VOV4.Jarai - Mơguah lơ 3/10, tơring čar Lâm Đồng hơmâo dong 19 čô mơnuih phrâo ƀă kman Covid-19, amăng anun hơmâo 10 čô mơnuih ƀă amăng sa boh plơi. Mơng bruă pơčrang kman hlâo či tlâ̆o vaccine Covid-19 ƀơi sa anih amăng tơring kual Liên Nghĩa, tơring glông Đức Trọng, ƀing ơi ia jrao tơring čar Lâm Đồng hơmâo ƀuh thim 3 čô dong ƀă kman SARS- CoV-2.

Mơnuih apăn bruă glăk mă ia adung pơčrang kman

Hyu hơduah ĕp, kiăo kru ječ ameč, guang dar, pơčlah đuăi mơnuih dŏ giăm hăng 3 čô ƀă kman lĕ plơi Pré, să Phú Hội, tơring glông Đức Trọng, truh mơguah lơ 13/10, sang ia jrao pơsit hơmâo abih bang 10 čô mơnuih ƀă klin ƀơi anai. Rơngiao kơ anun, amăng 24 mông rơgao, tơring čar Lâm Đồng ăt ƀuh dong 9 čô mơnuih ƀă klin. Amăng anun, 3 čô lĕ F1 bơdjơ̆ nao anih hơmâo klin plơi bơnga Vạn Thành, phường 5, plơi prong Đà Lạt. Ƀing dŏ glăi hơmâo pơsit ƀuh ƀơi tơring kual Liên Nghiã, tơring glông Đức Trọng hăng hơdôm čô dong glăi mơng anih hơmâo klin lĕ Đồng Nai hăng ƀon prong Hồ Chí Minh.

Siu H’Mai: Pơblang