VOV4.Jarai -  Krông Pač lĕ tơring glông hmâo mrô mơnuih pơwot glăi mơng ƀôn prong Hồ Chí Minh hăng hơdôm bôn tơring čar kual Dơnung dêh čar lu hloh tơring čar Daklak, hăng rơbêh kơ 2.700 čô mơnuih. Kiăng mơnuih ƀôn sang pơwot glăi hmâo anih dô̆ čơlah pơhlôm klă, pơhlôm bôh tơhnal pơgang pơgăn klin Covid-19, tơring glông Krông Pač hmâo laih lu hơdră ngă thâo, pơčeh phrâo djru mơnuih mă bruă hăng sang anô̆ mơng gơñu hơđong pran jua hloh. Hăng hơdră ngă anai djơ̆ biă hăng kual plơi pla, amra dưi mă yua hăng hơdôm anih anom pơkon ƀơi Dăp Kơdư.

Pơwot glăi hrom mơng tơring čar Bình Dương, ayong Đồng Thanh Hiếu hăng sa mơnuih glăk dô̆ čơlah amăng rơnưh dô̆ jăng jai ƀơi krah đang kơ phê pơ̆ plơi Cao Bằng, să Ea Knuêč, tơring glông Krông Pač. Ñu brơi thâo, rơbêh kơ 3 blan ƀu hmâo bruă mă amăng kual krah klin ngă, mrô prăk djă lui hmâo yua abih laih. Tơdơi kơ Bình Dương phru ƀiă tơlơi dô̆ čơlah, ñu hmâo đĭ laih rơdêh thut glăi pơ̆ plơi. Yua kơ sang anô̆ hmâo tơlơi dô̆ čơlah ha jăn anun ñu dưi hmâo gong gai plơi pla pơpha brơi dô̆ gep hăng sa čô dong amăng rơnưh đang kơ phê:

“Glăi lĕ amĭ ama hăng plơi prăp lui kơ rơnưh mơng adơi kâo glăi hrom dua adơi ayong dô̆ čơlah ƀơi anai. Rim hrơi amĭ ama ba gơnam ƀong huă, amĭ ama dưm ƀơi yŭ, truh amĭ ama đuăi lĕ kâo trun mă. Glăi lĕ kâo pơmin dô̆ čơlah tơpă”.

Dô̆ čơlah amăng rơnưh ƀơi đang kơ phê

Ơi Triệu Văn Đường, Kơ-iăng Khua plơi Cao Bằng să Ea Knuêč brơi thâo, amăng hơdôm hrơi rơgao, plơi hmâo čơkă lu mơnuih tui djơ̆ tơlơi pơkă, Grŭp wai lăng mă plơi hmâo pel ĕp mrô sang anô̆ hmâo sang amăng đang kơ phê, hmâo sang lui lơi hong, laih anun črông sai tŭ ư hrom hăng hơdôm bôh sang anô̆ brơi yua tơdăng hơdôm bôh sang anun kiăng ngă anih dô̆ čơlah. Bruă lăng tui mơng mơnuih dô̆ cơlah dưi hmâo Grŭp wai lăng mă pô hăng Grŭp pơgang Covid mơng plơi ngă tui tơpă:

“Lom glăi dô̆ čơlah khom lăi pơthâo neh wa khom ngă tui djơ̆ 5 tơlơi pơgang klin kiăng pơhlôm klă kơ neh wa ăt kah hăng mơnuih pơkon jum dar mơng plơi pô. Rim hrơi ăt lăng tui mơn dô̆ čơlah mơn hă, yua kơ lu mơnuih ƀu thâo pơmin anun pô ăt khom pơtă pơtăn na nao mơn”.

Sang anô̆ djru gơnam ƀong kơ mơnuih dô̆ čơlah

Bơ̆ ƀơi să Ea Yiêng, să kual mrô 3 mơng tơring glông Krông Pač, yua kơ mrô sang amăng đang hmua ƀiă, gong gai hmâo mă yua laih hơdôm bôh sang jơnum plơi pla mơng rim plơi hăng sa dua ring bruă mă yua hrom ngă kual dô̆ čơlah hăng iâu anai lĕ hơdôm “bôh sang mơnuih ƀôn sang rông”. Grŭp hlăk ai plơi hmâo pơphun laih hơdôm jơlan hơdră djru gơnam ƀong huă kiăng pơhlôm brơi kơ mơnuih ƀôn sang hơđong pran jua dô̆ čơlah. Ayong Trần Đức Hậu, Kơ-iăng Khua Khul pơlir hơbit hlăk ai Việt Nam tơring glông Krông Pač brơi thâo:

“Khul pơlir hơbit hlăk ai Việt Nam tơring glông pơphun bruă djru asơi huă kơ Grŭp wai lăng mă pô, laih djru rah asơi huă čơtlăm ƀing gơmơi ăt djru dong mơn gơnam ƀong huă kiăng Grŭp wai lăng mă pô plơi pla tơnă hơbai hăng djru kơ khul dô̆ čơlah ƀơi plơi”.

Hơdôm pơnăng pơgăn hăng nilong djơ̆ hrom mrô mơnuih dô̆ čơlah

Ƀơi tơring glông Krông Pač, tơring čar Daklak, amăng mrô rơbêh kơ 2.700 čô mơnuih ƀôn sang glăi mơng ƀôh prong Hồ Chí Minh hăng hơdôm bôh tơring čar kual Dơnung dêh čar lĕ hmâo 11 čô mơnuih glăk dô̆ čơlah hơbit ƀơi tơring glông, 54 čô mơnuih dô̆ čơlah hơbit ƀơi hơdôm bôh să hăng 2670 čô mơnuih dô̆ čơlah ƀơi sang. Pơhlôm bruă dô̆ čơlah tơpă kiăng pơgang klin, Jơnum min mơnuih ƀôn sang tơring glông hmâo pơphun rơđah bruă gơgrong mơng rim anom gơgrong bruă. Kiăo tui anun, gơnong bruă ia jrao test tañ kơ mơnuih ƀôn  sang 3 hrơi sa wot, rim hrơi iâu telephone rơkâo mơnuih mă bruă pơkă lăng pơ-iă drơi jăn, lăng tui tơlơi suaih pral; Gơnong bruă kông ang pơhlôm rơnuk rơnua ƀơi hơdôm anih anom pơkă lăng pơ-iă drơi jăn; Hơdôm grŭp khul pơsur pơčruh prăk, gơnam ƀong huă djru kơ neh wa hrom hăng ngăn rơnoh mơng kơnuk kơna. Yă Nguyễn Thị Kim Oanh, Kơ-iăng Khua Jơnum min mmơnuih ƀôn sang tơring glông Krông Pač lăi pơthâo:

“Tơring glông ăt mă yua mơn lu hră pơ-ar kiăng črâo pơtrut kơtang bruă mă mơng khul grŭp pơgang Covid-19 ƀơi hơdôm bôh să tơring kual lăng tui hơdôm bôh sang anô̆ hmâo mơnuih dô̆ čơlah hăng lăi pơthâo glăi na nao kơ Grŭp črâo ba pơgang pơgăn klin mơng să sa hrơi 2 wot. Tơring glông ăt hmâo pơdŏng mơn grŭp hơđong tơlơi hơdip mơnuih mơnam, grŭp anai ăt pơhlôm mơn ngăn rơnoh mơng tơring glông ăt kah hăng ngăn rơnoh pơsur mơng hơdôm mơnuih thâo tơngia kiăng djru hmao tlôn kơ hơdôm mơnuih ƀôn sang dô̆ čơlah amăng hơdôm hrơi tơnap yua kơ klin Covid-19”.

Gơnang kơ hơdră ngă djơ̆, bruă dô̆ čơlah mơnuih ƀôn sang pơwot glăi mơng ƀôn prong Hồ Chí Minh hăng hơdôm bôh tơring čar kual Dơnung ƀơi tơring glông Krông Pač glăk čơkă mă tơlơi tŭ ư hrom mơng mơnuih ƀôn sang. Khă thâo dô̆ bưp lu tơlơi tơnap hăng amra hmâo tơlơi tơnap, samơ̆ hăng tơlơi prăp lui tŏng ten mơng hơdôm gưl gơnong bruă hăng tơlơi gum tơngan hrom mơng mơnuih ƀôn sang, sit ñu Krông Pač amra wai lăng truh kih klin Covid-19 ƀơi plơi pla./.

VOV Tây Nguyên: Pô čih – Siu H’ Prăk: Pô pơblang