VOV4.Jarai-Dơ̆ng mơ̆ng thun 2016, Khua mua git gai ping gah tơring glông Kon Plong, tơring čar Kon Tum ngă hră pơtrun mrô 26 pok pơhai ngă tui hơdră pơtrun mơ̆ng dêh čar man pơdong plơi pla phrâo, mơ̆ng thun 2016-2020. Tơdơi kơ giăm 5 thun pok pơhai, Hơdră mrô 26 hơmâo ba glăi boh tŭ yua bơblih klă kơ bruă ngă amăng kual plơi pla, bruă ngă hmua hăng pơđĭ tui tơlơi hơdip mơda kơnuih ƀôn sang.

Ơi Lê Đức Tín-Kơ-iăng Khua jơnum min mơnuih ƀôn sang tơring glông Kon Plong brơi thâo: Kiăng ngă rơđah hloh jơlan hơdră mơ̆ng Khua mua ping gah tơring glông kơ hơdră man pơdong plơi pla phrâo, lăi pơthâo hăng Jơnum min mơnuih ƀôn sang tơring glông Kon Plong git gai djop sang bruă man pơdong plơi pla phrâo amăng tơring glông ngă hră akŏ bruă, kơčăo bruă pơphun brơi sa tơlơi rơđah rơđong, djơ̆ rơ-ua, pơtong glăi hnong pơkă pok pơhai ngă tui rĭm thun hăng abih sa rơwang bruă; hơdôm bruă mă tơhnal pơkă man pơdong plơi pla phrâo gleng nao pok pơhai kơtang hloh, ngă atur pioh pơgiong tơhnal pơkă man pơdong plơi pla phrâo djơ̆ găl hăng tơring glông.

Pơtong glăi jơlan glông nao rai amăng plơi pla kah hăng gai kăl pioh pok bah amăng ngă tui man pơdong plơi pla phrâo, pơtrut pơđĭ kyar bơwih ƀong huă mơnuih mơnam ƀơi plơi pla, mơ̆ng thun 2016-2020, tơring glông Kon Plong pơtum lu bruă tuh pơ alin man pơdong ring bruă pơkra jơlan plơi pla.

Truh ră anai, tơring glông Kon Plong, hơmâo 7/8 boh să ngă djơ̆ tơhnal pơkă mrô 2 gah jơlan glông, đĭ tui 6 boh să; 8/8 tơhnal pơkă mrô 3 kơ pơkra bơnư̆ pơkong ia, đĭ tui 5 boh să; 8/8 boh să ngă djơ̆ tơhnal pơkă mrô 4 kơ apui lơtrik, đĭ tui 3 boh să; 4/8 boh să ngă djơ̆ tơhnal pơkă mrô 5 kơ sang hră, đĭ tui 2 boh să; 5/8 boh să ngă djơ̆ tơhnal pơkă mrô 6 kơ gơnam yua gru grua hiam klă, đĭ tui 4 boh să pơkă hăng thun 2015.

Laih dơ̆ng, tơring glông Kon Plong pơtong rơđah pơtrut bruă pơkra ming, pơđĭ tui hnong pơhrui glăi kơ mơnuih ƀôn sang jing sa bruă khom gleng nao kiăng git gai man pơdong plơi pla phrâo; amăng anun pơtum nao kơ bruă pok pơhai ngă tui tŭ yua bơblih hơdră ngă hmua, ba pơjeh djuai phrâo lir hơbit hăng man pơdong plơi pla phrâo.

Yua kơ anun yơh, tơdơi kơ 5 thun djru hrom pơhrŏ mrô sang anŏ ƀun rin amăng kual plơi pla trun dŏ rơbêh 14% thun 2020, hrŏ 39% pơkă hăng thun 2015; hnong pơhrui glăi pơkă dưm dưm sa čô mơnuih mă bruă sa thun thun 2020 truh kơ 33 klăk 500 rơbâo prăk, đĭ tui rơbêh 16 klăk prăk sa thun pơkă hăng thun 2015.

Tơring glông gleng nao kơ bruă pơtô hrăm bruă mă kơ mơnuih amăng kual plơi pla hăng pơtô hrăm kơ 2 rơbâo 282 čô mơnuih, dưi ngă djơ̆ tơhnal pơkă 91% hnong pơtrun. Boh nik ñu bruă pơtô bruă mă lir hơbit hăng pơsir bruă mă djru kơ mơnuih laih hrăm bruă giong dưi hơmâo bruă mă amăng kual plơi pla jai hrơi lu tui.

Amăng bruă pơtô pơjuăt, lu sang hră amăng tơring glông dưi tuh pơ alin, man pơkra glăi phrâo, pok prong tui, djop brơi bruă hrăm hră pơar kơ mơnuih ƀôn sang. 9/9 boh să, tơring kual dưi ngă giong hơdră pơtô hrăm abih anih 5 djop čơđai laih anun sang hră gưl dua hơmâo djop amăng kual plơi pla să; abih bang djop să, plơi pla lêng kơ hơmâo sang hră gưl muai mầm non soh, brơi kơ čơđai 5 thun dưi hơmâo anih hrăm djop.

Gơnam yua bruă mă, mơnuih apăn bruă gah glông bruă ia jrao tuh pơ alin djơ̆ lăp. Đơ đam tơring glông hơmâo 9/9 boh să, tơring kual dưi ngă djơ̆ tơhnal pơkă gah bruă ia jrao, ngă giong rơnoh pơtrun.

Bruă mă pơgang ayuh hyiăng ăt gleng nao mơ̆n, hơdră pơtrun mơ̆ng dêh čar kơ ia hơdjă hăng pơgang anih hơdip jum dar tuh pơ alin tŭ yua. Truh ră anai, mrô sang anŏ mă yua ia hơdjă, kual plơi pla đĭ tui 8% pơkă hăng thun 2015.

Yua ngă tui klă hơdră pok pơhai, man pơdong plơi pla phrâo tơring glông Kon Plong thun blan rơgao hơmâo ngă tui hiam klă. Truh rơnuč thun 2020, đơ đam tơring glông hơmâo 2 boh să dưi ngă djơ̆ 19/19 tơhnal pơkă laih anun hơmâo Jơnum min mơnuih ƀôn sang tơring čar pơsit plơi pla phrâo.

Lăp gleng nao, mrô tơhnal pơkă kơ să ngă djơ̆ tơhnal pơkă plơi pla phrâo rơbêh 15,8%; đĭ tui 10,2 tơhnal pơkă pơkă hăng thun 2015. Čang rơmang pơ anăp anai, bruă pok pơhai hơdră man pơdong plơi pla phrâo tơring glông Kon Plong ba glăi boh tơhnal tŭ yua klă, anăp nao kơ bruă man pơdong plơi pla phrâo amăng tơring glông ngă djơ̆ tơhnal pơkă.

Nay Jek: pơblang