VOV4.Jarai - Amăng hơdôm bruă mă pioh hơdor glăi 90 thun hrơi akŏ pơjing tơring čar Gia Lai, Jơnum sang čơ pơdă prưng gơnam sĭ mơdrô hăng lăi pơthâo gơnam tui OCOP kual Dap kơdư - Gia Lai hăng bruă sĭ mơdrô mơng anom bơwih ƀong Japan lĕ hơdôm bruă yôm phăn kiăng kơtưn pơlir hơbit amăng sĭ gơnam, pơđĭ kyar anih anom sĭ mơdrô hăng lăi pơthâo gơnam tui OCOP, gơnam tuh tia pơkra pơjing mơng ƀon lan klă hloh, gơnam yôm phara tơl mơnuih blơi.

Ba nao pơdă prưng amăng jơnum sang čơ tal anai , sang anŏ bơwih ƀong sĭ mơdrô Phạm Thị Bình (dŏ ƀơi plơi Ó, să Ia Vê, tơring glông Čư̆ Prông, tơring čar Gia Lai) lăi pơthâo gơnam anun lĕ “Ia če kuar plăng boh kruăi Nam Phúc”. Yă Phạm Thị Bình brơi thâo, gơnam anai hơmâo tŭ yap tui OCOP 3 asar pơtŭ gưl tơring čar thun 2021. Hăng nua sĭ gap ƀrô, gơnam anai ngă hiam amăng drơi jăn yua anun hơmâo lu mơnuih blơi ba glăi yua.

“Jơnum sang čơ thun anai pơphun klă biă mă, bruă prap lui anih pơdă gơnam, djop mơta lêng kơ lăp djơ̆ soh, ngă gêh gal brơi abih bang mơnuih, kông ti. Nao jơnum sang čơ hrŏm tal anai, kâo ƀuh dưi lăi pơthâo gơnam tam brơi kơ abih bang mơnuih amăng tơring čar hăng gah rơngiao thâo rơđah dong mơng pơkra mơng ƀing gơmơi. ĂT hơmâo sa, dua čô tuai đing nao yua anun hơdôm hrơi anai ƀing gơñu juăt rai blơi gơnam. Đa hơmâo mơnuih rai blơi gơnam blung a lơ̆m ba glăi yua hrơi tơdơi ƀuh ƀing gơñu pơwŏt glăi plơi dong”.

Gơnam tui OCOP yôm hơdjă mơng tơring čar Gia Lai ba pơdă prưng

Jơnum sang čơ ngă gêh gal brơi hơdôm anom bơwih ƀong sĭ mơdrô, anom bơwih ƀong hrŏm hăng hơdôm ƀon lan dưi lăi pơthâo gơnam tam, ĕp mơnuih ngă hrŏm, pok prong anih anom sĭ mơdrô, djru brơi mơnuih blơi gơnam dưi mă yua hơdôm gơnam pơkra pơjing hiam hơdjă. Lu anom bơwih ƀong sĭ mơdrô amăng tơring čar hăng gah rơngiao Gia Lai ba gơnam nao pơdă prưng, lăi pơthâo măi mok tuh tia pơkra pơjing, ngă hmua, hơdôm gơnam phrâo hloh. Ơi Dương Minh Tú, khua apăn bruă Anom pơsur tuh tia pơkra pơjing hăng pơsur sĭ mơdrô Quảng Ngãi brơi thâo:

“Nao jơnum sang čơ tal anai, grup mơng gơnong bruă tuh tia pơkra pơjing Quảng Ngãi ba rai 20 gơnam tui OCOP hăng gơnam đang hmua mơng ƀon lan hiam hơdjă gưl dêh čar. Yôm hloh lĕ mơnong rơmô amu krô, sik jŭ, toi Lý Sơn, akan krô, mạch nha …Amăng hơdôm hrơi rơgao ƀing gơmơi ƀuh neh met wa hor biă mă hơdôm gơnam tui OCOP, sit biă ñu lĕ hơdôm gơnam yôm phara mơng djop kual, đa hơmâo mơnuih rai blơi blung a, tơdơi anun ăt pơwŏt glăi blơi dong tal dua, tal tlâo”.

Jơnum sang čơ pơdă prưng gơnam tam hăng lăi pơthâo gơnam tui OCOP kual Dap kơdư - Gia Lai prong 250 anih pơdă gơnam hăng lu gơnam tui OCOP, gơnam hiam hloh mơng ƀon lan amăng tơring čar Gia Lai hăng hơdôm tơring čar, ƀôn prong đơ đam dêh čar anun lĕ kơphê, tiu, makka, ia hơni, toi, trầm hương, ia mơsin … Ayong Trần Hoài Nam, tuai nao lăng jơnum sang čơ tal anai brơi thâo:

“Tal anai kâo ƀuh Gia Lai pơphun prong biă mă, jơnum sang čơ hơmâo lu gơnam. Mơnuih ƀon sang rai pơ anai kiăng kơ čuă ngui ƀơi tơdron lăk rah, hăng hyu lăng, blơi gơnam tam, gơnam ba rai sĭ djop mơta, nua sĭ gap ƀrô dong. Mơng hơdôm kông ti, gơnam pơkra hiam biă mă, kâo hor biă mă. Pơpŭ kơ Gia Lai pơphun lu hrơi jơnum pơƀut hiam klă tui anai kiăng pơhưč tuai rai čuă ngui amăng tơring čar hăng mơng gah rơngiao dong”.

Lăi pơthâo gơnam tui OCOP brơi kơ tuai čuă ngui

Ơi Phạm Văn Binh, Khua gơnong bruă sĭ mơdrô hăng tuh tia pơkra pơjing Gia Lai brơi thâo: Gơnam ba rai pơdă prưng hơmâo djop mơta lĕ tơlơi yôm hloh amăng bruă pơsur sĭ mơdrô tal anai pơlir hăng bruă sĭ gơnam nao rai, mut hrŏm bơwih ƀong jar kmar. Mơng anun, ngă gêh gal brơi hơdôm anom bơwih ƀong sĭ mơdrô, anom bơwih ƀong hrŏm, hơdôm anih anom sĭ mơdrô amăng tơring čar Gia Lai, hơdôm tơring čar, ƀôn prong hăng anom bơwih ƀong mơng Japan dưp pơbưp, pơliă nao rai, ĕp mơnuih ngă hrŏm, pơđĭ kyar anih anom sĭ mơdrô. Laih dong, mơng anun amra lăi pơthâo hơdôm tơlơi dưi, tơlơi gal, lăi pơthâo gơnam tam mơng ƀon lan, mơng hơdôm anom bơwih ƀong sĭ mơdrô hăng anom bruă tuh pơ alin- pơsur sĭ mơdrô hăng tuai čuă ngui.

“Hơdôm anom bơwih ƀong sĭ mơdrô mơng Japan đing nao biă mă hơdôm gơnam đang hmua mơng Gia Lai anun lĕ ia hơni,mơnong rơmô amu krô, makka hăng lu gơnam pơkŏn dong, sit biă ñu lĕ kơphê. Hơdôm anom bơwih ƀong sĭ mơdrô Japan ăt glăk ƀuh lu tơlơi dưi mơng Gia Lai kiăng pơhưč tuh pơ alin. Tơdơi kơ jơnum sang čơ anai ƀing gơmơi čang rơmang hơdôm anom bơwih ƀong sĭ mơdrô Japan amra mut rai tuh pơ alin ƀơi Gia Lai. Kơnong gơnong bruă tuh tia pơka pơjing amra ngă gêh gal djop mơta, pơphô bruă kơ Jơnum min mơnuih ƀon sang tơring čar pơhưč ƀing gơñu mut tuh pơ alin amăng kual tuh tia pơkra pơjing kiăng pơtrut pơđĭ kyar bơwih ƀong huă”.

Jơlan hơdră OCOP lĕ jơlan hơdră pơđĭ kyar bơwih ƀong huă kual ƀon lan tui jơlan gah pơđĭ kyar amăng tơring čar hăng đĭ tui rơnoh yôm. Bruă pơdă prưng gơnam OCOP amăng kual Tong krah - Dap kơdư ƀơi Gia Lai tal anai kiăng pơdah tơlơi kjăp amăng bruă man pơdong plơi pla phrâo amăng kual.

Siu Đoan: Pơblang