Mông ƀong huă yang hrơi dong, sang sĭ gơnam ƀong huă Lê Na, amăng ƀuôn Akŏ Dhông, plơi prong Buôn Ma Thuột, tơring čar Dak Lak hơmâo lu mơnuih nao ƀong huă. Kơnong mơng 40 rơbâo prăk, tuai dưi ruai mơng 3-4 añăm ƀong, hơmâo añăm mơnong, añăm hơnia, añăm om, añăm sŏ hăng añăm ia. Anŏ yôm hloh lĕ djop gơnam ƀong lêng kơ tơnă hơnai tui gru grua djuai ania Êđê, ƀong jơman lơm hơmâo añăm phĭ, hăng. Iâu hơdôm añăm ƀong hơmâo trong phĭ, hla plum, mơnong un om luk hăng plăng, ayong Lê Vạn Tiếp, dŏ amăng phường Ea Tam, plơi prong Buôn Ma Thuột brơi thâo, yang hrơi dong ñu juăt rai huă asơi ƀơi anai.

“Hlâo anun kâo dưi ƀong hơdôm añăm hơbai tui anai lơ̆m mut amăng plơi pla. Tơdah mơhao ƀong ăt hơbai mă đôč samơ̆ ăt ƀu jơman kar hăng adơi amai ƀơi anai tơnă hơbai. Mơ̆ ră anai kâo ƀuh ƀơi Buôn Ma Thuột hơmâo sa, dua boh anih sĭ gơnam ƀong tơbă hơbai hơdôm añăm ƀong jơman tui anai, hăng hơmâo lu mơnuih nao ƀong huă, hơdôm añăm ƀong ƀơi anai jơman, ta ăt dưi ruah tui hluai hor”.

Tui amai H’Rul Niê, pô sang sĭ gơnam ƀong huă Lê Na, yua hơmâo lu añăm mơng plơi pla, yua anun ƀing gơñu hơbai lu tui, jai hrơi hơmâo lu tuai rai ƀong huă. Tơdơi kơ hơdôm hrơi đôč, ƀing gơñu pok 3 anih tơnă hơbai amăng ƀuôn Akŏ Dhông, pok mơng 10 mông mơguah truh 10 mông mơmŏt mlăm rĭm hrơi

“Tơdah kiăng ƀong añăm hơget, tuai amra čih glăi amăng hră, ƀing gơmơi amra tuah brơi tui tơlơi rơkâo, ƀơi anai hơmâo añăm hla plum, añăm tơpung, añăm trong, akan krô, boh pơneh sŏ, añăm ñet, boh kơnôk…Hơdôm añăm anai ƀing gơmơi blơi mơng neh met djuai ania Êđê tui bơyan hơmâo”.

Hlâo anun kơnong tơnă hơbai tui tơlơi rơkâo amăng hrơi ngui ngor ƀudah tuai čuă ngui amăng plơi pla, mơ̆ mơng akŏ thun truh ră anai, lu sang anŏ amăng ƀuôn Akŏ Dhông hơdai sĭ brơi ƀing mă bruă. Hơdôm añăm ƀong juăt tơnă hơbai amăng plơi pla, ră anai jing gơnam ƀong jơman pơhưč lu mơnuih. Amai H’Minh Byă (amĭ Jay), pô sang sĭ gơnam ƀong huă Mnga Tăng Bi, amăng ƀuôn Akŏ Dhông brơi thâo, hơmâo añăm ƀong anai tơnă hơbai ăt pơplih tui tơlơi rơkâo mơng abih bang.

“Tuai rai ƀong huă lu biă mă, anun kâo ăt tơnă hơbai lu mơn. Kâo tơnă hơbai tui añăm ƀong mơng djuai ania Êđê, ăt pơplih ƀơƀiă, plai ƀiă hăng, phĭ, kiăng kơ hlơi hlơi lêng kơ dưi ƀong soh. Añăm ƀong lu djop mơta, rĭm hrơi lêng kơ pơplih, tơdah hơmâo añăm hơget thơ amra hơbai añăm anun”.

Ƀu djơ̆ amăng plơi prong Buôn Ma Thuột, anih tơnă hơbai hơdôm añăm ƀong tui djuai ania Êđê ăt ƀuh ƀơi plơi prong Buôn Hồ. Ayong Lê Thanh Vinh, tuai čuă ngui mơng ƀôn prong Hồ Chí Minh brơi thâo, gơnam ƀong ăt jing hơdră kiăng mơnuih ƀôn sang lăi pơthâo gru grua djuai ania pô.

“Tui kâo pơmĭn hăng lu añăm ƀong jơman mơng djuai ania Êđê jing anŏ pơhưč lu tui tuai čuă mơng ataih giăm rai pơ tơring čar Dak Lak. Yua bruă bơwih brơi tuai čuă ngui  rơngiao kơ hơdôm anih hiam, gơnam ƀong huă ăt jing anŏ kơđŏm glăi, jing ha bơnah tui tơlơi ruah mơng tuai čuă ngui”.

Ƀu kiăng dŏ tơguăn truh bơyan ngui ngor, ngă yang rơbang ƀudah mut nao hơdôm boh plơi pla ataih, ră anai tuai čuă ngui lơm nao pơ Dak Lak dưi ƀong huă hơdôm añăm ƀong jơman mơng djuai ania Êđê giăm tong krah plơi prong Buôn Ma Thuột. Hơdôm gơnam ƀong mơng plơi pla amra tơnă hơbai brơi abih bang mơnuih, jing gơnam ƀong jơman djru mơnuih ƀôn sang, tuai čuă ngui hăng nua gap ƀrô./.