VOV4.Jarai - Truh mơguah lơ 8/7, tơring čar Lâm Đồng pơsit hmâo dong 3 čô mơnuih phrâo ƀă kơman, đĭ tui mrô mơnuih ƀă kơman Covid-19 truh 6 čô mơnuih. Rơngiao kơ 6 cô mơnuih dưi thâo hlâo kơ anun ƀơi tơring glông Dă Teh, ƀut mơnuih ƀă phrâo anai hmâo 3 čô mơnuih dô̆ hăng mă bruă ƀơi tơring glông Đơn Dương, dưi pơsit ƀă kơman Sars-CoV-2 lom nao hrom pơ̆ Sang ia jrao prong Lâm Đồng pơčrang lăng.

Rơđah biă ñu, amăng mơguah lơ 7/7, wot 3 bôh rơdêh ô tô mơng pô đuăi mơng tơring glông Đơn Dương nao pơ̆ Sang ia jrao prong tơring čar Lâm Đồng (pơ̆ plơi prong Đà Lạt) kiăng pơčrang lăng tañ Covid-19 hăng ƀuh ƀă kơman. Tơdơi kơ anun, Anom wai lăng tơlơi duam ruă tơring čar Lâm Đồng mă ia khak pơčrang lăng hăng măi RT-PCR hăng ăt ƀuh kơman Sars-CoV-2 mơn amăng mơmot lơ 7/7. Tơdơi kơ thâo hơdôm mơnuih anai ƀă kơman Covid-19, amăng mlăm lơ 7/7 mơtăm, Gơnong bruă ia jrao tơring čar Lâm Đồng hmâo ba tơbiă tơlơi lăi pơthâo tañ hyu ĕp mơnuih bơdjơ̆ nao, hrom hăng anun pok pơhai bruă hyu hơduah ĕp mơnuih bơdjơ̆ nao. Truh mơguah lơ 8/7, khul apăn bruă ia jrao hmâo hyu hơduah ĕp laih, čơlah đuăi hmâo 85 čô mơnuih F1, 265 čô F2./.

Siu H’ Prăk: Pô pơblang