VOV4.Jarai - Tom brơi lơ 15/12, tơring čar Lâm Đồng čih pioh hơmâo 284 čô mơnuih ƀă klin Covid-19, jing mrô ƀă klin amăng ha hrơi lu hloh kơ mơng hlâo truh ră anai. Amăng mrô 284 čô mơnuih phrâo ƀă, 4 boh tơring glông hăng plơi prong hơmâo klin kơtang lĕ Đà Lạt, Di Linh, Đức Trọng hăng Dạ Huoai hơmâo truh 217 čô. Klin Covid-19 ƀơi Lâm Đồng ăt kơtang đôč dong mơng akŏ blan 12 hăng giăm 2.500 čô mơnuih ƀă klin amăng ha mơkrah blan, lu tui tañ hloh ƀơi kual Dap Kơdư.

Truh lơ 15/12, tơring čar hơmâo 5.983 čô mơnuih ƀă klin Covid-19, amăng anun 2.864 čô mơnuih glăk pơjrao. Pơgăn glăi bruă hơmâo lu tui mơnuih ƀă klin, Gơnong bruă ia jrao Lâm Đồng brơi mrô kơ 3 anih pơjrao Covid-19 phrâo, hăng 570 boh sưng đih, pioh kơ ƀing F0 ruă rơnang hăng huăi mưn ruă. Amăng mrô anun, hơmâo 2 anih ƀơi plơi prong Đà Lạt hăng 1 lĕ ƀơi tơring glông Di Linh.

Siu H’Mai: Pơblang