Hlăk amăng bơyan pĕ boh kơphê. Djơ̆ bơyan kơphê jor, adai pơ-iă hiam klă hăng hơmâo rơnoh dơ̆ng anun yơh mơnuih ngă hmua pla kơphê ƀôn Bu Ndoh, să Dak Wer, tơring glông Dak Rlâp djop pô hok mơak soh. Sang anŏ Điểu Suynh, dŏ ƀơi ƀôn Bu Ndoh hơmâo 7 ha lŏn pla tiu, sầu riêng, makka. Amăng anun, hơmâo 4 ha kơphê hlăk truh thun pĕ boh lu hloh. Thun hlâo pĕ hơmâo 10 tơn kơphê krô, thun anai him lăng 13 tơn. Bơyan hlâo, kơphê rơnoh kơnong 40 rơbâo prăk sa, thun anai truh 60 rơbâo prăk sa kg. Điểu Suynh brơi thâo: Hơdôm hrơi hăng anai, bơnai ñu duăm đung drah dŏ pơjrao pơ sang ia jrao tơring čar. Mlam ñu nao pơ sang ia jrao dŏ hrŏm hăng bơnai, samơ̆ mơguah sing bring hăt glăi nao pơ hmua pơpha bruă mă, wai lăng 10 čô mơnuih mă bruă âph pĕ kơphê kơ sang anŏ gơñu. Hơdôm thun hăng anai, Điểu Suynh dưi hơmâo mơnuih amăng plơi đăo kơnang ruah ñu ngă khua ƀôn Bu Ndoh anun bơyan pĕ kơphê jai kraih ñu lu bruă. Pơpha bruă mă, hyu ĕp lăng pĕ hrŏm kơphê amăng đang, pơgang hŭi arăng klĕ dŏp; jak iâu pĕ kơphê khom tơsă kiăng asar lôm. Điểu Suynh brơi thâo, amăng plơi hơmâo 31 boh sang anŏ čan prăk mơ̆ng sang bruă prăk kiăng tuh pơ alin kơ bruă ngă hmua pla kơphê. Kơnong sang anŏ ñu djơ̆ thun čan truh 1 klai prăk. Samơ̆ tla ƀơƀrư̆, ră anai dŏ glăi 400 klăk prăk, lơ̆m anun sang ñu man pơdong hăng ngă war đang sang truh 15 klai prăk:

“Sang bruă prăk ngă hmua hăng pơđĭ kyar plơi pla Agribank Nhân Cơ ngă gêh găl kơ gơmơi dưi čan prăk mơ̆ng thun 2012 truh ră anai. Hlâo adih lu mơnuih ƀôn sang aka ƀu dưi čan prăk djru kơmlai ôh mơ̆ng Agribank, mơnuih ƀôn sang khom čan gah rơngiao arăng mă kơmlai lu. Mơ̆ng hơmâo rơnoh prăk Agribank brơi čan ƀing gơmơi hơmâo prăk tuh pơ alin kơ bruă ngă hmua, pla kơphê, kơsu....Mơ̆ng anun, gơmơi hơmâo anŏ pơđĭ kyar bơwih ƀong huă sang anŏ, djru ngă pơblih ƀô̆ mơta kual plơi pla”.

Ƀu kơnong ƀơi Dak Rlâp đôč ôh, mơnuih ƀôn sang djuai ania Bnông ƀơi tơring glông kual ataih, giăm guai dêh čar kah hăng Tuy Đức tơring čar Dak Nông ăt yua hơmâo čan prăk mơ̆ng sang bruă prăk Agribank amuñ amĕ gêh găl. Tơlơi anai, ƀu kơnong pơtrut đuăi bruă hyu čan prăk gah rơngiao kơmlai lu đôč ôh, dŏ djru kơ ană plơi pla hơmâo prăk tuh pơ alin blơi gơnam yua mă bruă, blơi hơbâo pruai, ia jrao pruih pơgang phun pla hmao bơyan. Ră anai dŏ hơmâo 237 boh sang anŏ djuai ania Bnông čan 44 klai 800 klăk prăk mơ̆ng sang bruă prăk Agribank Tuy Đức pioh tuh pơ alin ngă hmua. Ayong Điểu Jâng dŏ ƀơi Ƀôn Diêng Ngaih, să Dak Rtih brơi thâo: Sui mơ̆ng anai 2 thun ñu čan 500 klăk prăk pioh blơi kmơ̆k, hơbâo pruai laih anun pơjeh makka, sầu riêng ba glăi pla amăng đang hmua ñu prong 3 ha. Ră anai đang boh troh ñu hlăk đĭ hiam, buă hăng tơlơi čang rơmang.

"Dơ̆ng mơ̆ng hơmâo prăk čan kơmlai ƀơƀiă mơ̆ng Sang bruă Agribank, kâo tuh pơ alin amăng bruă pla, wai lăng răk rem phun kơphê, sầu riêng, tiu....Prăk čan blơi kmơ̆k pruai phun tiu, makka hăng sầu riêng....Mơ̆ng prăk čan anai, ba glăi boh tu yua kơ gơmơi, kơmlai ƀiă anun yơh ană plơi pla ngă hmua hơđong biă mă”.

Ơi Thân Văn Chí, Kơ-iăng khua sang bruă prăk Agribank tơring čar Dak Nông brơi thâo: Agribank Dak Nông hơmâo lu sang bruă truh pơ tơring glông amăng tơring čar hăng 14 boh anom ngă bruă sĭ mơdrô prăk. Mơnuih mă bruă brơi čan prăk thâo hruaih bruă hyu amăng plơi pla laih anun brơi djơ̆ anăn mơnuih kiăng čan bơwih ƀong huă, tuh pơ alin djơ̆ hơdră anun ba glăi boh tŭ yua hiam klă. Truh ră anai, hơmâo 3.500 boh sang anŏ djuai ƀiă dưi čan prăk Agribank Dak Nông hăng rơnoh prăk čan 570 klai prăk.

“Kơnang kơ rơnoh prăk ta hơmâo, ƀing gơmơi djru mơnuih ƀôn sang plai ƀiă hyu čan prăk gah rơngiao arăng mă kơmlai lu, thun blan rơgao gơmơi ƀuh lu tơlơi sat răm ngă kơ lu sang anŏ bơbeč yua. Hrŏm hăng anun bruă jao rơnoh prăk, gơmơi pơkă glăi ĕp lăng djru bruă mơnuih mơnam, man pơdong sang khăp pap kơ sang anŏ ƀun rin. Thun blan rơgao, ƀing gơmơi ngă klă bruă anai. Hơmâo lu sang anŏ mơnuih ƀôn sang djuai ƀiă dưi man pơdong sang dŏ, ngă hmua hơđong. Pơ anăp anai, gơmơi ăt pơtrut đĭ tŭ yua hloh djru mơnuih ƀôn sang čan prăk, kiăng truh pơ djop mơnuih tơnap tap, brơi gơñu čan bơwih ƀong huă pơđĭ kyar, kiăng jai hrơi tơlơi hơdip mơda hơđong hloh”.