VOV4.Jarai - Mơguah lơ 25/5, Khua gơnong bruă ia jrao Lâm Đồng ơi Nguyễn Đức Thuận brơi thâo, abih bang 120 čơđeh drah, ia khak ba pơčrang mơng ƀing dŏ giăm hăng pô ƀă kman mrô 3141 lêng huăi ƀuh kman Sars-CoV-2 amăng 3 wơ̆t pơčrang. Yap truh mơguah lơ 25/5, tơring čar Lâm Đồng hơmâo ba pơčlah 355 čô mơnuih; amăng anun, ƀơi sang ia jrao lĕ 21 čô; ƀơi hơdôm anih dŏ pơčlah ha anih lĕ 259 čô mơnuih hăng dŏ pơčlah mă pô pơ sang lĕ 75 čô. Bơdjơ̆ nao pô ƀă kman Covid-19 mrô 3141 mơng Bắc Ninh, hlâo kơ anun nao ngui pơ Đà Lạt mơng lơ 2 truh lơ 5/5, Lâm Đồng hyu ĕp hơmâo ƀuh 776 čô mơnuih. Ră anai glăk brơi pơčlah 152 čô mơnuih. Biă ñu mơng lơ 23 truh 25/5 hơmâo laih 249 čô mơnuih pơčrang huăi ƀuh kman Sars-CoV-2 amăng tal 3. Ƀing dŏ pơčlah pơƀut ha anih pơčrang 3 wơ̆t huăi ƀuh kman Sars-CoV-2 dưi mă hră abih hrơi dŏ pơčlah ha anih.

Siu H’Mai: Pơblang