Nô Y Rôbin Niê 10 thun dŏ pơ ƀuôn Dur 1, să Dur Kmăl ( Dur Kmăn), tơring glông Krông Ana, dŏ păl amĕn ƀơi tơkai ama rông ñu hăng puăi tlao mơak biă mă. Ayong Y Viễn Hmŏk brơi thâo, Y Rôbin lĕ ană amai bơnai ñu. Amĭ nô anun djai mơ̆ng gơ̆ phrâo 18 blan đôč, ama ñu đuăi lui, dŏ bơnai plơ̆ng. Hlăk anun, dua rơkơi bơnai ayong Viễn phrâo pơdŏ, sang anŏ tơnap tap biă mă, ñu pô hai mơnuih ƀu klă drơi jăn jô găng, samơ̆ pap kơ nô anet anun ƀu hơmâo pô rông ba anun rơkơi bơnai ñu jing neh met hlong ngă hră rơkâo tŭ jum rông nô anet anun ngă ană rông, ană mĕm.

“Hnang blung phrâo tŭ jum rông ba, aka ƀu thâo hơdră wai lăng čơđai ôh anun tơnap tap sư̆ rơbư̆ mơ̆n. Hơmâo ơi yă ñu djru hrŏm ƀă ƀem čem rông ba, ră anai gơ̆ prong laih, ta ƀuh ăt mơak mơ̆n. Kâo lăng kơ ñu hrup ană ta pô mơtam yơh, khăp pap hloh kơ ană ta pô tơkeng dơ̆ng wŏ, yua ƀuh pap đơi”.

Thâo kơ tơlơi hơdip nô Rôbin tơnap tap, mơ̆ng thun 2022, Khul đah kơmơi mut phung să Dur Kmăl, hơmâo jak iâu ƀing mơnuih čơmah djru hrŏm kơnang kơ hơdră anăn “Amĭ mĕm” djru kơ nô anun sa blan 500.000 prăk. Hơmâo prăk anai, gơ̆ dưi hơmâo prăk blơi hơdrôm hră, gai čih pioh hrăm hră, plai ƀiă tơnap amăng sang anŏ.

Sa čô pơkŏn ăt tui anun mơ̆n, rơkâo ngă ană mĕm mơ̆ng hơdră “Amĭ mĕm” lăng ba mô̆ H’Hồng Niê, 14 thun, dŏ ƀơi ƀuôn Kŏ Siêr, phường Tân Lập, plơi prong Ƀuôn Ma Thuôt. Amĭ gơ̆ rơngiă sui mơ̆ng anai 14 thun, ama dŏ bơnai plơ̆ng anun mô̆ H’Hồng dŏ hăng ơi yă gah amĭ. Bơ ơi yă ñu ăt dju djuăm duăm ruă na nao đôč, prăk bơwih ƀong huă ƀu hơmâo. Mơ̆ng thun 2021, hơmâo tơlơi djru ba mơ̆ng Khul đah kơmơi phường Tân Lập, mô̆ H'Hồng hơmâo rơkơi bơnai bơn yă Đỗ Thị Thơm khua sang bruă sĭ mơdrô ƀơi plơi prong Ƀuôn Ma Thuôt, tŭ jum ngă amĭ mĕm , rông ba truh 18 thun. Mô̆ H’Hồng Niê ră ruai:

“Kâo hơmâo amĭ Thơm khăp pap rông ba, kâo ƀuh plai ƀiă mơ̆n tơlơi tơnap kơƀah yua ƀu hơmâo amĭ mơ̆ng anet Amĭ mĕm djru ba rim blan 500 rơbâo prăk, sui ha wơ̆t amĭ mĕm rai čuă jơmư juh alum ƀudah mơ-it tơlơi pơhing tơña blan nhắn tin kơ kâo. Kâo kơnong gir run kiăng hrăm thâo, tơdơi anai hơdor tơngia kơ amĭ Thơm pô lăng ba hăng khăp pap kơ kâo”.

Ƀơi Dak Lak ră anai, hơmâo 2.300 čô čơđai ană drit druai, amăng anun 700 čô drit druai djai abih amĭ ama laih anun tơnap tap biă mă. Ngă tui hơdră “Amĭ mĕm” yua kơ Khul đah kơmơi mut phung Việt Nam jak iâu, amăng 2 thun rơgao, Khul đah kơmơi mut phung tơring čar Dak Lak hơmâo pơtruh brơi lu sang bruă, mơnuih mơnam, ƀing čơmah djru ba giăm 700 čô čơđai drit druai hăng rơnoh prăk 7 klai 800 klăk prăk. Hăng lu hơdră djru ba kah hăng:  Jao prăk mơta, brơi hră pơkrem prăk, mơ-it prăk djă pioh, ƀơk prăk hrăm hră, man pơdong sang khăp pap, ƀơk rơdêh tang rơwang, djru kơdung hră, sum ao.... Ƀu kơnong djru ba dram gơnam đôč ôh, khul đah kơmơi dŏ djru brơi ding kơna amăng khul hyu čuă jơmư trư găn, krăo lăng tơlơi pơhing hrăm hră mơ̆ng ƀing čơđai drit druai anun dơ̆ng.

Yă Tô Thị Tâm, Khua khul đah kơmơi mut phung tơring čar brơi thâo, hơdră ngă anai yôm pơphăn biă mă. Mơ̆ng anun, kiăng juh alum, ngă anih ưh kơnang kjăp kơ ană amôn drit druai hơđong pran jua hrưn đĭ găn rơgao tơlơi tơnap tap, yak nao pơ anăp adih.

“Ƀing gơmơi ăt čang rơmang iâu pơthưr gum tơngan hrŏm mơ̆ng abih bang mơnuih mơnam, kơnang kơ keh prăk mơ̆ng khul đah kơmơi mut phung pơčruh ƀudah kơnang kơ Keh prăk pơgang ba čơđai muai yua gah Gơnong bruă Mă bruă tơhan rơka hăng mơnuih mơnam tơring čar djru ba kơ ƀing čơđai muai. Laih anun kiăng djop sang bruă, mơnuih mơnam, anom bruă sĭ mơdrô, khul grup amăng lăm hăng gah rơngiao tơring čar thâo hluh tong ten bruă mă djru ba ƀing čơđai muai drit druai, amra djru ba hăng lu jơlan hơdră tơlơi pơhing pơgôp hrŏm, djru hăng pran jua hăng  djru wơ̆t prăk kăk dram gơnam”.

Kơnang kơ hơdră “Amĭ mĕm” lu čơđai drit druai ƀơi Dak Lak hơmâo prna jua dưi juh alum, pơtrut pơsur, kiăng hơdip amăng tơlơi khăp pap. Tơlơi djru ba pơtrut pran jua hơmâo wơ̆t dram gơnam hăng pran jua ai hơtai amra djru kơ ƀing čơđai dưi găn rơgao hĭ tơlơi tơnap tap, hning rơngôt, đah mơ̆ng hrưn đĭ amăng tơlơi hơdip mơda, anăp nap pơ tơdơi adih dĭ da gla kơñ hơmâo tơlơi bơngač hloh.