă đut hlah mrô mơnuih ruă, djai, ƀu pioh klin lar hyu prong hăng sui, Ding jum ia jrao dêh čar hmâo laih Hră pơ-ar mrô 2527 Ding jum ia jrao – Pơhlôm hlâo mơ-ĭt kơ Jơnum min mơnuih ƀôn sang tơring čar, ƀôn prong amăng dêh čar ta rơkâo črâo ba pok pơhai sa dua bôh yôm kơ kơtưn pơgang, pơgăn klin ngă kơčung tơkai tơngan hăng mơbah./.

Siu H’ Prăk: Pô pơblang