![H'Xíu Hmốc/Siu Đoan Pơblang](/themes/custom/vov_4/images/avatar.png)
Amăng 2 wŏt hrơi tơjuh glăi pơ să Čư Pơng, tơring glông Krông Buk, tơring čar Dak Lak, 15 čô hlăk ai amăng grup hlăk ai djru mơnuih mơnam amăng bơyan pơdơi prong mơtah gưl tơring čar hơmâo gum hrŏm man pơkra giong 4 ring bruă hlăk ai. Mah hơjan hlim, ƀing hlăk ai ăt hur har pran jua djru man pơkra jơlan nao pơ pin ia hăng rơmet pơagaih, pơkra ming jum ia pin ia; tuh lan ƀêtông, pơkra tơdron apah boh lông amăng sang jơnum plơi. Truh mơmŏt, ƀing hlăk ai pioh mông pơtô hrăm brơi ƀing čơđai, 8 wŏt pơphun ngor bơyan pơdơi prong hrŏm hăng pơtô pơblang tơlơi phiăn. Ayong Y Hlý Niê Kđăm, Khua khul hlăk ai să Čư Pơng, tơring glông Krông Buk brơi thâo:
“Thun anai să Čư̆ Pơng amra pơgiong jing plơi pla phrâo, yua anun hơdôm ring bruă, bruă mă mơ̆ hlăk ai djru brơi ană plơi pla amăng să lĕ kiăng biă mă kah dưi pơgiong hơdôm hơnong pơkă amăng thun anai. Ƀing hlăk ai lơm glăi pơ anai, ƀing gơñu ƀu djơ̆ kơnong ngă lar hyu rup rap wai pơgang anih hơdip jum dar, pơtô hrăm brơi ƀing čơđai đôč ôh ăt pơdah pran jua hur har, ba glăi tơlơi đăo gơnang brơi rơnuk tơdơi, gum hrŏm djru brơi mơnuih mơnam”.
![Hlăk ai pơphun ngui amăng bơyan pơdơi prong](https://vov4-media.solidtech.vn/sites/default/files/styles/large/public/2024-07/dau_an_mua_he_xanh_1_20240723164809_3.jpg)
Ƀơi tơring glông Lak, 15 čô hlăk ai djru mơnuih mơnam gưl tơring čar hơmâo nao djru amăng ƀuôn Dak Sa, să Dak Nuê. Anai lĕ plơi pla hơmâo 100% mơnuih djuai ania Mông rai mơng kual kơdư, kual dŏ hơdip dŏ lu tơnap tap, aka ƀu hơmâo glông hrĕ apui kơtrik hăng jơlan glông. Ƀing hlăk ai hơmâo pơpha jing lu grup hyu pơtô pơblang kơ bruă pơdô̆ rơkơi bơnai mơng muai, pơgang klin kman, djru brơi hơdôm boh sang anŏ tui hơdră djru amăng pĕ pơhrui gơnam đang hmua, bơwih brơi đang kơphê. Pok 2 anih pơtô hrăm brơi 40 čô čơđai amăng plơi pla, hrŏm hăng mơnuih ƀôn sang pơkra ming 5 km jơlan amăng plơi pla, rơmet pơagaih ƀơi sa, dua ară jơlan amăng plơi pla hăng pla 100 boh kyâo sao jŭ rôk jơlan. Yă H’Me Tơr, dŏ amăng să Dak Nuê, tơring glông Lak brơi thâo:
“Tơlơi kơđŏm glăi mơng ƀing hlăi ai lĕ pran jua hur har. Amăng să aka ƀu hơmâo apui lơtrik, aka ƀu hơmâo ia yua hơdjă, aka ƀu hơmâo jơlan hiam hruaih, ƀing gơñu đŭp mă ia hơjan, yua ia hơjan pioh mơnơi gơi, yua tơnă hơbai. Samơ̆ ƀing gơñu lêng kơ hok mơ-ak, mah tơhrơi kah mơmŏt mlăm lêng kơ abih pran jua hăng hơdôm bruă mă mơ̆ ƀu hơmâo sal kơ bruă ƀu hơmâo ia, ƀu hơmâo apui lơtrik”.
![Hơdôm anih pơtô hrăm brơi ƀing čơđai amăng bơyan pơdơi prong](https://vov4-media.solidtech.vn/sites/default/files/styles/large/public/2024-07/dau_an_mua_he_xanh_2_20240723164808_3.jpg)
Amăng tal hyu djru mơnuih mơnam mơng hlăk ai bơyan pơdơi prong mơtah thun anai, hrŏm hăng rơbêh 7.000 čô hlăk ai amăng djop plơi pla, hlăk ai tơring čar Dak Lak hơmâo pơhrua dong 180 čô hlăk ai nao djru pơ 6 boh să ƀơi 6 boh tơring glông. Hrŏm hăng anun lĕ 6 grup juăt djru gah bruă pơtô pơblang, pơplih yua boh thân phrâo amăng plơi pla, djă pioh gru grua djuai ania, mut hrŏm jar kmar, ƀing hlăk ai rơgơi, yua kơ ƀing čơđai kiăng khăp ƀu-eng. Mơng anun hơmâo man pơkra hơdôm hơpluh ring bruă, bruă mă sit nik. Ayong Y Lê Pas Tơr, kơ-iăng khua khul hlăk ai tơring čar, Khua khul git gai bruă djru mơnuih mơnam brơi thâo:
“Hơmâo laih lu ring bruă, sit biă ñu lơm pơphun bruă mă amăng 2 wŏt hrơi tơjuh ayuh hyiăng ƀu gêh gal, hơjan mơ-ai. Tui anun, ƀing hlăk ai ăt hơdeč hmar amăng bruă mă mơng ƀing gơñu hăng pơplih hrơi mông ngă bruă kiăng pơhlôm ngă pơgiong hơdôm ring bruă mơ̆ ăt pơhlôm boh tơhnal amăng pơtô pơblang tơlơi phiăn amăng plơi pla hăng bruă mă mơng khul hlăk ai laih dong pơtô hrăm brơi ƀing čơđai amăng bơyan pơdơi prong anai”.
![Hlăk ai rơmet pơgaih jơlan amăng plơi pla](https://vov4-media.solidtech.vn/sites/default/files/styles/large/public/2024-07/dau_an_mua_he_xanh_3_20240723164809_3.jpg)
Hăng ƀing hlăk ai, anai lĕ bơyan pơdơi prong yôm, pơgôp pơjing rai hơdôm tơlơi hiam klă amăng plơi pla. Đặng Thị Phương Thảo (Sang hră gưl prong Ngoại ngữ- Tin Học ƀôn prong Hồ Chí Minh) brơi thâo:
“Bơyan pơdơi prong thun 2024 anai hăng kâo pô ƀu djơ̆ anai lĕ sa bơyan pơdơi prong hyu djru mơnuih mơnam đôč ôh ăt kiăng kâo thâo hluh ƀiă dong, dưi pơđĭ kyar, djru pơgôp tơlơi hơdip hiam klă, djru brơi mơnuih mơnam. Kâo glăk mă bruă mơng ataih brơi djop bruă amăng bơyan pơdơi prong mơtah mơng ƀôn prong Hồ Chí Minh hăng mă bruă ƀơi anăp, abih pran jua brơi bơyan pơdơi prong mơtah amăng plơi pla kâo mơtăm. Amăng hrơi mông mă bruă amăng grup, rĭm mơmŏt mut hrŏm kâo dưi hrăm sa tơlơi phrâo dong”.
Bruă pơphun bơyan pơdơi prong mơtah thun anai ƀơi Dak Lak pơđut hĭ hăng lu tơlơi kơđŏm glăi amăng pran jua gong gai hăng mơnuih ƀôn sang amăng djop plơi pla. Hơdôm ring bruă, bruă mă mơng hlăk ai ƀu djơ̆ kơnong pơgôp ngă tui hơdôm bruă djru mơnuih mơnam đôč ôh ăt ngă lar hyu rup rap hiam klă kơ pran hur har abih pran jua mă bruă mơng hlăk ai tơring čar Dak lak yua kơ tơlơi hơdip hiam klă kơ ană plơi pla./.
Viết bình luận