VOV4.Jarai-Tlam lơ 4/7, Gơnong bruă ia jrao Lâm Đồng brơi thâo, mơnuih arăng đăo đing ƀă Covid 19 lĕ pô mơgăt rơdêh pơgiăng gơnam mơ̆ng Đà Lạt hăng ƀôn prong Hồ Chí Minh, pơčrang kman tal 1 ƀu ƀuh virus sars-cov-2 ôh.

Pô mơgăt rơdêh anai, tơdơi kơ ñu mơgăt rơdêh pơgiăng gơnam mơ̆ng ƀôn prong Hồ Chí Minh glăi pơ Đà Lạt, hlong nao pơ anih pơkă lăng tơlơi duăm ruă-gah anom bruă ĕp lăng tơlơi duăm ruă tơring čar Lâm Đồng pioh mă ia khak pơčrang kman sars-cov-2 tal sa ƀu ƀuh kman ôh.

Tơdơi kơ anun, anom bruă ĕp lăng tơlơi duăm ruă Lâm Đồng hlong pơčrang hăng hơdră phrâo RT-PCR tal 1 at ƀu ƀuh kman sars-cov-2 lơi. Tui anun yơh, truh yang hrơi dơ̆ng, lơ 4/7, Lâm Đồng hơmâo 5 čô mơnuih ƀă Covid 19, aka ƀu hơmâo mơnuih ƀă phrâo ôh.

Ră anai, tơring čar Lâm Đồng hơmâo pơčlah hĭ 4.331 čô mơnuih, amăng anun 12 čô mơnuih dŏ pơčlah pơ sang ia jrao, 287 čô pơčlah ƀơi anih pơtum sa ƀut hăng rơbêh 4000 čô dŏ pơčlah pơ sang anŏ pô.

Nay Jek: Pơblang