VOV4.Jarai-Tơdơi kơ 41 hrơi dŏ pơjrao, lơ 25/6, mơnuih ruă ƀă kman Covid 19 mrô 3836 ƀơi Dak Lak tơbiă mơ̆ng sang ia jrao laih hăng tơlơi hok mơak mơ̆ng sang anŏ laih anun ƀing ơi ia jrao. Mơnuih ruă ƀă kman covid 19 tal 3836 anai jing F1 mơ̆ng mơnuih ruă tal 3052 ƀơi Thuận Thành, Bắc Ninh.

Anai lĕ, pô ruă arăng pơjrao tơnap biă mă. Tơdơi kơ mut nao pơjrao pơ sang ia jrao, mơnuih ruă anai pơtŭk kơtang suă jua ƀu hơđong, drah rô ƀu klă ngă kôl drah, khom suă pran hăng măi oxy, tlâ̆o ia jrao kơnin na nao, ia jrao hlai drah, hrong drah….

Anom bruă ia jrao tơring čar Dak Lak hơmâo ba măi mok hăng phung ơi ia jrao mơ̆ng sang ia jrao prong kual Dap kơdư nao pơ sang ia jrao Lao hăng pơjrao ruă tơsô̆ djru pơjrao kơ mơnuih ruă anai. Sang ia jrao prong Chợ Rẫy ƀôn prong Hồ Chí Minh ăt mơ-it nao 3 čô mơnuih kơhnâo kơhnăk djru pơjrao.

Truh ră anai, tơdơi kơ 3 wơ̆t mă ia khak ba pơčrang kman na nao, ƀu ƀuh kman dơ̆ng tah, anun arăng brơi ñu tơbiă mơ̆ng sang ia jrao glăi pơ sang anŏ ăt krăo lăng tong ten djơ̆ tơlơi pơtrun mơ̆ng ding jum ia jrao.

Nay Jek: Pơblang