VOV4.Jarai - Tui hăng lu mơnuih pơmĭn kiăng djă pioh hăng pơtô glăi bruă mơñam abăn ao brơi kơ ană tơčô, yă H’Blong Knul, dŏ ƀơi să Ea Trul, tơring glông Krông Bông, tơring čar Daklak lĕ mơnuih gir run mut hrŏm hăng hơdom anih pơtô brơi bruă mă kơ ƀing hlăk ai hơmâo pơphun amăng plơi pla. Yă H’Blong ăt lĕ mơnuih juăt mơñam eng ao buh amăng sang anŏ hăng sĭ brơi arăng dong, bruă mơñam mrai na nao ngă kơ ñu jai mơñam hiam tui hăng hơmâo dong prăk pơhrui lơ̆m sĭ eng ao.

Hơdôm hrơi ngă tui hơdră pơčlah mơnuih mơnam pioh pơgang klin Covid-19, bruă nao rai hăng nao pơ hmua kơ sang anŏ bưp tơnap yua anun amai H’Giang Knul dŏ ƀơi ƀuôn Ja, să Ea Trul, tơring glông Krông Bông, tơring čar Daklak hơmâo pioh lu hrơi mông kiăng kơ mơñam giong eng ao. Amai H’Giang brơi thâo, mơñam abăn ao lơ̆m rơhuông bruă pơ đang hmua laih dong hơmâo dong prăk pơhrui. Hơdôm thun giăm anai, hơdôm eng ao ñu mơñam rai hơmâo lu mơnuih hor hăng rơkâo blơi lui hlâo. Yua anun yơh, 3 adơi amai sang anŏ ñu lêng kơ thâo mơñam mrai hăng dưi mơñam lu eng ao djuai ania Êđê.

“Amĭ kâo lĕ mơnuih thâo mơñam mrai laih anun ñu pơtô brơi kơ kâo. Blung hlâo mơñam mrai tơnap biă, samơ̆ ƀơƀrư̆ ăt rơguăt tơngan mơn, anun lĕ klôn mrai, hơngaih mrai, thâo sĭ jing bơnga hiam ƀơi eng ao djuai ania Êđê”.

Yă H’Blong Knul

Amai H’Giang lĕ ană đah kơmơi tal 3 amăng sang anŏ yă H’Blong Knul (arăng juăt iâu lĕ yă Jim). Ƀơi ƀuôn Ja kah hăng ƀơi tơring glông Krông Bông, yă H’Blong Knul arăng hmư̆ hing lĕ mơnuih thâo mơñam eng ao, juăt mơñam lu abăn ao hiam. Hrŏm hăng abăn sum, abăn ƀă, eng, ao, rơtuai, yă H’Blong ăt hơmâo arăng rơkâo mơñam brơi akhăn liang ƀơi kơƀang, abăn bơnga hiam tol ƀơi prăng sang jưh tuai brơi kơ mơnuih amăng tơring čar hăng tơring čar pơkŏn. Yă H’Blong bơră ruai tom, hơdôm thun hlâo adih, ñu hơmâo lu mơnuih rơkâo blơi yua kơ hơmâo wŏt ană tơčô kah mơng tañ mơñam giong jao kơ arăng, thun anai yua klin lar hyu hơmâo ƀiă đôč arăng rơkâo blơi. Samơ̆, hơdôm hrơi laih rơgao, ñu ăt pioh hrơi mông mơñam eng ao prap lui hŭi kơ hlơi thơ kiăng blơi. Anai lĕ jing tơlơi juăt, kah hăng kiăng mơñam na nao brơi amoăn tơngan dong.

“Kâo thâo mơñam abăn ao mơng 15 thun, truh ră anai lơ̆m hơmâo ană tơčô kâo mơñum jing rơguăt laih hăng čang rơmang dưi pơtô glăi kơ ană tơčô djă pioh gru grua hiam mơng ơi yă, biă mă ñu lĕ bruă mơñam abăn ao anai”.

Tui hăng ơi Châu Phan, Kơ-iăng Khua anom bruă gru grua pôr pơhing tơring glông Krông Bông, tơring čar Daklak, ƀơi să Ea Trul hăng hơdôm să jum dar amăng tơring glông Krông Bông, hơdôm thun giăm anai jai hrơi hơmâo lu adơi amai thâo mơñam abăn ao. Ba truh tơlơi anai lĕ hơmâo tơlơi pơgôp mơng yă H’Blong Knul, yua kơ ñu pơtô brơi ană tơčô. Amăng thun blan laih rơgao, yă H’Blong hơmâo abih pran jua pơtô brơi 100 čô đah kơmơi ƀơi djop să thâo mơñam abăn ao.

“Yă H’Blong Knul mut hrŏm amăng bruă gru grua djuai ania, pơphun lu anih hră ayun suang, adôh ay-ray. Laih dong ñu ăt hơmâo mut hrŏm amăng lu anih hrăm mơñam eng ao yua kơ anom bruă pơtô buă mă brơi hlăk ai Daklak pơphun ƀơi să Ea Trul anun lĕ Čư̆ Mil, ƀuôn Ja, ƀuôn Plum, ƀuôn Băng Cung hăng ƀuôn Mnang Dơng ƀơi să Yang Mao kiăng kơ pơtô brơi bruă mơñam eng ao”.

Yă H’Blong brơi thâo, bruă mơñam abăn ao khŏm djă pioh hăng pơtô brơi ană tơčô, kiăng kơ tơdơi anai, djuai ania Êđê huăi ngă rơngiă gru grua djuai ania. Yua anun yơh, amăng thun blan laih rơgao, ƀu djơ̆ kơnong bruă pơtô brơi ană tơčô đôč ôh mơ̆, ñu ăt pơtô brơi ƀing mơnuih hor hăng kiăng hrăm mơñam eng ao.

Hăng tơlơi gir run, abih pran jua amăng bruă pơtô hrăm, yă H’Blong hơmâo lu tơlơi pơpŭ mơng djop gưl, kah hăng hơmâo mă pri amăng hrơi pơplông anet prong amăng tơring čar. Ñu ăt hơmâo Khua mir sir pơpŭ hăng hră pơsit “Nghệ sỹ ưu tú” thun 2019 yua kơ hơdôm tơlơi gum pơgôp amăng bruă djă pioh hăng lăi pơthâo gru grua yôm phara mơng djuai ania pô.

H’Xíu: Čih

Siu Đoan: Pơblang