VOV4.Jarai-Việt Nam hlăk pok pơhai bruă tlâ̆o jrao vaccine pơgang Covid 19 ƀơi hơdôm boh tơring čar hŭi ƀă klin lu. Pơ anăp anai, vaccine amra pơpha truh pơ djop tơring čar, ƀôn prong amăng dêh čar. Kiăng thâo hluh tong ten kơ vaccine pơgang Covid 19, tŭ yua lơm tlâ̆o pơgang, anŏ rơnuk rơnua hơđong mơ̆ng ñu ăt kah hăng hơdôm tơlơi kơđiăng lơ̆m tlâ̆o pơgang, grup mă tơlơi pơhing phrâo črăn hơdră anai hơmâo bưp ră ruai hăng ơi ia jrao Trịnh Quang Trí, Khua anom bruă Ĕp lăng tơlơi duăm ruă tơring čar Dak Lak.

-Ơ ơi ia jrao, rơkâo kơ ih brơi thâo tơlơi pơhing tong ten hloh kơ djuai jrao vaccine pơgang Covid 19 hlăk mă yua ră anai ƀơi Việt Nam?

-Ơi ia jrao Trịnh Quang Trí: Ră anai, anŏ kiăng yua ia jrao vaccine pơgang Covid 19 lu biă mă samơ̆ anih blơi pơmut lĕ ƀu djop ôh yua kơ anun kơnong pok pơhai tlâ̆o pơgang hlâo ƀơi hơdôm boh tơring čar đôč, hơdôm anih amuñ ƀă kman. Vaccine pơgang Covid 19 hlăk mă yua ră anai lĕ ia jrao mơ̆ng anom bruă pơkra vaccine AstraZeneca yua dêh čar Angle pơkra, dưi tlâ̆o pơgang kơ djop mơnuih mơ̆ng 18 thun truh 65 thun, ƀing huăi hơmâo tơlơi duăm kraih kah hăng duăm pơ-iă drơi, ƀing hơmâo tơlơi ruă amăng arăt hơtai boh….

-Tơlơi pơglăi laih tlâ̆o ia jrao juăt hơmâo hăng tơlơi kơđiăng hơgĕt lơ̆m tlâ̆o jrao vaccine pơgang Covid 19 anai, ơ ơi ia jrao ?

­-Ơi ia jrao Trịnh Quang Trí: Ăt kah hăng lu djuai ia jrao pơgang pơkŏn mơ̆n, vaccine pơkŏn mơ̆n, vaccine pơgang Covid 19 lơ̆m tlâ̆o  nao amăng drơi jăn ƀing ta amra hơmâo anŏ pơglăi juăt ƀuh kah hăng: bơbrah ƀơi nam tlâ̆o, ruă, duăm ayuăm pơ-iă drơi, rơgah rơgeñ, eh mơ-añă ƀu hơđong, ruă kian….Tơdah pơglăi kơtang lĕ ră anai aka ƀu hơmâo tơlơi lăi pơthâo tong ten mơ̆n kơ hơdôm tơlơi ƀuh. Samơ̆, ƀơi rŏng lŏn tơnah hơmâo mă yua rơbêh 500 klăk liêu laih ia jrao vaccine pơgang Covid 19 mơ̆ng lu anom bruă pơkra ming samơ̆ ƀuh rơđah lu kơ hơđong mơ̆n djuai ia jrao pơgang anai.

Kơđiăng lơ̆m tlâ̆o vaccine Covid 19 khom sui rĭm wơ̆t tlâ̆o boh ƀiă ñu 2 wơ̆t hrơi tơjuh. Ia jrao anai tlâ̆o ƀơi čơđeh asar ƀơi păl, sa wơ̆t tlâ̆o 0,5 ml hăng tlâ̆o 2 liêu, liêu tal sa sui hăng liêu tal dua lĕ 12 wơ̆t hrơi tơjuh. Tlâ̆o djop 2 liêu kah tŭ yua, tơdơi kơ tlâ̆o anŏ tŭ yua dưi hơmâo mơ̆ng 70-80%. Phara hăng tlâ̆o ia jrao vaccine pơgang pơkŏn, tlâ̆o vaccine pơgang Covid 19 kơnong dưi tlâ̆o pơ anih pơjrao lơ̆m sang ia jrao kơnuk kơna, sa mơguah ƀudah sa tlam tlâ̆o djop kơ 50 čô mơnuih đôč.

Hlâo kơ tlâ̆o vaccine Covid 19 ƀing nai ia jrao amra lăi pơthâo, tơña tong ten kiăng thâo rơđah gêh gal mơ̆n hă, hnun kah tlâ̆o. Tơdơi kơ tlâ̆o dŏ glăi pơ anih tlâ̆o ia jrao anun amăng 30 mơnit či krăo lăng ƀơ̆i laih anun glăi pơ sang ăt khom krăo lăng mă ta pô mơ̆ng dua hrơi truh pă hrơi, hŭi hơmâo tơlơi hơgĕt thơ khom nao bưp nai ia jrao mơtam.

Djop sang ia jrao pok na nao mrô telephôn pioh hmư̆ tơlơi ječ ameč thơ mơnuih ƀôn sang kiăng lăi pơthâo, tơña bla hŭi hơmâo ia jrao vaccine Covid 19 pơglăi.

-Akŏ bruă tlâ̆o jrao vaccine pơgang Covid 19 ƀơi Dak Lak hiư̆m pă ơ ơi ia jrao? Laih anun ƀing ta bưp tơlơi tơnap hơgĕt mơ̆n lơ̆m pok pơhai bruă anai?

-Ơi ia jrao Trịnh Quang Trí:  Him lăng amăng rơnuč blan 4 amra pok pơhai tlâ̆o ia jrao vaccine amăng tơring čar. Lơ̆m hơmâo ia jrao vaccine tlâ̆o pơgang kơ ƀing hơmâo anăn tui amăng Hră pơtrun mrô 21 mơ̆ng kơnuk kơna anun lĕ ƀing mă bruă ƀơi anom bruă ia jrao, mơnuih ngă bruă pơhlôm pơgang klin, tơhan hyu ĕp mơnuih ƀă klin tơña kơ tơlơi ƀă kman, jing ƀing anun yơh khom gleng nao hlâo hloh mrô 1.

Tơdơi kơ anun, ƀing kông an, ling tơhan blah ngă, nai pơtô hrăm hră, ƀing jĕ hăng mơnuih ƀă klin...Sit djop laih ia jrao vaccine amra tlâ̆o pơgang kơ ƀing arăng gleng nao tŏ tui dơ̆ng.

Tơlơi tơnap tap hlăk bưp amăng bruă pok pơhai tlâ̆o jrao vaccine pơgang Covid 19 lĕ, anŏ dưm ia jrao amăng anih rơ-ot kiăng răk lui vaccine sui hrơi. Lu ia jrao vaccine khom răk pioh amăng anih rơ-ot kơtang gah yŭ kơ yerô, hnong rơ-ŏt kơtang lơ̆m anun ia jrao vaccine dŏ pơgang pioh ră anai lĕ gah yŭ yerô 280 đô̆ C.

Anom bruă ĕp lăng tơlơi duăm ruă tơring čar hơmâo pơkra hơdră laih anun prăp lui pơkra anih rơ-ŏt kơtang pioh dưm ia jrao vaccine pơgang Covid 19 kơñ pơgi.

-Hnun hă, bơni kơ ih ơi ia jrao hŏ!

Pơtô brơi ngă tui tơlơi pơtrun 5 K mơ̆ng Ding jum ia jrao

            5 mơta tơlơi pơtô pơgang klin Covid 19 mơ̆ng Ding jum ia jrao

-Bơnal gôm ƀô̆: Khom truă bơnal gôm ƀô̆ tơđar tŭ mơ̆n sit nao pơ anih lu mơnuih, anih pơtum jơngum; truă bơnal gôm ƀô̆ ia jrao sit nao pơ anih pơjrao duăm ruă, anih dŏ pơčlah phara.

-Pơrơgoh kman: Rao tơngan na nao hăng ia čơƀu ƀâo ƀudah hăng ia rao tơngan jrao pơdjai kman. Rao rơgoh ƀơi mơta gơnam juăt djă kah hăng gai kal bah amăng sang, măi telephôn djă hyu, hơnăl tơčoh boh hră măi komputer, kƀang, grê. Pơgang rơnăk, sut uă na nao atur, rang sang brơi rơgoh rơhaih rơhong.

-Dŏ ataih: Khom dŏ ataih tơdruă djơ̆ tơlơi pơkă sit bưp mơnuih gah rơngiao

-Ƀu pơtum jơngum lu mơnuih sa bit ôh

-Pơhaih bruă ia jrao: Khom pơhaih ta pô kơ bruă ia jrao amăng plăng bơnah anăn App NCOVI; mă pơdưm anăn BlueZone mơ̆ng anih ĕp lăng http://www.bluezone.gov.vn kiăng tŭ mă tơlơi arăng pơthâo brơi kơ ta hŭi ƀă kman Covid 19.

Sit hơmâo tơlơi mưn kah hăng duăm hlor, pơiă drơi, pơtŭk, tơnap suă pran khom iâu telephôn tui mrô ječ ameč mơ̆ng Ding jum ia jrao 19009095 ƀudah mrô telephôn ƀing nai ia jrao amăng să, plơi pla kiăng hơmâo tơlơi pơtô ba, djru hrom, pơčrâo brơi hơdră nao pơ sang ia jrao pioh pơkă lăng hăng pơhlôm rơnuk rơnua.

Khom pơgang hơđong kơ drơi jăn ta pô laih anun abih bang ƀing ta amăng mông hơmâo klin kheng prong Covid 19 ngă.

Nay Jek: Pơblang