VOV4.Jarai - Lơ 25/5, Gơnong bruă ia jrao tơring čar Lâm Đồng brơi thâo, hmâo laih 241 čô mơnuih bơdjơ̆ nao pô ƀă kơman klin 3141 pơčrang lăng tal 3 ƀu ƀuh kơman Covid-19. Amăng mrô anai, hmâo 121 čô mơnuih dưi tơbiă mơng kual dô̆ čơlah kiăng glăi pơ̆ sang tơdơi kơ dô̆ čơlah dong 7 hrơi tui tơlơi pơkă.

Khul wai lăng bruă glăk ngă hră pơ-ar kơ hơdôm mơnuih dô̆ čơlah giong dưi glăi pơ̆ sang

Ră anai Lâm Đồng ăt glăk ngă tui mơn tơlơi dô̆ čơlah 355 čô mơnuih, amăng anun hmâo 152 čô mơnuih bơdjơ̆ nao pô ruă 3141, dô̆ glăi lĕ hơdôm mơnuih rai mơng anih klin ngă. Amăng mrô anai, hmâo 21 čô mơnuih dô̆ čơlah ƀơi anom ia jrao, 259 čô mơnuih dô̆ čơlah hơbit hăng 75 čô mơnuih dô̆ čơlah ƀơi sang pô. Tui hăng Gơnong bruă ia jrao tơring čar Lâm Đồng, khă Lâm Đồng akă ƀuh mơnuih hơpă ƀă kơman Covid-19, samơ̆ ƀơi anăp tơlơi ngă dleh tơnap mơng klin ruă, hơdôm bruă pơgang klin ăt glăk dưi hmâo hơdôm bôh anom wai lăng gah bruă anai mơng tơring čar Lâm Đồng pok pơhai klă. Amăng anun, tơring čar hmâo prăp lui laih lu jơlan gah amra prăp lui hăng gơgrong bŏng glăi tơdah hmâo klin ruă truh./.

Siu H’ Prăk: Pô pơblang