VOV4.Jarai - Lơ 16/7, Jơnum min mơnuih ƀôn sang tơring čar Lâm Đồng hmâo hră pơ-ar ječ kơ bruă ngă tui tañ dong, khop dong hơdôm bruă pơgang hlôm hlâo klin Covid-19 tưp mut amăng tơring čar. Čih pioh hmâo 4 čô mơnuih ƀă kơman Covid-19 lĕ ƀing mơnuih mơgăt rơdêh, djru bruă dŭ pơgiăng đuăi jơlan mơng ƀôn prong Hồ Chí Minh nao pơ̆ Lâm Đồng hăng pơwot glăi, Jơnum min mơnuih ƀôn sang tơring čar Lâm Đồng črâo ba Gơnong bruă jơlan nao rai hăng dŭ pơgiăng git gai, gơgrong bruă hăng gơgrong hlâo gum hrom hăng Jơnum min mơnuih ƀôn sang hơdôm bôh tơring glông, plơi prong amăng tơring čar hmâo jơlan gah rơđah kiăng kơtưn wai lăng mơnuih mơgăt rơdêh, mơnuih djru bruă dŭ pơgiăng gơnam đuăi jơlan ataih juăt mut tơbiă mơng tơring čar.

Hrom hăng anun, Jơnum min mơnuih ƀôn sang tơring čar rơkâo Gơnong bruă dŭ pơgiăng jơlan nao rai lăi pơthâo hơdôm anih anom dŭ pơgiăng gơnam tam ngă tui bruă pơčrang lăng kơman Sars-CoV-2 brơi kơ mơnuih mơgăt rơdêh, pô djru bruă 3 hrơi sa wot. Tơdah mơnuih mơgăt rơdêh hăng mơnuih djru bruă ƀu hmâo pơčrang lăng kơman Sars-CoV-2 ƀu ƀuh kơman klin amra dưi găn rơgao hơdôm anih dô̆ gak wai lăng pơgang, pơgăn klin Covid-19 yap mơng 12 mông krah mlăm hrơi pơgi lơ 18/7. Jơnum min mơnuih ƀôn sang tơring čar Lâm Đồng ăt rơkâo mơn Gơnong bruă dŭ pơgiăng jơlan nao rai tơring čar tañ tum pơƀut, čih anăn mơnuih mơgăt rơdêh hăng mơnuih djru bruă pơgiăng gơnam ƀơi tơring čar kiăng pơdŏng kơčăo bruă tañ tlâ̆o vaccine pơgang klin kơ hơdôm mơnuih anai./.

Siu H’ Prăk: Pô pơblang