VOV4.Jarai - Puih kơđông tơhan Lai Hòa, Ling tơhan pơgang guai Sóc Trăng jing sa amăng hơdôm puih kơđông tơhan pơgang guai hmư̆ hing amăng bruă ngă tui tơlơi pơtrun djru tơlơi hơdip mơda mơnuih ƀon sang, biă ñu lĕ hăng mơnuih ƀon sang djuai ƀiă ƀơi anai. Kơnong kơ hơbô̆ bruă Sang ia jrao tơhan - mơnuih ƀon sang ngă hrŏm ƀu kơnong ngă klă bruă lăng ba tơlơi suaih pral kơ ƀing khua, tơhan pơgang guai đôč ôh mơ̆, ăt ngă klă bruă khăm pơjrao tơlơi ruă kơ mơnuih ƀon sang ƀơi anai dong.

Lai Hòa lĕ să dŏ tơnap biă mơng plơi prong Vĩnh Châu, hơmâo mơnuih djuai ania Khmer, neh met wa pơ anai hơdip hăng bruă ngă hmua, nao mă akan hơdang pơ ia rơsĭ đôč yơh. Yua hnun, kiăng thâo nao mă bruă, neh met wa juăt nao khăm tơlơi ruă mơng mơguah mơtăm yơh. Tui hăng Thiếu tá Thái Minh Phong, Khua sang ia jrao Tơhan mơnuih ƀon sang Puih kơđông tơhan Lai Hòa brơi thâo, kiăng khăm brơi tañ kơ neh met wa, krĕp 6 mông mơguah rim hrơi lĕ ƀing mă bruă jrao truh pơ anih mă bruă laih, khăm pơjrao brơi tơlơi ruă. Biă ñu, neh met wa pơ anai nao khăm rơngiao kơ mông mă bruă soh, yua hnun, sang ia jrao jao bruă kơ ƀing ơi ia jrao dŏ gak 24/24 mông mơtăm yơh či djru lăng ba tơlơi suaih pral hăng djơ̆ laih anun ngă tui djơ̆ tơlơi jao bruă kơ ơi ia jrao hăng mơnuih ruă.

“Ƀing khua, ling tơhan, mơnuih mă bruă pơ anai djru brơi klă biă yơh, neh met wa rai lĕ ta lăng ba, khăm pơjrao brơi, ƀu pioh neh met tơguan sui ôh. Khăm brơi hăng brơi ia jrao tañ brơi kơ neh met wa đah gơñu mơng nao mă bruă. Neh met wa pơ anai bơni biă mă kơ sang ia jrao anet anai”.

Sit pran jua hur har mơng ƀing ơi ia jrao buh ao mơtah hăng abih pran jua hăng mơnuih ruă jing ngă mơnuih ƀon sang đăo gơnang kơ ƀing gơñu. Ră anai, rim hrơi sang ia jrao hơmâo čơkă khăm hăng brơi jrao brơi rơbêh 30 wơ̆t čô mơnuih. Y sĩ  Kiên Na Riêl, mơnuih mă bruă ia jrao ƀơi anai brơi thâo, ñu lĕ djuai ania Khmer anun jing thâo hluh rơđah tơlơi hơdip mơng neh met wa amăng plơi pla, thâo ƀiă đôč tơlơi Yuan. Lơ̆m ƀuh ƀing ơi ia jrao rai mă bruă tañ, pơhiăp hăng tơlơi Khmer, pơtô ba tŏng ten bruă wai lăng tơlơi suaih pral lĕ neh met wa tlao hok biă. Anai ăt jing tơlơi pơtrut pran jua kiăng ơi ia jrao ƀơi sang ia jrao tơhan mơnuih ƀon sang Puih kơđông tơhan pơgang guai Lai Hòa ngă klă bruă kơnuk kơna jao kơ ƀing gơñu.

“Lu neh met wa ƀu thâo đơi tơlơi Yuan ôh, lơ̆m ta pơhiăp tơlơi Khmer lĕ gơñu tlao hok biă. Lơ̆m ta pơhiăp tơlơi Khmer lĕ jing amuñ mơn pơtô brơi neh met wa mă yua ia jrao, pơtô brơi ƀing gơñu lăng ba tơlơi suaih pral, pơgang hlâo tơlơi duam ruă...kah hăng duam đung drah, tơtăng ară drah ƀudah ruă mơañă tơbiă ia sik...”

Yua ataih mơng să anun jing neh met wa ƀơi sa, dua boh plơi bơi să Vĩnh Tân, hơdôm boh plơi ƀơi Prey Chóp, Prey Chóp A, Plrey Chóp B, gah să Lai Hòa lêng nao khăm pơjrao pơ anai. Thiếu tá Thái Minh Phong, Khua anih pơjrao tơhan mơnuih ƀon sang Puih kơđông tơhan pơgang guai Lai Hòa brơi thâo, mơnuih ƀon sang ƀơi hơdôm anih ter hang ia rơsĭ mơng plơi prong Vĩnh Châu, tơring čar Sóc Trăng hăng neh met wa pơ să hrŏm ha guai ƀơi tơring čar Bạc Liêu ăt nao pơjrao pơ anai mơn. Rim thun sang ia jrao hơmâo khăm pơjrao hăng ƀơk brơi ia jrao kơ năng ai 10.000 wơ̆t čô mơnuih. Hrŏm hăng anun, anih pơjrao ăt pơtô brơi neh met wa pơgang klin duam ruă kah hăng: duam rơ-ơ̆t pơgrun, kơƀam ƀong tơngan - tơkai - amăng bah, duam đung drah...Biă ñu, ƀing apăn bruă nao tơl sang pơtô brơi bruă pơgang klin Covid-19 kiăng ană plơi thâo hluh. Mơng anun, gum tơngan hăng gong gai pơgang klin Covid-19 klă hloh.

“Kâo ăt hyu pơtô pơblang rim hrơi mơn, kah hăng plĕ hră pơhing kơ bruă pơgang klin, amăng hrơi blan klin hơđuh glăi lĕ sang ia jrao ăt pơtô ba neh met wa ƀu dưi pơƀut lu mơnuih, gôm ƀô̆, rao tơngan hăng ia čơƀu, kih rơmet sang anŏ agaih. Hyu pơtô rim hrơi, tơdah hơmâo pô duam kơtang lĕ pơtô kiăng dŏ amăng sang, ƀing ơi ia jrao nao pơkă hyuh pơ-iă ha hrơi 2 wơ̆t”.

Ră anai, Sang ia jrao tơhan mơnuih ƀon sang Puih kơđông tơhan pơgang guai Lai Hòa hơmâo 5 čô tơhan khăm pơjrao tơlơi ruă. Mah aka ƀu hơmâo ơi ia jrao ôh samơ̆ mơnuih ƀon sang đăo gơnang nao khăm tơlơi ruă mơn. Ƀuh neh met wa huăi hŭi kơ jơlan ataih ôh nao khăm pơ anai, ƀing tơhan, ơi ia jrao abih pran pơjrao brơi, tơhrơi mlăm hai ăt mă bruă mơn. Tơlơi hok mơ-ak mơng mơnuih ƀon sang lơ̆m suaih duam ruă jing pơtrut pơsur pran jua kiăng adơi ayong ngă tơhan dŏ glăi, dŏ hrŏm hăng ană plơi, dưi ngă bruă kơnuk kơna jao.

Hơmâo giăm 20 thun rơgao, Sang ia jrao tơhan mơnuih ƀon sang Puih kơđông tơhan pơgang guai Lai Hòa, Ling tơhan pơgang guai Sóc Trăng jing anih đăo gơnang, ba glăi tơlơi čang rơmang, hok mơ-ak kơ mơnuih duam ruă sang anŏ rin, biă ñu lĕ mơnuih djuai ania Khmer ƀơi jơlan guai ia rơsĭ./.

Siu H’Mai: Pơblang