VOV4.Jarai-Mơguah lơ 11/7, tơring čar Lâm Đồng pơtong glăi hơmâo sa čô mơnuih ƀă klin Covid 19, pơđĭ tui mrô mơnuih ƀă ƀơi Lâm Đồng truh ră anai 11 čô. Pô ƀă phrâo kman Covid 19 jing mơnuih ruă tal 28.479, đah kơmơi mă bruă amăng sang bruă prăk Agribank ƀơi tơring glông Đơn Dương.

Tơring glông Đơn Dương ngă tui bruă pơčlah mơnuih mơnam ƀơi plơi Tân Lập, să Lạc Lâm hăng abih amăng tơring kual Thạnh Mỹ

Pơdjơ̆ nao kơ pô ruă anai, Lâm Đồng hơmâo tui kru ĕp 90 čô mơnuih F1 hăng 700 čô mơnuih F2. Sang bruă pel ĕp tơlơi duăm ruă tơring čar Lâm Đồng ăt ngă hrom tơring glông Đơn Dương, Đức Trọng hăng plơi prong Đà Lạt brơi tui kru, ĕp mơnuih jĕ giăm, kăng anih pioh guang dar pơgăn klin.

Hlâo kơ anun, kiăng pơhlôm, pơgang klă anăm brơi klin kheng ƀă hyu, tơring čar Lâm Đồng hơmâo ngă tui tơlơi pơčrâo trun mrô 16 mơ̆ng khua dêh čar pơphun pơčlah mơnuih mơnam ƀơi tơring glông Đơn Dương. Anih pơgăn mơnuih ƀôn sang tơbiă hyu lĕ či plơi Tân Lập, să Lạc Lâm hăng abih bang ƀơi tơring kual Thạnh Mỹ tơring glông Đơn Dương, hăng hrơi blan kom tơbiă hyu amăng 14 hrơi, yap mơ̆ng krah mlam lơ 11/7 truh kơ hơmâo tơlơi pơthâo phrâo dơ̆ng.

Nay Jek: Pơblang